“അയാൾ മരണമായിരുന്നോ?.. സകല ലോകങ്ങളുടേയും അന്തകൻ’; ഓപ്പൻഹൈമർ എന്ന കില്ലർ ജീനിയസ്‌

ക്രിസ്റ്റഫർ നോളൻ തുറന്നുവിട്ട “ഓപ്പൺഹൈമർ’ എന്ന സിനിമാ ഭൂതത്തിലൂടെ, ലോക മനസാക്ഷിയെ പിടിച്ചുലച്ച ആറ്റംബോംബിന്റെ പിതാവ്  ഓപ്പൺഹൈമറുടെ ജീവിവും അമേരിക്കൻ മക്കാർതീയിസവും കമ്മ്യൂണിസ്റ്റ് വേട്ടയാടലും ചുവപ്പു വെറിയും വീണ്ടും ലോകം ചർച്ച ചെയ്യുകയാണ്. എസ് ജോർജ്‌കുട്ടി എഴുതുന്നു.

അയാൾ മരണത്തിന്റെ അവധൂതനായിരുന്നോ ? അതോ, ഭരണകൂടം കൊലയാളിയാക്കിയ ശാസ്‌ത്ര പ്രതിഭയോ? അതോ ഭരണ കൂടം വേട്ടയാടിയ ബൗദ്ധികനോ? ഓപ്പൻഹൈമർ എന്ന കില്ലർ ജീനിയസിന്റെ ജീവിതവും ചരിത്രവും വീണ്ടും സിനിമാലോകത്തിലൂടെ  വിചാരണ ചെയ്യുകയാണ്. “ഞാൻ മരണമാകുന്നു, ലോകങ്ങളുടെ അന്തകൻ”, എന്ന കൊലവിളിയുമായി ഓപ്പൻഹെെമർ വീണ്ടും വികാരങ്ങളുടെ വികിരണ കുടം തുറന്നിരിക്കുന്നു. അയാൾ മരണമായി, ലോകങ്ങളെ നശിപ്പിക്കുന്നവനായി, ജനിമൃതികളുടെ തീക്കടലായി ഭഗവദ് ഗീത സൂക്തം വായിക്കുകയും ഇണയെപ്രാപിക്കുകയുമാണ് ക്രിസ്റ്റഫർ നോളന്റെ ഒപ്പെൻഹൈമർ.

കെയ് ബേഡും മാർട്ടിൻ ഷെർവിനും രചിച്ച അമേരിക്കൻ പ്രോമിത്യുസ് പ്രമേയമാക്കി പ്രശസ്‌ത ചലച്ചിത്രകാരൻ  ക്രിസ്റ്റഫർ നോളൻ തിരക്കഥയും സംവിധാനവും  ചെയ്‌ത ഓപ്പൺഹൈമർ സിനിമ ലോക പ്രേക്ഷകരിൽ വല്ലാത്ത ഒരു തരം അസ്വസ്ഥത ഉളവാക്കുന്നു. അതാണ് ഈ സിനിമയുടെ വിജയവും. അഗ്നിയും കലാ രഹസ്യങ്ങളും സ്വർഗത്തിൽ നിന്ന് അപഹരിച്ചു, ഭൂമിയിലെ മനുഷ്യർക്ക് നൽകിയതിന് കിഴുക്കാം തൂക്കായ പാറയിൽ തൂക്കിയിട്ടു, നിത്യേന കഴുകനെക്കൊണ്ട് കരളു കൊത്തിപ്പറിപ്പിക്കയ്‌ക്കപ്പെടുന്ന ഗ്രീക് അർദ്ധദേവനാണ് പ്രോമിത്യുസ്. ഗ്രീക്ക് മിത്തിക്കൽ പ്രോമിത്യുസിനെ  മഹാഭാരതത്തിലെ കർണനെപ്പോലെ  പ്രതിനായകനായാണ്  അവതരിപ്പിക്കുന്നതെങ്കിലും  ഇരുവരും നായകരേക്കാൾ ഉന്നതിയിലേയ്‌ക്  ഉയർത്തപ്പെടുന്നുണ്ടല്ലോ.

ഓപ്പെൻഹൈമറേയും ലോക മനസ്സിൻറെ പാതാളത്തിലേയ്‌ക് ചവിട്ടി താഴ്ത്താതിരിക്കാൻ ക്രിസ്റ്റഫർ നോളൻ ശരിക്കും ശ്രമിച്ചെങ്കിലും ആ  ചലച്ചിത്രകാരന്റെ ആത്മാവ് അതിനു അനുവദിക്കുന്നില്ല. എന്നാൽ പ്രതിനായകനിൽ നിന്നും നായകനായി ഒപ്പെൻഹൈയ്‌മറെ ഉയർത്തിയെടുക്കാൻ സിലിയൻ മർഫിയുടെ അഭിനയ സിദ്ധിക്കു കഴിയുന്നു.

സിനിമയിൽ കാണിക്കുന്ന അമേരിക്കൻ ജനക്കൂട്ടത്തിനു മറ്റു മനുഷ്യരോടുള്ള  ഹിംസാത്മത കണ്ടാൽ ഏതൊരാളുടേയും മനസ്സ്  മരവിച്ചു പോകും. ജപ്പാനിലെ ഹിരോഷിമ, നാഗസാക്കി നഗരങ്ങളിൽ 1945 ആഗസ്‌ത് 6, 9 തീയതികളിൽ അമേരിക്ക അണുബോംബുകൾ വർഷിച്ചത്  മാനവരാശിയുടെ ഹൃദയത്തിൽ ഇന്നും അതിഘോരമായ  ഇടിത്തീയായി എരിഞ്ഞിറങ്ങുകയാണ്. ബോംബു സ്‌ഫോടനത്തിൽ രണ്ടരലക്ഷം ആളുകൾ ഞൊടിയിടയിൽ  കൊല്ലപ്പെട്ടു,  നിരായുധരായ മനുഷ്യർ. എട്ടു പതിറ്റാണ്ടുകൾ കഴിഞ്ഞിട്ടും അണുവികിരണങ്ങളാൽ വിത്തുകോശങ്ങളിൽ, ജനിതകഭ്രംശം ഭവിച്ച ലക്ഷക്കണക്കിന്  ജന്മങ്ങൾ.

ഭൂലോക കൂട്ടകൊലയാളിയെ പെറ്റു വളർത്തി, ആണവ അഗ്നിശാസ്‌ത്രം അഭ്യസിപ്പിച്ചു, ആയുധം ഉണ്ടാക്കിച്ചു, മാനവരാശിയെ കൊന്നൊടുക്കാനും ദാർശനികമായി അയാളെ അതിനു സജ്ജമാക്കാനും ശ്രമിക്കുന്നതായിരുന്നു അമേരിക്കൻ ഭരണ കൂടത്തിന്റെ മാനസിക നില. വൻ ലോകദുരന്തം  മുൻകൂട്ടി അറിയാമായിരുന്ന ഒരു വിജ്ഞാനസമൂഹവും, അവരെ കയ്യടിച്ചു അഭിനന്ദിക്കുന്ന ജനതയും, രക്ഷിതാവായി ഭരണകൂടവും, ഇല്ലാത്ത അജ്ഞാത ശത്രുവിനെ തിരയുന്ന നിയമ വിചാരകരും. ഇവരെ എല്ലാവരെയും തൊലിയുരിച്ചു കാണിക്കാൻ ക്രിസ്റ്റഫർ നോളനു കഴിഞ്ഞിരിക്കുന്നു.

ശാസ്‌ത ലോകത്തെ ഏറ്റവും മാരകമായ കണ്ടുപിടിത്തമായിരുന്ന ആറ്റംബോംബിന്റെ പിതാവായ ജൂലിയസ് റോബർട്ട് ഓപ്പൻ ഹൈമറെ 1954-ൽ  സഹപ്രവർത്തകരും ശാസ്‌ത്രലോകവും   രൂക്ഷമായി വിമർശിക്കുകയും അപമാനിക്കുകയും ചെയ്യുകയാണ് സിനിമയിൽ. അതിനു മുൻപുള്ള ഒമ്പത് വർഷക്കാലം അമേരിക്കയിൽ  ഏറ്റവും വലിയ സെലിബ്രിറ്റിയായിരുന്ന ഓപ്പൻ ഹൈമറെ സഹപ്രവർത്തകർ  സംഘം ചേർന്നു വിചാരണയ്‌ക്കും അപമാനത്തിനും ഇരയാക്കുന്നു. അയാളുടെ സുരക്ഷാസംവിധാനങ്ങൾ  അധികാരികൾ പിൻവലിക്കുന്നു. ഒരു രാജ്യം ലോക ജനതയോടു  ചെയ്‌ത കൊടും ക്രൂരതയുടെ ഉത്തരവാദിത്തം ഒരു ശാസ്‌ത്രജ്ഞനിൽ മാത്രം കേന്ദ്രീകരിക്കാൻ ശാസ്‌ത്ര‌ജ്ഞരും പൊതുസമൂഹവും ഒരുമ്പെടുന്നു.

ഹിരോഷിമയിലും നാഗസാക്കിയിലും ആയിരവും പതിനായിരവുമല്ല നിമിഷങ്ങൾക്കകം ബോംബുതീയിൽ എരിഞ്ഞുപോയത് എന്ന ഔദ്യോഗിക കണക്കുകൾ വന്നപ്പോൾ ഹൈമർ അത്യന്തം വിഷമവൃത്തത്തിലകപ്പെടുന്നു. ഇരകളോട് അഗാധമായ സഹാനുഭൂതി അദ്ദേഹത്തിനുണ്ടാവുന്നു. രണ്ട് ബോംബും വർഷിക്കപ്പെട്ടശേഷം വിഷാദത്തിന്റെ ഇരുട്ടറകളിലേക്ക് ഹൈമർ കൂപ്പുകുത്തുന്നു. പക്ഷേ വിഷാദത്തിൽ നിന്നും മോചിതനാവേണ്ടത് തന്റെ മാത്രം ബാധ്യതയാണെന്നു തിരിച്ചറിഞ്ഞു അയാൾ സാധാരണജീവിതം നയിക്കാൻ ശ്രമിക്കുന്നു.

ഓപ്പൺ ഹൈമറിന്റെ  പൂർവ ചരിത്രം വിവരിച്ചു കൊണ്ടാണ് സിനിമ പുരോഗമിക്കുന്നത്. യു.കെ.യിലെ കാവൻഡിഷ് ലബോറട്ടറിയിൽ 1926-ൽ, 22-കാരനായ ജെ റോബർട്ട് ഓപ്പൺഹൈമർ, പാട്രിക് ബ്ലാക്കെറ്റിന് കീഴിൽ പഠിക്കുമ്പോൾ ഗൃഹാതുരത്വവും ഉത്കണ്ഠയും അനുഭവിക്കുന്നു. ചില സന്ദർഭങ്ങൾ ഇതിനായി കാണിക്കുന്നുണ്ട്. ഓപ്പൺഹൈമർ  തന്നെ ശിക്ഷിച്ച പ്രൊഫ. ബ്ലാക്കെറ്റ്  കഴിക്കും എന്ന് കരുതി  വിഷം കലർന്ന ആപ്പിൾ ലബോറട്ടറിയിലെ  മേശ പുറത്തു  ഉപേക്ഷിക്കുന്നു, അവിടെ സന്ദർശിക്കുന്ന മറ്റൊരു ശാസ്‌ത്രജ്ഞൻ ഓപ്പൺഹൈമർ തടയുന്നതിന് മുമ്പ്  ആപ്പിൾ കഴിക്കുന്നു.

ഓപ്പൺ ഹൈമർ പിഎച്ച്ഡി പൂർത്തിയാക്കുന്നു. അതിനു ശേഷം ജർമ്മനിയിലെ ഗോട്ടിംഗൻ സർവകലാശാലയിൽ പ്രശസ്‌ത ഭൗതികശാസ്‌ത്രജ്ഞനായ വെർണർ ഹൈസൻബെർഗിനൊപ്പം ജോലി ചെയ്യുന്നു. അവിടെ  ക്വാണ്ടം ഭൗതികശാസ്‌ത്രത്തെക്കുറിച്ചുള്ള ഗവേഷണങ്ങളുടെ അഭാവത്തിൽ അമേരിക്കയിലേക്ക് മടങ്ങുന്നു. പിന്നെ കാലിഫോർണിയ സർവകലാശാലയിൽ പഠിപ്പിക്കുന്നു, അതേസമയംതന്നെ കാലിഫോർണിയ ഇൻസ്റ്റിറ്റ്യൂട്ട് ഓഫ് ടെക്‌നോളജിയിലും പഠിപ്പിക്കുന്നു.

ഇതിനിടെ 1939-ലെ നോബൽ സമ്മാന ജേതാവ് ഏണസ്റ്റ് ലോറൻസിനെയും സുപ്രധാന വ്യക്തികളേയും കണ്ടുമുട്ടുന്നു. കമ്മ്യൂണിസ്റ്റ് പാർട്ടി  അംഗമായിരുന്ന  ജീൻ ടാറ്റ്‌ലോക്കുമായി അവർ ആത്മഹത്യ ചെയ്യുന്നത് വരെ അയാൾക്ക് അഗാധമായ പ്രണയബന്ധം ഉണ്ടായിരുന്നു. പിന്നീട് ഭാര്യയായ ജീവശാസ്‌ത്രജ്ഞ കാതറിൻ പ്യൂണിംഗും കമ്മ്യൂണിസ്‌റ്റ്‌ ആയിരുന്നു.

രണ്ടാം ലോകയുദ്ധത്തിൽ ജർമ്മനി കീഴടങ്ങുമ്പോൾ, ചില ശാസ്‌ത്രജ്ഞർ പദ്ധതിയുടെ പ്രാധാന്യത്തെ ചോദ്യം ചെയ്യാൻ തുടങ്ങുന്നു; എന്നിരുന്നാലും, അത് പരിഗണിക്കാതെ തന്നെ അയാൾ പരീക്ഷണം  തുടരുന്നു, പോട്സ്‌ഡാം കോൺഫറൻസിന് തൊട്ടുമുമ്പ് ട്രിനിറ്റി ടെസ്റ്റ് വിജയകരമായി നടത്തുന്നു.. യുഎസ് പ്രസിഡന്റ്  ട്രൂമാൻ ജപ്പാനിലെ ഹിരോഷിമയിലും നാഗസാക്കിയിലും അണുബോംബ് വർഷിക്കാൻ ആജ്ഞാപിക്കുന്നു.

ഓപ്പൺഹൈമറെ രാഷ്‌ട്രീയത്തിൽ നിന്ന് നീക്കം ചെയ്യാൻ ഉദ്ദേശിച്ചുള്ള ഒരു ഹിയറിംഗ്  നടക്കുകയാണ്. അദ്ദേഹത്തിന്റെ കമ്മ്യൂണിസ്റ്റ് ബന്ധങ്ങളും ടാറ്റ്‌ലോക്കുമായുള്ള ബന്ധവും അയാളെ  മാപ്പിൽ നിന്നും  ഒഴിവാക്കുന്നു. അയാളെ കുറ്റവാളിയായി മുദ്രകുത്തി  നാവടപ്പിക്കുന്നു. ഓപ്പൺഹൈമറിനെതിരായ സ്ട്രോസിന്റെ വ്യക്തിപരമായ ആവലാതികളും അയാളുടെ  തകർച്ചയിൽ വ്യക്തിപരമായപങ്കും അവർ അടിച്ചേൽപ്പിക്കുന്നു.

ക്രിസ്റ്റഫർ നോളൻ തുറന്നുവിട്ട ഓപ്പൺ ഹെയ്‌മർ എന്ന സിനിമാ ഭൂതത്തിലൂടെ, ലോക മനസാക്ഷിയെ പിടിച്ചുലച്ച ആറ്റംബോംബിന്റെ പിതാവ്  ഓപ്പൺഹൈമറുടെ ജീവിതവും അമേരിക്കൻ മക്കാർതീയിവും കമ്മ്യൂണിസ്റ്റ് വേട്ടയാടലും, ചുവപ്പു വെറിയും വീണ്ടും ലോകം ചർച്ച ചെയ്യുകയാണ്.

ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.