വന്ദേ സാധാരൺ എറണാകുളം – ഗുവാഹത്തി റൂട്ടിൽ?

മാർക്കറ്റ് കാനിബലൈസേഷൻ

നിലവിൽ വന്ദേ ഭാരത് ട്രെയിൻ ഓടുന്നത് കേരളത്തിന്റെ തെക്കുനിന്ന് വടക്കുവരെ എന്ന നിലയിലാണ്. ഇനിയൊരു സർവ്വീസ് വടക്കുനിന്ന് തെക്കോട്ടും വരുമെന്നാണ് പ്രതീക്ഷിക്കപ്പെടുന്നത്. ഇന്ത്യയിലെ ഏറ്റവും മികച്ച വന്ദേ ഭാരത് റൂട്ടുകളിലൊന്നാണ് കേരളത്തിലേത്. മികച്ച പ്രതികരണമാണ് ഉപയോക്താക്കളിൽ നിന്ന് ഈ ട്രെയിനിന് ലഭിക്കുന്നത്. ഈ റൂട്ടിൽ വന്ദേ സാധാരൺ ട്രെയിൻ അവതരിപ്പിക്കാൻ റെയിൽവേ തയ്യാറാകാത്തതിന് മറ്റൊരു കാരണംകൂടിയുണ്ട്. ദീർഘദൂര പാതകളിലാണ് വന്ദേ സാധാരൺ കൊണ്ടുവരാനുദ്ദേശിക്കുന്നത്.

നിലവിൽ മികച്ച രീതിയിൽ നീങ്ങുന്ന ഒരു പ്രോഡക്ടിന്റെ സാധ്യതകളെ ഇല്ലാതാക്കുന്ന മറ്റൊരു പ്രോഡക്ട് ഒരേ നിർമ്മാതാവ് ഇറക്കുന്നതിനെയാണ് മാർക്കറ്റ് കാനിബലൈസേഷൻ എന്ന് വിളിക്കുക. വന്ദേ ഭാരത് റൂട്ടുകളിൽ വന്ദേ സാധാരൺ അവതരിപ്പിച്ചാൽ മാർക്കറ്റ് കാനിബലൈസേഷൻ സംഭവിക്കാനുള്ള സാധ്യത കൂടുതലാണ്. വന്ദേഭാരതിന് നല്ല തിരക്കുള്ള റൂട്ടുകളിൽ വന്ദേ സാധാരൺ കൊണ്ടുവരുന്നത് റെയിൽവേക്ക് നഷ്ടക്കച്ചവടമാകാനുള്ള സാധ്യതയുണ്ട്. ഉദാഹരണത്തിന്, ജനശതാബ്ധി പോലുള്ള ഹ്രസ്വദൂര ട്രെയിനുകൾക്ക് പകരമാകുന്ന വിധത്തിൽ വന്ദേ സാധാരൺ ട്രെയിൻ കൊണ്ടുവന്നാൽ അത് അതേ റൂട്ടിലെ വന്ദേ ഭാരതിന്റെ യാത്രക്കാരുടെ എണ്ണം കുറയ്ക്കും. വന്ദേ ഭാരതിൽ യാത്ര ചെയ്യുന്ന വലിയൊരു വിഭാഗമാളുകൾ വന്ദേ സാധാരണിലേക്ക് മാറും.

സാധാരണക്കാർ‌ക്കു കൂടി അതിവേഗതയിൽ ലക്ഷ്യസ്ഥാനങ്ങളിൽ എത്തിച്ചേരാൻ അവസരമുണ്ടാക്കുന്നു എന്നതാണ് വന്ദേ സാധാരൺ ട്രെയിനുകളുടെ പ്രത്യേകത. വന്ദേ ഭാരതിലെപ്പോലെ ഏസി കോച്ചുകളല്ല വന്ദേ സാധാരണിൽ ഉണ്ടാവുക. എന്നാൽ, മറ്റ് സൗകര്യങ്ങൾ മിക്കതും വന്ദേ ഭാരതിൽ ലഭ്യമാകും. വേഗതയും സമാനമായിരിക്കും. തൽക്കാലം ഏസി വേണ്ട, വേഗത മാത്രംമതി എന്ന് ഇടത്തരക്കാരിൽ വലിയൊരുവിഭാഗം ചിന്തിക്കാനുള്ള സാധ്യത കൂടുതലാണ്.

കേരളത്തിൽ‌ സാധ്യതയുള്ള റൂട്ടുകൾ?

വലിയ തിരക്കുള്ള റൂട്ടുകളായി മാറിയിരിക്കുകയാണ് വടക്കുകിഴക്കൻ സംസ്ഥാനങ്ങളിൽ നിന്ന് കേരളത്തിലേക്കുള്ള പാതകൾ. ഈ റൂട്ടുകളിൽ വന്ദേ ഭാരത് ട്രെയിനുകൾ പ്രായോഗികമല്ല. കൂടുതൽപ്പേരും സാധാരണ തൊഴിലാളികളാണ്. ഇവരെ ഉൾക്കൊള്ളാൻ കഴിയുന്ന തരത്തിൽ ടിക്കറ്റ് വില നിശ്ചയിച്ച് വന്ദേ സാധാരണിന് ഓടാൻ കഴിഞ്ഞാൽ അത് വലിയ മാറ്റം കൊണ്ടുവരും.

ചില സ്ഥിരീകരിക്കാത്ത റിപ്പോർട്ടുകൾ സൂചിപ്പിക്കുന്നത് എറണാകുളം മുതതൽ ഗുവാഹത്തി വരെയുള്ള പാതയിൽ വന്ദേ സാധാരൺ ട്രെയിൻ ഓടിക്കുമെന്നാണ്. വന്ദേ സാധാരണിന് വളരെ സാധ്യതയുള്ള റൂട്ടാണിത് എന്നതൊരു വസ്തുതയാണ്. കേരളവുമായി കണക്ട് ചെയ്ത് വന്ദേ സാധാരണിന് ഓടാൻ കഴിയുന്ന പാതകളിൽ ഒന്നാംസ്ഥാനവും ഈ പാതയ്ക്ക് ലഭിക്കും. അത്രയേറെ അതിഥിത്തൊഴിലാളികൾ ഈ പാത ഉപയോഗിക്കുന്നുണ്ട്.

കന്യാകുമാരിയിൽ നിന്ന് ദിബ്രുഗഡ് വരെ ഓടുന്ന വിവേക് എക്സ്പ്രസ് 80 മണിക്കൂറെടുത്താണ് ലക്ഷ്യസ്ഥാനത്തെത്തുന്നത്. ഇന്ത്യയിലെ ഏറ്റവും ദൈർഘ്യമുള്ള ട്രെയിൻ യാത്രകൂടിയാണിത്. ഈ പാതയില്‍ വന്ദേ സാധാരൺ വന്നാൽ യാത്രാസമയം ഗണ്യമായി കുറയുകയും തൊഴിലാളികൾ കൂട്ടത്തോടെ അതിലേക്ക് മാറുകയും ചെയ്യാൻ സാധ്യത കൂടുതലാണ്. ടിക്കറ്റ് നിരക്ക് അൽപ്പം കൂടിയാലും ലാഭിക്കുന്ന അധികസമയംകൊണ്ട് അവർക്കത് ക്രമപ്പെടുത്താൻ സൗകര്യം ലഭിക്കും.

അതെസമയം വന്ദേ സാധാരൺ ട്രെയിൻ തിരുവനന്തപുരത്തുനിന്ന് തുടങ്ങുന്നത് റെയിൽവേക്ക് നഷ്ടമുണ്ടാക്കാനിടയുണ്ട്. തിരുവനന്തപുരം മുതൽ പാലക്കാട് വരെയുള്ള പാതയിൽ ഈ ട്രെയിൻ വന്ദേ ഭാരതിന്റെ യാത്രക്കാരെ വലിച്ചെടുക്കും. ഇക്കാരണത്താൽ എറണാകുളത്തു നിന്ന് തുടങ്ങുന്ന രീതിയിൽ ക്രമീകരിക്കുന്നതിനാണ് റെയിൽവേ പരിഗണിക്കുക.

അത്യാവശ്യം തിരക്കുള്ള മറ്റൊരു ട്രെയിൻ റൂട്ട് തിരുവനന്തപുരത്തു നിന്ന് ഹൈദരാബാദ് വരെ പോകുന്ന ശബരി എക്സ്പ്രസ്സാണ്. എന്നാൽ വന്ദേഭാരത് സ്ലീപ്പറിന് വലിയ സാധ്യതയുള്ള റൂട്ടുകളിലൊന്നാണിത്. ബാംഗ്ലൂരിലേക്കുള്ള പാതകളുടെ കാര്യവും സമാനമാണ്. തിരക്കുള്ള പാതയാണെങ്കിലും വന്ദേഭാരതിന്റെ സ്ലീപ്പർ പതിപ്പ് ഓടിക്കാൻ കഴിയും ഇവിടെ. വരുംനാളുകളിൽ ഇത്തരമൊരു മാറ്റം ഉറപ്പുമാണ്.