Authored by പ്രണവ് മേലേതിൽ | Samayam Malayalam | Updated: 7 Aug 2023, 1:58 pm
അയോധ്യയിലെ രാമക്ഷേത്രത്തിനായി 400 കിലോ തൂക്കമുള്ള പൂട്ട് നിർമ്മിച്ചിരിക്കുകയാണ് ഉത്തർപ്രദേശിലെ ഒരു ലോഹപ്പണിക്കാരൻ. ഈ പൂട്ട് രാമക്ഷേത്രത്തിന് സംഭാവന ചെയ്യാനാണ് ഇദ്ദേഹത്തിന്റെ താൽപ്പര്യം.
ഏതാണ്ട് രണ്ട് ലക്ഷത്തോളം രൂപ ചെലവിട്ടാണ് ഇദ്ദേഹം പൂട്ട് നിർമ്മിച്ചിരിക്കുന്നത്. ലോക്കിനുമേൽ ശ്രീരാമചന്ദ്രന്റെ ചിത്രം ആലേഖനം ചെയ്തിട്ടുണ്ട്. ഇതൊരു സമ്മാനമായി ക്ഷേത്രത്തിന് നൽകാനാണ് അദ്ദേഹം ആഗ്രഹിക്കുന്നത്. അതെസമയം ഈ പൂട്ട് സമ്മാനമായി സ്വീകരിക്കുന്നതിനെക്കുറിച്ച് ക്ഷേത്രം ട്രസ്റ്റിന്റെ ഭാഗത്തുനിന്ന് അനുകൂലമായ പ്രതികരണമൊന്നും വന്നിട്ടില്ല. ശ്രീ രാം ജന്മഭൂമി തീർത്ഥ ക്ഷേത്ര ട്രസ്റ്റാണ് ക്ഷേത്രഭരണാധികാരികൾ.
ട്രസ്റ്റിന്റെ അംഗങ്ങളിലൊരാളായ ഡോ. അനിൽ മിശ്രയെ ബന്ധപ്പെട്ടപ്പോൾ ഇക്കാര്യത്തിൽ തനിക്ക് ഒറ്റയ്ക്കൊരു തീരുമാനം പറയാനാകില്ലെന്നും മറ്റ് ട്രസ്റ്റ് അംഗങ്ങളോട് ചർച്ച ചെയ്യേണ്ടതുണ്ടെന്നുമാണ് മറുപടി നൽകിയത്.
തന്റെ കുട്ടിക്കാലം മുതൽക്കുതന്നെ പൂട്ടുകൾ നിർമ്മിക്കുന്ന ജോലി ചെയ്തുവരികയാണ് സത്യപ്രകാശ് ശർമ്മ. ഇപ്പോൾ നിർമ്മിച്ച പൂട്ടിന് ഇനി ചില മിനുക്കുപണികൾ കൂടിയുണ്ട്. ഇതിനായി വെങ്കലം പോലുള്ള ദ്രവ്യങ്ങൾ ആവശ്യമാണ്. ആരെങ്കിലും അവ വാങഅങാൻ സാമ്പത്തികമായി സഹായിക്കുമെന്നാണ് സത്യപ്രകാശിന്റെ പ്രതീക്ഷ. തന്റെ വീടിനു മുന്നിൽത്തന്നെയാണ് സത്യപ്രകാശ് പൂട്ട് വെച്ചിരിക്കുന്നത്.
അതെസമയം ഭക്തരിൽ നിന്ന് ശ്രീരാം ജന്മഭൂമി ട്രസ്റ്റ് സംഭാവനകൾ വഴിപാടായി സ്വീകരിക്കുന്നുണ്ട്. ക്ഷേത്രത്തിലെ പ്രതിഷ്ഠാ ചടങ്ങ് നടക്കുക അടുത്തവർഷം ജനുവരി മാസത്തിലാണ്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
