‘എനിക്ക് 49 വയസ്സേ ആയിട്ടുള്ളൂ; അമ്മൂമ്മയെന്ന് വിളിക്കുന്നതിൽ സന്തോഷം’: സൈബർ ആക്രമണത്തിനെതിരെ ശോഭാ സുരേന്ദ്രൻ

ഇപ്പോൾ തനിക്കെതിരെ ആക്രമണം കൂടി വരികയാണെന്നും ശോഭാ സുരേന്ദ്രൻ പറഞ്ഞു. താനിപ്പോൾ എതിർത്തു നിൽക്കുന്നത് സമൂഹത്തിലെ വലിയ പ്രമാണിമാരോടാണ്. അഴിമതിക്കെതിരെ പോരാട്ടം നടത്തുമ്പോൾ തന്നെ കിടത്തിയുറക്കാതിരിക്കാൻ കഴിവുള്ള ശക്തികൾ പിറകിലുണ്ടെന്ന് തനിക്കുറപ്പാണെന്നും അവർ വ്യക്തമാക്കി.

കോഴിക്കോട് ജില്ലയുടെ പ്രഭാരിയായി നിയമിക്കപ്പെട്ട ശോഭാ സുരേന്ദ്രൻ തന്നിലേൽപ്പിച്ച ഉത്തരവാദിത്വം നിറവേറ്റുമെന്ന് പ്രസ്താവിച്ചു. കേന്ദ്ര നേതൃത്വത്തിന്റെ സമ്മർദ്ദത്തിനു വഴങ്ങിയാണ് സംസ്ഥാന നേതൃത്വം പ്രഭാരിസ്ഥാനം ശോഭയ്ക്ക് നൽകിയത്. ഔദ്യോഗിക പക്ഷത്തെ പിന്തുണയ്ക്കുന്ന മണ്ഡലങ്ങളിൽ ശോഭാ സുരേന്ദ്രന് ഇടംനല്കാൻ നേതൃത്വം തയ്യാറായില്ലെന്ന് റിപ്പോർട്ടുകളുണ്ട്. ഒടുവിലാണ് കോഴിക്കോട് ജില്ലയുടെ പ്രഭാരിയായി ശോഭ നിയമിക്കപ്പെട്ടത്. എംടി രമേശിന്റെ പിന്തുണ ഇക്കാര്യത്തിൽ ശോഭയ്ക്കുണ്ടായിരുന്നു എന്നാണറിയുന്നത്. ജില്ലയുടെ ചുമതലയിൽ ഏറെക്കാലം ഇരുന്നിട്ടുള്ളയാളാണ് എംടി രമേശ്. ശോഭാ സുരേന്ദ്രനോട് പ്രത്യേകം അനുഭാവമൊന്നുമില്ലെങ്കിലും കെ സുരേന്ദ്രനെതിരെ നിൽക്കുന്നയാൾ എന്ന നിലയിലുള്ള അടുപ്പം അദ്ദേഹത്തിനുണ്ട്. കൂടാതെ വരുന്ന തിരഞ്ഞെടുപ്പിൽ കോഴിക്കോട് സ്ഥാനാർത്ഥിയാകാൻ സാധ്യതയുള്ളയാൾകൂടിയാണ് രമേശ്.