വരാനിരിക്കുന്ന വന്ദേ ഭാരത് ട്രെയിനുകൾ: ഇരുന്നൂറോളം സര്‍വ്വീസുകൾ; പുതിയ റൂട്ടുകൾ

ശ്രുതി

രാജ്യത്ത് വന്ദേഭാരത് ട്രെയിനുകളുടെ ശ്യംഖല സൃഷ്ടിക്കാനൊരുങ്ങുകയാണ് കേന്ദ്രസര്‍ക്കാര്‍. കഴിഞ്ഞ മെയ് മാസത്തില്‍ രാജ്യത്താകെ 75 വന്ദേഭാരത് ട്രെയിനുകള്‍ പുറത്തിറക്കുമെന്ന് റെയില്‍വേ മന്ത്രാലയം പറഞ്ഞിരുന്നു. ബജറ്റ് പ്രസംഗത്തില്‍ നിര്‍മല സീതാരാമനും ഇക്കാര്യം പറഞ്ഞിരുന്നു. സ്വാതന്ത്ര്യദിനമായ ആഗസ്ത് 15നകം ഇത്രയും ട്രെയിനുകള്‍ പുറത്തിറാക്കാനായിരുന്നു ലക്ഷ്യമിട്ടതും. എന്നാല്‍ ഇത് അപ്രയോഗികമാണെന്ന് അന്നുതന്നെ പലകോണുകളില്‍ നിന്ന് പ്രതികരണമുയര്‍ന്നിരുന്നു. പരമാവധി 17 വന്ദേഭാരത് ട്രെയിന്‍ ആ സമയത്തേക്ക് ട്രാക്കിലിറക്കാന്‍ സാധിച്ചേക്കുമെന്നും വിലയിരുത്തലുകളുണ്ടായി. പിന്നീട് ഇതുമായി ബന്ധപ്പെട്ട് പ്രസ്താവന നടത്തിയത് കേന്ദ്ര റെയില്‍വേ മന്ത്രി അശ്വിനി വൈഷ്ണവ് ആണ്. അദ്ദേഹം പറഞ്ഞത് മുഴുവന്‍ സംസ്ഥാനങ്ങളിലും വന്ദേ ഭാരത് ട്രെയിന്‍ സമര്‍പ്പിക്കാനാണ് ലക്ഷ്യമിടുന്നതെന്നാണ്. പ്രധാനമന്ത്രി നരേന്ദ്ര മോദിയുടെ സ്വപ്‌നമാണിതെന്നും മന്ത്രി പറഞ്ഞിരുന്നു. കുറച്ച് പിന്നോട്ട് പോയി 2022ല്‍ എത്തിയാല്‍ 2025നകം 400ല്‍ക്കൂടുതല്‍ വന്ദേഭാരത് ട്രെയിനുകള്‍ രാജ്യത്തുണ്ടാകുമെന്ന് കേന്ദ്ര ബജറ്റ് പ്രഖ്യാപനങ്ങളിലൊന്നായി നിര്‍മല സീതാരാമനും വ്യക്തമാക്കി. എതായാലും വന്ദേഭാരത് ട്രെയിനുകള്‍ രാജ്യത്ത് കുടുതലായി എത്തുമെന്ന് ഉറപ്പായിട്ടുണ്ടല്ലോ. ഇന്ന് മിക്ക സംസ്ഥാനങ്ങളിലും ഇന്ന് വന്ദേഭാരത് ട്രെയിനുകള്‍ ഓടുന്നുണ്ട്. പുതിയ ട്രെയിനുകളാവട്ടെ അണിയറയില്‍ തയ്യാറായി വരികയുമാണ്. വരാനിരിക്കുന്ന വന്ദേഭാരത് ട്രെയിനുകളെ അടുത്തറിയാം ഇനി.

ചെന്നൈ-തിരുനെല്‍വേലി വന്ദേഭാരത്

കുറച്ചു ദിവസത്തിനകം രാജ്യത്തിന്റെ ഭാഗമായി തീരാന്‍ പോവുന്ന വന്ദേഭാരത് ട്രെയിനാണിത്. രാവിലെ 6ന് തിരുനെല്‍വേലിയില്‍ നിന്നു പുറപ്പെട്ട് ഉച്ചയ്ക്ക് രണ്ടിന് ചെന്നൈയില്‍ എത്തിചേരും ഈ ട്രെയിൻ. പ്രതിദിന സര്‍വീസുകളുടെ എണ്ണം രണ്ടാണ്. തിരുച്ചിറപ്പള്ളി, ഡിണ്ടിഗല്‍, മധുര റൂട്ടുകള്‍ കവര്‍ ചെയ്യുന്ന ഈ ട്രെയിന്‍ തമിഴ്‌നാട്ടിനകത്ത് മാത്രം സര്‍വീസ് നടത്തുന്ന രണ്ടാമത്തെ വന്ദേഭാരത് സര്‍വീസായി മാറും. ചെന്നൈ-മൈസൂരു, ചെന്നൈ-കോയമ്പത്തൂർ വന്ദേഭാരത് ട്രെയിനുകളാണ് നിലവില്‍ സര്‍വീസ് നടത്തുന്നവ.

പട്ന-ഹൗറ വന്ദേഭാരത്

അന്തിമ തീയ്യതി ഇനിയും തീരുമാനിച്ചിട്ടില്ലെങ്കിലും ഓഗസ്റ്റ് ആദ്യവാരം അല്ലെങ്കില്‍ രണ്ടാംവാരത്തില്‍ പട്നയ്ക്കും ഹൗറയ്ക്കുമിടയില്‍ ഒരു സെമി ഹൈസ്പീഡ് വന്ദേ ഭാരത് എക്സ്പ്രസ് ട്രെയിന്‍ ഓടിത്തുടങ്ങുമെന്നാണ് കേന്ദ്ര റെയില്‍വേ മന്ത്രാലയത്തിന്റെ റിപ്പോര്‍ട്ട്. ജൂണ്‍ 27ന് പട്ന-റാഞ്ചി റൂട്ടില്‍ വന്ദേഭാരത് ട്രെയിന്‍ ആരംഭിച്ചിരുന്നു. അതിനാല്‍ ബീഹാറിലേക്കുള്ള രണ്ടാമത്തെ വന്ദേ ഭാരത് എക്സ്പ്രസാണിത്. പട്ന-ഹൗറ വന്ദേഭാരത് രാജ്യത്തിന് സമര്‍പ്പിക്കുന്നതിന് മുന്നോടിയായി ഈസ്റ്റ് സെന്‍ട്രല്‍ റെയില്‍വേ റെയില്‍വേ ഉദ്യോഗസ്ഥരുമായി ഉന്നതതല യോഗം ചേര്‍ന്ന് കാര്യങ്ങള്‍ വിലയിരുത്തിയിരുന്നുവെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. അതുകൊണ്ടുതന്നെ ഉടനെ ഈ വന്ദേഭാരത് ട്രെയിനും ഓടിത്തുടങ്ങും.

പട്ന-ഹൗറ വന്ദേ ഭാരത് എക്സ്പ്രസ് മണിക്കൂറില്‍ 90-110 കിലോമീറ്റര്‍ വേഗതയില്‍ ഓടുകയാണെങ്കില്‍ ഏഴ് മണിക്കൂറില്‍ മൊത്തം 535 കിലോമീറ്റര്‍ ദൂരം പിന്നിടുമെന്നാണ് കണക്ക്. ട്രെയിനില്‍ എസി എക്സിക്യൂട്ടീവ് ക്ലാസിന് ഒരു യാത്രക്കാരന് 2,650 രൂപയും എസി ചെയര്‍ കാറിന് 1,450 രൂപയുമാണ് പ്രതീക്ഷിക്കുന്നത്. അസന്‍സോളിലും ജാസിദിഹിലും രണ്ട് സ്റ്റോപ്പുകള്‍ ഉണ്ടായിരിക്കുമെന്നും പറയപ്പെടുന്നുവെങ്കിലും സ്റ്റോപ്പുകള്‍ സംബന്ധിച്ച അന്തിമതീരുമാനം ഇനിയും വന്നിട്ടില്ല.

കച്ചെഗുഡ – യശ്വന്ത്പൂര വന്ദേഭാരത്

ഹൈദരാബാദില്‍ നിന്നും ബാംഗ്ലൂരിലെ യശ്വന്ത്പൂരിലേക്കുള്ള യാത്ര സുഗമമാക്കാന്‍ ലക്ഷ്യമിട്ട് ഈ മാസം വരുമെന്ന് പ്രതീക്ഷിക്കുന്ന വന്ദേഭാരത് എക്‌സ്പ്രസാണിത്. ഏഴ് മണിക്കൂറിനുള്ളില്‍ 610 കിലോമീറ്റര്‍ ഓടിയെത്തുകയാണ് ഇതിലൂടെ റെയില്‍വേ ലക്ഷ്യമിടുന്നത്. നിലവിലെ വേഗതയേറിയ ട്രെയിനായ തുരന്തോ എക്‌സ്പ്രസുമായി താരതമ്യം ചെയ്യുമ്പോള്‍ 2 മണിക്കൂര്‍ നേരത്തേ ലക്ഷ്യസ്ഥാനത്തെത്തും. കാച്ചെഗുഡ- യശ്വന്ത്പൂര വന്ദേഭാരതിന്റെ ട്രയല്‍ റണ്‍ ഇതിനകം ആരംഭിച്ചിട്ടുമുണ്ട്. കര്‍ണാടകയ്ക്കും തെലങ്കാനയ്ക്കുംവേണ്ടി കേന്ദ്രം ഒരുക്കുന്ന മൂന്നാമത്തെ വന്ദേ ഭാരത് എക്സ്പ്രസാണിതെന്ന പ്രത്യേകതയും ഉണ്ട്. രണ്ട് പ്രധാന ഐടി നഗരങ്ങളെ ബന്ധിപ്പിക്കുകയാണ് ഉദ്ദേശ്യം.

നാഗ്പൂര്‍-ഭോപ്പാല്‍ വന്ദേഭാരത്

നാഗ്പൂര്‍-ഭോപ്പാല്‍ വന്ദേഭാരത് ഉടന്‍ ആരംഭിക്കുമെന്നാണ് വിവരം. ഇതു സംബന്ധിച്ച പഠന റിപ്പോര്‍ട്ട് റെയില്‍വേ മന്ത്രാലയത്തിന് അയച്ചതായി ഡിവിഷണല്‍ റെയില്‍വേ മാനേജര്‍ തുഷാര്‍കാന്ത് പാണ്ഡെ വ്യക്തമാക്കുന്നു. നാഗ്പൂര്‍ റെയില്‍വേ സ്റ്റേഷനില്‍ നിന്ന് രാജ്യത്തിന്റെ വിവിധയിടങ്ങളിലേക്ക് ട്രെയിന്‍ സര്‍വീസുണ്ട്. നാഗ്പൂരില്‍ നിന്നുള്ള മിക്ക ട്രെയിനുകളിലും യാത്രക്കാരുടെ തിരക്കാണ്. ഇതിന് ഒരു പരിഹാരമായിട്ടാണ് പുതിയ വന്ദേഭാരത് ശുപാര്‍ശ ചെയ്തിരിക്കുന്നതെന്നും അദ്ദേഹം പറയുന്നു.

നാഗ്പൂര്‍- പൂനെ, ഹൈദരാബാദ് വന്ദേഭാരത്

നാഗ്പൂരില്‍ നിന്ന് പൂനെ, ഹൈദരാബാദ് എന്നിവിടങ്ങളിലേക്കും വന്ദേ ഭാരത് ട്രെയിനുകള്‍ ഉടന്‍ ആരംഭിക്കാന്‍ സാധ്യതയുണ്ട്. യാത്രക്കാരുടെ തിരക്കുമായി താരതമ്യം ചെയ്യുമ്പോള്‍ പൂനെ, ഹൈദരാബാദ് എന്നിവിടങ്ങളിലേക്ക് പോകുന്ന ട്രെയിനുകളുടെ എണ്ണം കുറവാണ്. അതിന് ഒരു പരിഹാരമായിരിക്കും പുതിയതായി വരുന്ന വന്ദേഭാരത് എന്നും വിലയിരുത്തുന്നു. അതേസമയം ഈ വന്ദേഭാരത് സര്‍വീസ് സംബന്ധിച്ച് അന്തിമ തീരുമാനം ആയിട്ടില്ല.

വരാനിരിക്കുന്നത് ഇരുന്നൂറിലധികം വന്ദേഭാരത് ട്രെയിനുകള്‍

കഴിഞ്ഞ ഏപ്രില്‍ മാസത്തിലാണ് റഷ്യന്‍ കമ്പനിയായ ട്രാന്‍സ്മാഷ്ഹോള്‍ഡിങ്, വന്ദേഭാരത് എക്സ്പ്രസ് ട്രെയിന്‍ നിര്‍മാണ കരാര്‍ ഇന്ത്യയില്‍ നിന്ന് നേടിയത്. 52,000 കോടി രൂപയുടെ ഈ കരാര്‍ പറയുന്നത് വന്ദേഭാരത് ട്രെയിനുകളുടെ കാലമാണെന്നാണ്. 120 ട്രെയിനിന്റെ നിര്‍മാണം, വിതരണം, പരിപാലനം എന്നിവയുമായി ബന്ധപ്പെട്ട കരാറാണ് കമ്പനി നേടിയത്. റെയില്‍ വികാസ് നിഗം ലിമിറ്റഡുമായി ചേര്‍ന്ന് ‘മേക്ക് ഇന്‍ ഇന്ത്യ’ പദ്ധതിയുടെ ഭാഗമായിട്ടാണ് ഇതിന്റെ നിര്‍മാണം നടക്കുക. ഇതോടെ വന്ദേഭാരത് ട്രെയിനുകള്‍ ഇനിയും രാജ്യത്ത് ഉണ്ടാകുമെന്ന് ഉറപ്പായിക്കഴിഞ്ഞു.

നിലവില്‍ കൂടുതല്‍ വന്ദേഭാരത് ട്രെയിന്‍ സര്‍വീസ് നടത്താനായി റൂട്ടുകള്‍ സംബന്ധിച്ച് പഠനം നടത്താന്‍ ഒരുങ്ങുകയാണ് റെയില്‍വേ. യാത്രയുടെ ആരംഭവും അവസാനവും എവിടെയെന്നതാണ് ആദ്യം കണ്ടെത്തുക. ശേഷം സ്‌റ്റോപ്പുകള്‍ പരിഗണിക്കും. നിരക്കിലെ ഉയര്‍ച്ച കാരണം ആദ്യഘട്ടത്തില്‍ ടൂറിസ്റ്റ് സ്ഥലങ്ങള്‍, ഐടി പാര്‍ക്കുകള്‍, നഗരങ്ങള്‍ എന്നീയിടങ്ങളിലേക്ക് ട്രെയിന്‍ സര്‍വീസ് നടത്തുന്നതിനുള്ള സാധ്യതകളാണു പരിശോധിക്കുക.

വന്ദേ ഭാരത് എക്സ്പ്രസിന്റെ അത്യാധുനിക രൂപകല്‍പ്പനയും, മെച്ചപ്പെട്ട യാത്രാനുഭവും വന്‍ സ്വീകാര്യത തന്നെയാണ് നേടിയിട്ടുള്ളത്. സുഗമവും ആസ്വാദ്യകരവുമായ യാത്ര ഉറപ്പാക്കുന്നതിനൊപ്പം യാത്രാസമയം കുറയ്ക്കുന്നതിലും ശ്രദ്ധ നല്‍കിയതാണ് അതിന്റെ ജനപ്രീതിക്ക് കാരണം. പലയിടത്തും സമയത്ത് എത്തിയില്ലെങ്കിലും യാത്രാസൗകര്യം ആളുകളെ വന്ദേഭാരതിന്റെ ആരാധാകരാക്കി മാറ്റുന്നു.