യുക്തിവാദി സംഘത്തിന്റെ ഏക സിവിൽകോഡ് സെമിനാറിൽ ബിജെപി നേതാവ്; പരിപാടിയിൽ നിന്ന് പിന്മാറി പ്രഭാഷകൻ

മോദി ആരാധനയുടെ പേരിൽ വാർത്തകളിൽ ഇടംപിടിച്ചിട്ടുള്ളയാളാണ് ടിപി സുൽഫത്ത്. വണ്ടൂര്‍ ഗ്രാമപഞ്ചായത്തിലെ ആറാം വാര്‍ഡിൽ ഇവർ ബിജെപി സ്ഥാനാർത്ഥിയായി മത്സരിച്ചിട്ടുമുണ്ട്. ‘ലവ് ജിഹാദ്’ തടയാൻ ഹിന്ദുക്കൾ കുട്ടികളെ മതം പഠിപ്പിക്കണമെന്ന് സുൽഫത്ത് അഭിപ്രായപ്പെട്ടത് വാർത്തയായിരുന്നു.

സെമിനാറിൽ നിന്ന് പിൻമാറുന്നത് അറിയിച്ച് അഡ്വ. ഷഹീൻ ഫേസ്ബുക്കിൽ പോസ്റ്റ് ചെയ്ത കുറിപ്പ്:

നാളെ ഏക സിവിൽ കോഡുമായി ബന്ധപ്പെട്ട് കേരള യുക്തിവാദി സംഘം നടത്തുന്ന സെമിനാറിൽ പങ്കെടുത്തു സംസാരിക്കണമെന്ന് ആവശ്യപ്പെട്ടിരുന്നതിന്റെ ഭാഗമായി പങ്കെടുക്കാമെന്ന് അറിയിച്ചിരുന്നതാണ്. എന്നാൽ പിന്നീട് പരിപാടിയിൽ പങ്കെടുക്കുന്നവരുടെ നോട്ടീസിൽ ബി ജെ പി യുടെ പ്രതിനിധിയെ കൂടി കണ്ടപ്പോൾ പ്രസ്തുത പരിപാടിയിൽ പങ്കെടുക്കാനുള്ള എന്റെ വിയോജിപ്പ് സംഘാടകരെ വിളിച്ച് അറിയിച്ചിട്ടുണ്ട്. വർഗീയ വാദികളുമായി വേദി പങ്കിടാനോ അവർക്ക് വിസിബിലിറ്റി കൊടുക്കുന്ന പരിപാടികളിൽ പങ്കെടുക്കുന്നതിനോ സഹകരിക്കേണ്ടതില്ലെന്നാണ് തീരുമാനം.

പ്രവർത്തിക്കുന്ന സംഘടനയുടെ പേര് പറയാൻ മടിച്ചിരുന്നിടത്ത് നിന്ന് അഭിമാനത്തോടെ വർഗീയ വാദിയാണെന്ന് പറയാനുള്ള ആത്മവിശ്വാസവും വിസിബിലിറ്റിയും അവർക്കുണ്ടാക്കിക്കൊടുത്തത് മാധ്യമങ്ങളടക്കമുള്ളവരാണ്. ബി.ജെ പി യെ സമാന്യവൽക്കരിക്കുന്ന ഒരു പരിപാടികളിലും ദയവ് ചെയ്ത് ക്ഷണിക്കരുതെന്ന് വിനയപൂർവ്വം അപേക്ഷിക്കുന്നു.