ഓണം ആണോ? എന്നാൽ തിരുവാതിരക്കളി മസ്റ്റാണ്

തിരുവാതിരയുടെ ഐതിഹ്യം

ധനുമാസത്തിലെ തിരുവാതിര നാളിലാണ് തിരുവാതിര ആഘോഷവും കൈകൊട്ടിക്കളിയുമെല്ലാം സാധാരണയായി അരങ്ങേറാറുള്ളത്. അന്നാണ് പരമ ശിവൻ്റെ ജന്മദിനവും. മലയാള തനിമ വിളിച്ചോതുന്ന കസവ് വസ്ത്രം ധരിച്ച സ്ത്രീകളും പെൺകുട്ടികളുമാണ് തിരുവാതിര കളിക്കുന്നത്. എട്ടോ പത്തോ സ്ത്രീകളായിരിക്കും ഇതിൽ ഉൾപ്പെടുന്നത്. രസകരമായ ചലനങ്ങളും ചുവടുകളുമാണ് തിരുവാതിരക്കളിയുടെ പ്രത്യേകത. വട്ടത്തിൽ നിന്നാണ് തിരുവാതിര കളിക്കുന്നത്. ഭാവപ്രകടനങ്ങൾ അമിതമായി വേണ്ടെങ്കിലും മുഖത്ത് പുഞ്ചിരി പ്രധാനമാണ്. മലയാളി മങ്കമാരെ പോലെ ഒരുങ്ങി അതിസുന്ദരികളായി ആയിരിക്കും പെൺകുട്ടികളും സ്ത്രീകളും എത്തുന്നത്.

മിക്ക സമയത്തും സ്വർണ്ണ കസവുള്ള സാരിയോ സെറ്റ് സാരിയോ സെറ്റ് മുണ്ടോ ആയിരിക്കും കളിക്കാരുടെ വേഷം. മുല്ലപ്പൂമാലയോ അല്ലെങ്കിൽ എന്തെങ്കിലും പൂവോ ചൂടിയിട്ടുണ്ടാകും. കൈയിൽ വളകളണിഞ്ഞും കണ്ണ് എഴുതിയും നല്ല മാലകളും അണിഞ്ഞായിരിക്കും ഒരുങ്ങുന്നത്. വാമൊഴിയായി കൈമാറി വന്നതാണ് തിരവാതിര കളിയുടെ മിക്ക പാട്ടുകളും എന്നതാണ് യാഥാർത്ഥ്യം. ഇപ്പോൾ പുതിയതായി പല പാട്ടുകളും തിരുവാതിരക്കളിയ്ക്കുണ്ട്. കൈ കൊട്ടുന്നത് തിരുവാതിര കളിയിലെ പ്രധാന ആംഗ്യമായതിനാൽ പലയിടത്തും കൈകൊട്ടി കളിയായും തിരുവാതിരയെ പറയാറുണ്ട്.

എങ്ങനെയാണ് പേര് വന്നത്?

തിരുവാതിര നാളിൽ വരുന്നത് കൊണ്ടാണ് തിരുവാതിരക്കളി എന്ന് പേര വന്നതെന്ന് പറയാം. ധനുമാസത്തിൽ പൗർണമി ദിവസം തിരുവാതിരനാൾ ഭക്തർക്ക് ഏറെ വിശേഷ ദിവസമാണ്. സ്ത്രീകൾ ആഘോഷിക്കുന്ന ഉത്സവം കൂടിയാണിത്. തീവ്ര തപസ്സിലായിരുന്ന പാർവ്വതിക്കു മുന്നിൽ പരമശിവൻ പ്രത്യക്ഷപ്പെട്ട് വിവാഹ വാഗ്ദാനം നൽകിയത് തിരുവാതിരനാളിലാണെന്നാണ് ഐതിഹ്യം.
ആഘോഷ മേളങ്ങളിലൊന്നായാണ് തിരുവാതിരക്കളിയുടെ വരവ്. സ്ത്രീകളും അവിവാഹിതരായ കന്യകമാരും ശുഭ്രവസ്ത്രം ധരിച്ച് പാതിരാപ്പൂ ചൂടി ആടുകയും പാടുകയും ചെയ്തിരുന്നു. ആ പാട്ടാണ് തിരുവാതിരക്കളിപ്പാട്ട്.

എന്തൊക്കെയാണ് പ്രത്യേകതകൾ?

പ്രത്യേകമായി തയാറാക്കിയ അരങ്ങിലാണ് തിരുവാതിരക്കളി നടത്തുന്നത്. ലാസ്യമാണ് ഇതിൻ്റെ പ്രധാനഭാവം. വീട്ട് മുറ്റത്ത് തിരുവാതിരക്കളിയ്ക്കായി ഒരു സ്ഥലം തയാറാക്കിയിട്ടുണ്ട്. വേഷവും അതുപോലെ അണിയുന്ന ആഭരണങ്ങളുമാണ് തിരുവാതിരക്കളിയുടെ മറ്റൊരു പ്രത്യേകത. നിലവിളക്ക് കൊളുത്തി വച്ച് അതിന് ചുറ്റും നിന്നാണ് തിരുവാതിരക്കളി നടത്തുന്നത്. നിറപറയും അഷ്ടമംഗല്യവും എല്ലാം നിലവിളക്കിനടുത്ത് വയ്ക്കുന്ന പതിവുണ്ട്. രണ്ടുപേർ പാട്ടുപാടാൻ മാത്രമായി മാറി നിലക്കും. വാദ്യഘോഷങ്ങളുടെ അകമ്പടി ഇല്ലാതെയാണ് പാട്ട് പാടുന്നത്.

പുളിയിലക്കരയിൽ കസവുചുറ്റിയുള്ള ഒന്നരമുണ്ടും നേര്യതുമായിരുന്നു പണ്ടൊക്കെ തിരുവാതിരക്കളികാർ ഉപയോഗിച്ചിരുന്നത്. എന്നാൽ വിവിധ നിറത്തിലും കരകളിലുമൊക്കെ സാരിയും സെറ്റും മുണ്ടുമൊക്കെ ലഭ്യമാണ്. മലയാളിത്തനിമ സൂക്ഷിക്കാൻ തിരുവാതിര കളിക്കുന്നവർ ശ്രദ്ധിക്കാറുണ്ട്. തലമുടി പുറകിൽ കെട്ടി ദശപുഷ്പങ്ങൾ, മുല്ലപ്പൂവ് എന്നിവ ചൂടുന്നതും തിരുവാതിരയിൽ പതിവാണ്. കറുക, കൃഷ്ണക്രാന്തി, തിരുതാളി, പൂവാംകുരുന്നില, കയ്യൂന്നി, മുക്കുറ്റി, നിലപ്പന, ഉഴിഞ്ഞ, ചെറൂള, മുയൽച്ചെവി എന്നിവയാണ് ദശപുഷ്പങ്ങൾ. വാലിട്ടു കണ്ണെഴുതിക്കൊണ്ടാകും സ്ത്രീകൾ കളിക്കാനെത്തുന്നതും എന്നതും പ്രത്യേകതയാണ്.

ഗംഗയുണർത്തുപാട്ട്, കളംതുടിപ്പാട്ട്, സ്തുതികൾ, ഊഞ്ഞാൽപ്പാട്ടുകൾ, താലോലംപാട്ട്, പൂമൂടൽപാട്ട്, തുമ്പിതുള്ളൽപാട്ട്, കൈകൊട്ടിക്കളിപ്പാട്ട്, കുമ്മിപ്പാട്ട് എന്നിങ്ങനെ തിരുവാതിരയുടെ അനുഷ്ഠാനങ്ങളുമായി ബന്ധപ്പെട്ട് നിരവധി പാട്ടുകളുമുണ്ട്. സീത, പാർവതി, ശകുന്തള, രുഗ്മിണി, സത്യഭാമ, ശീലാവതി എന്നീ പുരാണ കഥാപാത്രങ്ങളുടെ ചരിത്രമാണ് മിക്ക പാട്ടുകളുടെയും പിന്നിൽ. തിരുവാതിരപ്പാട്ടുകൾ രചിച്ചവരിൽ കുഞ്ചൻനമ്പ്യാർ മുതൽ വെണ്മണി നമ്പൂതിരിപ്പാടുവരെയുള്ളവരുമുണ്ട്.