ഓണം കളറാക്കാൻ തേങ്ങ വറുത്തരച്ച സാമ്പാർ തയാറാക്കാം

ആവശ്യമുള്ള ചേരുവകൾ

തുവരപരിപ്പ്
മുരിങ്ങക്കായ
കാരറ്റ്
ഉരുളക്കിഴങ്ങ്
സവാള
തക്കാളി
കുമ്പളങ്ങ
കറി വെള്ളരിക്ക
വെണ്ടയ്ക്ക
മഞ്ഞൾപ്പൊടി
കായപ്പൊടി
പുളി – നെല്ലിക്ക വലിപ്പത്തിലുള്ളത് വെള്ളത്തിൽ കുതിർത്തത്
മുളകപ്പൊടി
കടുക്
വെളിച്ചെണ്ണ
മല്ലിപ്പൊടി
സാമ്പാർ പൊടി

തേങ്ങ വറുത്തരയ്ക്കാൻ ആവശ്യമുള്ളവ

തേങ്ങ ചെരകിയത്, കൊച്ചുള്ളി, മല്ലിപ്പൊടി, മുളക് പൊടി, പച്ചമുളക്, വെളുത്തുള്ളി എന്നിവയാണ് ആവശ്യമായിട്ടുള്ളത്.

സാമ്പാർ തയാറാക്കാൻ

ആദ്യം പരിപ്പ് കഴുകി വ്യത്തിയാക്കി അൽപ്പം നേരം കുതിർക്കാൻ വയ്ക്കണം. അതിന് ശേഷം മുകളിൽ പറഞ്ഞിരിക്കുന്ന പച്ചക്കറികൾ അരിഞ്ഞ് എടുക്കുക. നിങ്ങൾക്ക് ഇഷ്ടമുള്ള പച്ചക്കറികൾ ആവശ്യാനുസരണം എടുക്കാവുന്നതാണ്. ഇനി പരിപ്പും പച്ചക്കറികളും ഒരു കുക്കറിലിട്ട് രണ്ടോ അല്ലെങ്കിൽ മൂന്നോ വിസിൽ അടിപ്പിച്ച് മാറ്റി വയ്ക്കുക. ചുവട് കട്ടിയുള്ള പാത്രത്തിലിട്ട് ആവശ്യത്തിന് വേവിച്ച് എടുത്താലും മതിയാകും. വെണ്ടയ്ക്ക എണ്ണയിലിട്ട് വാട്ടിയ ശേഷം മാത്രം ആയിരിക്കണം പച്ചക്കറികളിലേക്ക് ഇടാൻ. വെണ്ടയ്ക്കയുടെ വെള്ള പോലുള്ള ആ ഘടന മാറ്റാനാണ് ഇങ്ങനെ ചെയ്യുന്നത്. ആവശ്യത്തിന് ഉപ്പും അൽപ്പം മഞ്ഞൾപ്പൊടിയും ചേർത്ത് വേണം ഇത് വേവിക്കാൻ.

തേങ്ങ അരയ്ക്കാൻ

ഒരു കപ്പ് തേങ്ങയും രണ്ട് പച്ചമുളകും രണ്ടോ മൂന്നോ അല്ലി വെള്ളുത്തുള്ളി, രണ്ടോ മൂന്നോ ചുവന്നുള്ളിയും ചേർത്ത് നന്നായി വറുത്ത് എടുക്കുക. തേങ്ങ നിറം മാറി വരുമ്പോൾ അതിലേക്ക് അൽപ്പം മുളക് പൊടിയും മല്ലിപ്പൊടിയും സാമ്പാർ പൊടിയും അൽപ്പം കായപ്പൊടിയും ചേർത്ത് പച്ച മണം മാറുന്നത് വരെ ചൂടാക്കി എടുക്കാം. അതിന് ശേഷം ഇത് അൽപ്പം വെള്ളം ചേർത്ത് മിക്സിയിൽ അരച്ച് എടുക്കുക. ഇനി നേരത്തെ വേവിച്ച് വച്ചിരിക്കുന്ന സാമ്പാർ കഷണങ്ങളിലേക്ക് ഈ അരപ്പും പുളി പിഴിഞ്ഞ വെള്ളവും കൂടി ചേർക്കാവുന്നതാണ്. ഇത് നന്നായി തിളച്ച് വരുമ്പോൾ ഉപ്പിൻ്റെ പാകം നോക്കി കുറവാണെങ്കിൽ ചേർക്കാം.

താളിക്കാൻ

അൽപ്പം വെളിച്ചെണ്ണ ചൂടാകുമ്പോൾ അതിൽ കടുക് പൊടിച്ച് ചെറിയുള്ളി അരിഞ്ഞതും വറ്റൽ മുളകും കറിവേപ്പിലയും ചേർത്ത് ഇളക്കി സാമ്പാറിലേക്ക് ഒഴിച്ച് താളിക്കാവുന്നതാണ്. വളരെ എളുപ്പത്തിൽ സദ്യ തയാറാക്കാൻ കഴിയുന്ന ഒരു സിമ്പിൾ വറുത്തരച്ച സാമ്പാറിൻ്റെ കൂട്ടാണിത്.