പാലക്കാട് – കോയമ്പത്തൂർ മെട്രോ? കോവൈ മെട്രോയുടെ മൂന്നാംഘട്ടം പാലക്കാട്ടേക്ക്: ഇനി അന്തർസംസ്ഥാന മെട്രോകളുടെ കാലം

കോയമ്പത്തൂരിന്റെ ഈ പൊട്ടൻഷ്യൽ തിരിച്ചറിഞ്ഞ് തമിഴ്നാട് സർക്കാർ ഒരു മെട്രോ പദ്ധതിക്കുള്ള ഒരുക്കങ്ങൾ നടത്തുകയാണ്. മധുരൈയിലും കോയമ്പത്തൂരിലും മെട്രോ റെയിലുകൾ സ്ഥാപിക്കപ്പെടുമെന്ന് ഉറപ്പായിരിക്കുകയാണ്. കോയമ്പത്തൂർ മെട്രോയുടെ ഡിപിആർ ഈയിടെ സമർപ്പിക്കപ്പെടുകയുണ്ടായി. 9000 കോടി രൂപയാണ് കോയമ്പത്തൂർ മെട്രോ റെയിലിനായി (കോവൈ മെട്രോ) തമിഴ്നാട് സർക്കാർ അനുവദിച്ചിരിക്കുന്നത്. (മധുരൈ മെട്രോയ്ക്കു വേണ്ടി 8,500 കോടി രൂപയും.) കോവൈ മെട്രോയുടെ ഒന്നാമത്തെ ഘട്ടം 2027ൽ പൂർത്തിയാക്കാനാണ് സംസ്ഥാന സർക്കാർ നീക്കങ്ങൾ നടത്തുന്നത്.

ആദ്യമായി നീലമ്പൂരിലേക്കും സത്യമംഗലത്തേക്കും പോകുന്ന സ്ട്രച്ചുകളാണ് പണിയുക. സത്യമംഗലത്തേക്കുള്ള റെയിൽ 39 കിലോമീറ്റർ നീളത്തിലായിരിക്കും. നീലമ്പൂരിലേക്കുള്ളത് 23 കിലോമീറ്റർ നീളത്തിലും. അടുത്ത ഘട്ടങ്ങളിൽ ട്രിച്ചിയിലേക്കും പാലക്കാട്ടേക്കുമുള്ള സ്ട്രച്ചുകൾ പണിയും. ഈ ഘട്ടങ്ങളെക്കുറിച്ചുള്ള പ്രാഥമികമായ ആലോചന മാത്രമേ നടന്നിട്ടുള്ളൂ. പാലക്കാട്ടേക്കുള്ള റെയിലിന്റെ ആലോചനയ്ക്കു പിന്നിൽ ബെംഗളൂരു-കൊച്ചി ഇൻഡസ്ട്രിയൽ കോറിഡോർ തന്നെയാണ്. കോയമ്പത്തൂർ, മധുരൈ മെട്രോ പദ്ധതികൾ നാലോ അഞ്ചോ വർഷംകൊണ്ട് പൂര്‍ത്തീകരിക്കാനാണ് തമിഴ്നാട് സർക്കാർ ആലോചിക്കുന്നത്. ആദ്യത്തെ ഫേസിൽ നീലമ്പൂരിലേക്കും സത്യമംഗലത്തേക്കുമുള്ള പാതകൾ പണികഴിപ്പിക്കും. രണ്ടാമത്തെ ഘട്ടത്തിൽ മേട്ടുപ്പാളയം റോഡിലേക്കും ട്രിച്ചി റോഡിലേക്കുമുള്ള പാതകളാണ് പണിയുക. അതെസമയം പൊള്ളാച്ചിയിലേക്കും പാലക്കാട്ടേക്കുമുള്ള സ്ട്രെച്ചുകൾ മേൽപ്പറഞ്ഞ സ്ട്രെച്ചുകൾ പണി പൂർത്തിയായ ശേഷമേ നടക്കൂ എന്ന് ചെന്നൈ മെട്രോ റെയിൽ കോർപ്പറേഷൻ എംഡി എംഎ സിദ്ധിഖ് പറയുന്നു.

അന്തർസംസ്ഥാന മെട്രോ റെയിലുകളിലൂടെ പല നേട്ടങ്ങളുണ്ടാക്കാൻ കഴിയുമെന്ന നിലപാടിലാണ് തമിഴ്നാട് സർക്കാർ. കർണാടകത്തിൽ ബാംഗ്ലൂരിലെ ബൊമ്മസാന്ദ്രയിലേക്ക് ഹോസൂരിൽ നിന്ന് മെട്രോ കണക്ഷനുണ്ടാക്കാൻ സംസ്ഥാനം പദ്ധതിയിടുന്നുണ്ട്. ഇതിനോട് കർണാടകം മുഖംതിരിച്ചു നിൽക്കുന്നുണ്ടെങ്കിലും ഭാവിയിൽ അവർക്കതിന് വഴങ്ങേണ്ടി വരും. കാരമം, വ്യാപാരിസമൂഹം ഈ മെട്രോ കണക്ടിവിറ്റിക്ക് പിന്തുണ നൽകുന്നുണ്ട്. കേരളത്തിലേക്കും കോയമ്പത്തൂർ മെട്രോയുടെ കണക്ഷൻ വന്നുചേരുമെന്നുറപ്പ്.

പാലക്കാട്ടും സേലത്തും ഇൻഡസ്ട്രിയൽ കോറിഡോറുകൾ വരുന്ന സമയത്തിന് സമാന്തരമായിത്തന്നെ മെട്രോ റെയില്‍ സിസ്റ്റവും പ്രവർത്തിച്ചു തുടങ്ങണമെന്നാണ് തമിഴ്നാട് കരുതുന്നത്. അതിവേഗമുള്ള വളർച്ച സംഭവിക്കുമ്പോൾ ഉണ്ടാകാനിടയുള്ള ഒരു പ്രശ്നം വാഹനങ്ങളുടെ പെരുപ്പമാണ്. ടൂവീലറുകള്‍ അതിവേഗം പെരുകും. ചെറുകാറുകളുടെ ഉപയോഗവും വർദ്ധിക്കും. ‘ടൂവീലർ ബൂം’ സംഭവിക്കുന്നതിനു മുമ്പേതന്നെ ബദൽ സാധ്യതകൾ വെക്കാൻ കഴിഞ്ഞാൽ നഗരം എക്കാലത്തേക്കും ട്രാഫിക് ബ്ലോക്കുകളിലേക്ക് കടക്കുന്നത് തടയാനായേക്കും.

പാലക്കാട് കഞ്ചിക്കോട് 1774.5 ഏക്കർ ഭൂമിയിലാണ് വ്യവസായമേഖല സ്ഥാപിക്കുന്നത്. 10 വർഷംകൊണ്ട് 22,000 പേർക്ക് കേരളത്തിലെ രണ്ട് നോഡുകളിലായി (കൊച്ചി ഗിഫ്റ്റ് സിറ്റി ഉൾപ്പെടെ) നേരിട്ട് ജോലി ലഭിക്കും. പരോക്ഷമായി ഒരു ലക്ഷത്തോളം പേർക്ക് ജോലിയുണ്ടാകും. പാലക്കാട് വൻ നഗരവൽക്കരണ സാധ്യതയാണ് ഉരുത്തിരിയുന്നത്. ഇതുകൂടി മുന്നിൽക്കണ്ടാണ് കോയമ്പത്തൂർ മെട്രോയുടെ ഒരു റീച്ച് പാലക്കാട്ടേക്ക് ആസൂത്രണം ചെയ്യുന്നത്.

ഇൻഡസ്ട്രിയൽ കോറിഡോറിന്റെ മറ്റൊരു നോഡ് വരുന്നത് കൊച്ചിയിലാണ്. ഗിഫ്റ്റ് സിറ്റി എന്നു പേരിട്ട ഈ മേഖലയ്ക്കായി അയ്യമ്പുഴയിൽ 358 ഏക്കർ സ്ഥലമാണ് ഏറ്റെടുക്കുന്നത്. തിരുവനന്തപുരത്തേക്ക് ഈ ഇടനാഴിയെ വ്യാപിപ്പിക്കണമെന്ന ആവശ്യം കേരളം മുന്നോട്ടുവെച്ചിട്ടുണ്ട്.