തിരുവോണ നാളില്‍ ആഹാരം മുതല്‍ വസ്ത്രത്തില്‍ വരെ ശ്രദ്ധിക്കേണ്ട കാര്യങ്ങള്‍

Authored by അഞ്ജലി എം സി | Samayam Malayalam | Updated: 22 Aug 2023, 12:18 pm

ഓണം പൊതുവില്‍ മലയാളികള്‍ ഒരു പുതുവര്‍ഷത്തിന്റെ ആരംഭം പോലെയാണ് കൊണ്ടാടുന്നത്. എല്ലാവരും ഓണത്തിന്റെ തിരക്കുകളിലേയ്ക്ക് ഇപ്പോഴേ കടന്ന് കഴിഞ്ഞു. പലരും വീട് വൃത്തിയാക്കലും അതുപോലെ, ഓണക്കോടി എടുക്കുന്നതിന്റെ തിരക്കിലുമായിരിക്കും. തിരുവോണ നാളില്‍ നമ്മള്‍ ആഹാരം കഴിക്കുന്നത് മുതല്‍ അന്ന് ധരിക്കുന്ന വസ്ത്രത്തില്‍ വരെ ശ്രദ്ധിക്കേണ്ട ചില വസതുതകളുണ്ട്. അത് ഏതെല്ലാമെന്ന് നോക്കാം.

• 

  ​കുളി​

  രാവിലെ എളുന്നേറ്റ ഉടനെ വീട്ടിലെ എല്ലാ അംഗങ്ങളും കുളിക്കേണ്ടത് വളരെ പ്രധാനപ്പെട്ട കാര്യമാണ്. അതുപോലെ തന്നെ അടുക്കളയില്‍ കയറി പാചകം ചെയ്യുന്നതിന് മുന്‍പ്, കുളിച്ച് വൃത്തിയായാല്‍ അന്നത്തെ ദിവസത്തില്‍ തന്നെ പുത്തന്‍ ഉണര്‍വ് ലഭിക്കുന്നതിന് ഇത് സഹായിക്കുന്നതാണ്. അതുപോലെ, കുളിച്ചതിന് ശേഷം മാത്രം രാവിലത്തെ പ്രഭാത ഭക്ഷണം എല്ലാവരും കഴിക്കാന്‍ ശ്രദ്ധിക്കുക. ഇത് നമ്മളില്‍ തന്നെ നിറയ്ക്കുന്ന ഒരു പോസറ്റീവ് എനര്‍ജിയുണ്ട്. ഇത് അന്നത്തെ ദിവസം മൊത്തം നമ്മളെ വൃത്തിയുള്ളവരും അതുപോലെ സന്തോഷമുള്ളവരുമാക്കി നിലനിര്‍ത്താന്‍ സഹായിക്കുന്നു.

• 

  ​ആഹാരം​

  ഓണത്തിന് രാവിലെ തന്നെ നല്ല പുട്ടും അതുപോലെ, നേന്ത്രപ്പഴം പുഴുങ്ങിയതും തയ്യാറാക്കി കൊടുക്കുകയാണെങ്കില്‍ അന്നത്തെ ദിവസത്തിന് വേണ്ട ഊര്‍ജം ലഭിക്കാനും ഇത് സഹായിക്കുന്നുണ്ട്. പുട്ടും പഴവും അല്ലെങ്കില്‍ ചിലര്‍ നേന്ത്രപ്പഴം പുഴുങ്ങിയതും പപ്പടവും ചേര്‍ത്ത് കഴിക്കാറുണ്ട്. ഇതും വളരെ സ്വാദേറിയതും അതുപോലെ പരമ്പരാഗതശൈലിയിലുള്ള ഒരു ഭക്ഷണരീതിയുമാണ്.

• 

  ​സദ്യ​

  ഓണത്തിന് സദ്യ ഇലയില്‍ തന്നെ വിളമ്പണം. അതും നല്ല വാഴയിലയില്‍ കുറച്ച് വെള്ളം തെളിച്ച് തുടച്ച് അതില്‍ കറികളും വിളമ്പി അതില്‍ കഴിക്കുമ്പോള്‍ പഴമയിലേയ്ക്കുള്ള ഒരു തിരിഞ്ഞ് നോട്ടവും അതിനൊപ്പം നല്ല പ്രകൃതിയോട് ചേര്‍ന്ന് നില്‍ക്കുന്ന ഒരു ആഹാരരീതിയ്ക്ക് പിന്തുടരുന്നതിന് സമവുമാണ്.

• 

  ​കറികള്‍​

  ഓണത്തിന് നല്ല ആര്‍ഭാടമായി കുറേയധികം കറികള്‍ വേണമെന്നില്ല. നിങ്ങളെകൊണ്ട് എങ്ങിനെ സാധിക്കുന്നുവോ അത്രമാത്രം കറികള്‍ മതിയാകും. ഉള്ളത് നല്ലപോലെ എല്ലാവരും ഒത്തൊരുമിച്ച് സ്‌നേഹത്തോടെ പങ്കുവെച്ച് കഴിക്കുമ്പോള്‍ തന്നെ അവിടെ ഓണത്തിന്റെ സന്തോഷം നിറയുന്നതാണ്.

• 

  ​പഴകിയത്​

  തിരുവോണ നാളില്‍ തലേദിവസത്തെ ആഹാരങ്ങള്‍ പരമാവധി കഴിക്കരുത് എന്നാണ് പറയുക. പുത്തന്‍ വസ്ത്രങ്ങള്‍ ധരിക്കുന്നത് പോലെ തന്നെ നല്ല ചൂടന്‍ ചോറും കറികളും വിളമ്പി നല്ലപോലെ ആസ്വദിച്ച് ആഹാരം കഴിക്കണം എന്നാണ്. ഇത്തരത്തില്‍ നല്ല ചൂടോടെ ഫ്രഷ് ആഹാരങ്ങള്‍ കഴിക്കുന്നത് ദഹന പ്രശ്‌നങ്ങള്‍ കുറയ്ക്കാനും സഹായിക്കും. അതുമാത്രമല്ല, കറികള്‍ വീണ്ടും വീണ്ടും ചൂടാക്കി കഴിക്കുന്നത് ദോഷകരമാണ്.

• 

  ​വൃത്തി​

  നല്ല പുത്തന്‍ വസ്ത്രം ധരിച്ച് ഓണം കൂടണം എന്നാണ് പറയുക. പുത്തന്‍ വസത്രം ധരിച്ചില്ലെങ്കിലും നല്ലപോലെ അലക്കി ഉണക്കി എടുത്ത വസ്ത്രം തന്നെ ധരിക്കാന്‍ ശ്രദ്ധിക്കണം. അത് വലിയവര്‍ മുതല്‍ കുട്ടികള്‍ വരെ കുളിച്ച് വൃത്തിയുള്ള വസ്ത്രം ധരിച്ച് നില്‍ക്കാന്‍ ശ്രദ്ധിക്കേണ്ടത് അനിവാര്യമാണ്.