ഡേവിഡ് ബെക്കാം, റയാന്‍ ഗിഗ്‌സ്, പോള്‍ സ്‌കോള്‍സ്, എറിക് കന്റോണ, പീറ്റര്‍ ഷ്‌മൈച്ചല്‍ തുടങ്ങിയ വമ്പന്‍ പേരുകള്‍ അടങ്ങുന്ന മാഞ്ചസ്റ്റര്‍ യുണൈറ്റഡിന്റെ പ്രസിദ്ധമായ 1992ലെ ടീം ജാസിമിന് ഏറെ പ്രിയപ്പെട്ടതായിരുന്നു. ജാസിം രൂപീകരിച്ച നയന്‍ ടു ഫൗണ്ടേഷന്‍ 92 സ്‌ക്വാഡിനെ അനുസ്മരിച്ചാണെന്ന് വിശ്വസിക്കപ്പെടുന്നു.
ലോകമെമ്പാടുമുള്ള സോക്കര്‍ പ്രേമികള്‍ക്കിടയില്‍ ചുവന്ന ചെകുത്താന്‍മാര്‍ എന്നറിയപ്പെടുന്ന ഓള്‍ഡ് ട്രാഫോര്‍ഡിലെ മാഞ്ചസ്റ്റര്‍ യുണൈറ്റഡ് ക്ലബ് ഫുട്‌ബോള്‍ ആരാധകനായ ഷെയ്ഖ് ജാസിം വിലയ്‌ക്കെടുക്കുകയാണ്. ഇതിനായി 7.6 ബില്യണ്‍ ഡോളര്‍ (6,29,15,46,00,000 രൂപ) ചെലവഴിക്കുന്ന ഷെയ്ഖ് ജാസിം ഖത്തറിലെ മുന്‍ അമീര്‍ ഷെയ്ഖ് ഹമദ് ബിന്‍ ഖലീഫ അല്‍താനിയുടെ മൂന്നാമത്തെ മകനാണ്. രണ്ടാമത്തെ ഭാര്യ ഷെയ്ഖ മോസ ബിന്‍ത് നാസര്‍ അല്‍മിസ്‌നെദില്‍ അമീറിന് പിറന്ന ആദ്യ മകന്‍. 2003ല്‍, അമീറാകാനുള്ള താത്പര്യമില്ലായ്മ തുറന്നുപറഞ്ഞ അദ്ദേഹം കിരീടാവകാശി സ്ഥാനം ഇളയ സഹോദരന്‍ ഷെയ്ഖ് തമീമിന് കൈമാറി.
ഖത്തര്‍ രാജകുടുംബാംഗവും ഖത്തര്‍ ഇസ്ലാമിക് ബാങ്കിന്റെ (ക്യുഐബി) ചെയര്‍മാനുമാണ്. തന്റെ കുട്ടിക്കാലത്തിന്റെ ഭൂരിഭാഗവും യുകെയില്‍ ചെലവഴിച്ചു. ഡോര്‍സെറ്റ് സ്‌കൂളിലെ പഠനത്തിനു ശേഷം സാന്‍ഡ്ഹര്‍സ്റ്റിന്റെ റോയല്‍ മിലിട്ടറി അക്കാദമിയില്‍ ചേര്‍ന്നു.
കുട്ടിക്കാലം മുതല്‍ തന്നെ മാഞ്ചസ്റ്റര്‍ യുണൈറ്റഡിന്റെ കടുത്ത ആരാധകനാണ് ഷെയ്ഖ് ജാസിമെന്ന് ഗാര്‍ഡിയന്‍ ഉള്‍പ്പെടെ നിരവധി മാധ്യമങ്ങള്‍ റിപ്പോര്‍ട്ട് ചെയ്തു. 145 വര്‍ഷം മുമ്പ് 1878ലാണ് മാഞ്ചസ്റ്റര്‍ യുണൈറ്റഡ് രൂപീകൃതമായത്. ഇംഗ്ലീഷ് പ്രീമിയര്‍ ലീഗിലെ മുന്‍നിര ക്ലബ്ലുകളിലൊന്നായ യുനൈറ്റഡ് ഇന്നും ലോകത്തിലെ ഏറ്റവും പ്രമുഖ ഫുട്‌ബോള്‍ ക്ലബ്ബുകളിലൊന്നായി തുടരുന്നു. അദ്ഭുതങ്ങള്‍ സംഭവിച്ചില്ലെങ്കില്‍ ഒക്ടോബര്‍ പകുതിയോടെ ഷെയ്ഖ് ജാസിം യുണൈറ്റഡിനെ സ്വന്തംപേരില്‍ എഴുതിച്ചേര്‍ക്കും.
ഓള്‍ഡ് ട്രാഫോര്‍ഡ് ക്ലബ് വില്‍ക്കാന്‍ തയ്യാറാണെന്ന് 2022 നവംബറിലാണ് ഗ്ലേസര്‍ കുടുംബം പ്രഖ്യാപിച്ചത്. ബ്രിട്ടീഷ് കോടീശ്വരനായ സര്‍ ജിം റാറ്റ്ക്ലിഫും ക്ലബ്ബ് ഏറ്റെടുക്കാന്‍ സന്നദ്ധനായി അവസാന നിമിഷം വരെ നിലയുറപ്പിച്ചിരുന്നു. 100 ശതമാനം ഉടമസ്ഥാവകാശവും ഏറ്റെടുക്കാനുള്ള ഷെയ്ഖ് ജാസിമിന്റെ നീക്കത്തില്‍ ജിം റാറ്റ്ക്ലിഫിന് പിന്നോക്കം പോകേണ്ടിവന്നുവെന്നാണ് പുറത്തുവരുന്ന റിപ്പോര്‍ട്ടുകള്‍.
