യുഎഇക്കും സൗദിക്കും ബ്രിക്‌സിലേക്ക് ക്ഷണം; സഹകരിക്കുമെന്ന് ഷെയ്ഖ് മുഹമ്മദ്

ബ്രസീല്‍, റഷ്യ, ഇന്ത്യ, ചൈന, ദക്ഷിണാഫ്രിക്ക എന്നീ അഞ്ച് വികസ്വര സമ്പദ്‌വ്യവസ്ഥകളുടെ കൂട്ടായ്മയാണ് ബ്രിക്‌സ്. ദക്ഷിണാഫ്രിക്കന്‍ തലസ്ഥാനമായ ജോഹന്നാസ്ബര്‍ഗില്‍ നടന്നുവരുന്ന ത്രിദിന ഉച്ചകോടിയില്‍ ഗ്രൂപ്പ് വിപുലമാക്കാന്‍ തീരുമാനിക്കുകയായിരുന്നു. പുതിയ അംഗരാജ്യങ്ങളെ തിരഞ്ഞെടുക്കാനുള്ള മാനദണ്ഡങ്ങളുടെ കാര്യത്തില്‍ അഭിപ്രായഭിന്നത ഉണ്ടായിരുന്നതായി റിപ്പോര്‍ട്ടുകളുണ്ടായിരുന്നു. എന്നാല്‍ സമവായത്തിലൂടെ തീരുമാനങ്ങള്‍ എടുക്കുന്നതിനാണ് ഗ്രൂപ്പ് മുന്‍ഗണന നല്‍കുന്നതെന്നും ബ്രിക്‌സ് വിപുലീകരണ പ്രക്രിയയുടെ മാര്‍ഗനിര്‍ദേശ തത്വങ്ങളിലും മാനദണ്ഡങ്ങളിലും നടപടിക്രമങ്ങളിലും യോജിച്ച തീരുമാനമാണ് ഉണ്ടായതെന്നും ദക്ഷിണാഫ്രിക്കന്‍ പ്രസിഡന്റ് സിറില്‍ റമഫോസ പറഞ്ഞു.

നിര്‍മിതബുദ്ധി ഗള്‍ഫ് രാജ്യങ്ങളിലെ തൊഴിലവസരങ്ങളെ ബാധിക്കുമോ? തൊഴില്‍ വിപണിയിലെ മാറുന്ന പ്രവണതകള്‍ അറിയാം
ആറ് രാജ്യങ്ങളെ ഗ്രൂപ്പിലേക്ക് ക്ഷണിച്ചതായി സിറില്‍ റമഫോസ സ്ഥിരീകരിച്ചു. യുഎഇ, സൗദി അറേബ്യ, അര്‍ജന്റീന, ഈജിപ്ത്, ഇറാന്‍, എത്യോപ്യ എന്നിവയാണിവ. ആഗോള സമ്പദ്‌വ്യവസ്ഥയുടെ നാലിലൊന്നിനെയും മൂന്ന് ബില്യണിലധികം ആളുകളെയും പ്രതിനിധീകരിക്കുന്ന ബ്രിക്‌സില്‍ ചേരാന്‍ രണ്ട് ഡസനോളം രാജ്യങ്ങള്‍ ഔദ്യോഗികമായി അപേക്ഷിച്ചിരുന്നു. ഇന്ന് സമാപിക്കുന്ന ഉച്ചകോടിയില്‍ 50 രാഷ്ട്രങ്ങളിലെ പ്രതിനിധികള്‍ പങ്കെടുക്കുന്നുണ്ട്.

വരുന്നു ട്രോജെന; തബൂക്കിലെ ഹിമമലകള്‍ക്കു മുകളിലെ മഹാവിസ്മയം
ബ്രസീല്‍, റഷ്യ, ഇന്ത്യ, ചൈന എന്നീ രാജ്യങ്ങള്‍ ഉള്‍പ്പെട്ട ബ്രിക് (BRIC) 2010ല്‍ വിപുലീകരിച്ച് സൗത്ത് ആഫ്രിക്കയെ കൂടി ഉള്‍പ്പെടുത്തി ബ്രിക്‌സ് (BRICS) എന്നാക്കുകയായിരുന്നു. റഷ്യയും ലോകത്തെ ഉയര്‍ന്നുവരുന്ന സൂപ്പര്‍പവറുകളായ ഇന്ത്യയും ചൈനയും ജനസംഖ്യ, വിസ്തീര്‍ണം, ജിഡിപി എന്നിവ കൊണ്ട് ലോകത്തിലെ ഏറ്റവും വലിയ പത്ത് രാജ്യങ്ങളില്‍ ഒന്നായ ബ്രസീലും ചേര്‍ന്നാണ് ബ്രിക് രൂപീകരിച്ചത്.

2050ഓടെ ആഗോള സമ്പദ്‌വ്യവസ്ഥയെ നിയന്ത്രിക്കുന്ന കൂട്ടായ്മയായി ഉയര്‍ത്തിക്കൊണ്ടുവരികയെന്ന ലക്ഷ്യത്തോടെ 2001ല്‍ സാമ്പത്തിക ശാസ്ത്രജ്ഞനായ ജിം ഒ’നീല്‍ കൊണ്ടുവന്ന ആശയമാണ് ബ്രിക്‌സ് കൂട്ടായ്മ. ലോക ഭൂപ്രതലത്തിന്റെ ഏകദേശം 26.7 ശതമാനവും ആഗോള ജനസംഖ്യയുടെ 41.5 ശതമാനവും ബ്രിക്‌സില്‍ ഉള്‍പ്പെടുന്നു.