ഒരു പ്രദേശത്തെ പലതരം സാമ്പത്തിക കേന്ദ്രങ്ങളെ പരസ്പരം ബന്ധിപ്പിക്കുന്ന പാതകളാണിവ. റെയില്‍പാതകളുമായും, തുറമുഖങ്ങളുമായും, ഹൈവേകളുമായുമെല്ലാം ഇവയ്ക്ക് ബന്ധമുണ്ടാകും. വ്യാവസായിക കേന്ദ്രങ്ങളെയാണിവ കണക്ട് ചെയ്യുക. മുംബൈ- കന്യാകുമാരി, മുംബൈ കൊല്‍കത്ത ഇടനാഴികളെപ്പോലെ കിലോമീറ്ററുകള്‍ നീളമുള്ള വമ്പന്മാരും, ജയ്പൂര്‍-ആഗ്ര, പൂനെ-ഔറംഗാബാദ് പോലെയുള്ള ചെറു ഇടനാഴികളും ഇന്ത്യയുടെ സാമ്പത്തികക്കുതിപ്പിന് വേഗത കൂട്ടുമെന്നാണ് പ്രതീക്ഷിക്കുന്നത്. ആ കൂട്ടത്തിലേക്കാണ് നിര്‍ദ്ദിഷ്ട കൊച്ചി – തേനി ദേശീയപാതയുടെ വരവ്.
തേനിപ്പക്കം വീശുന്ന തെൻമേർക്ക് പറുവക്കാറ്റ്…
കേരളമെന്ന പടിഞ്ഞാറിനെ തമിഴകത്തിന്റെ തെക്കൻ മേഖലയുമായി ബന്ധിപ്പിക്കുകയാണ് കൊച്ചി-തേനി ഗ്രീന്‍ഫീല്‍ഡ് ദേശീയ പാത. യാത്രാദൂരം കുറയ്ക്കുക മാത്രമല്ല കൊച്ചി-തേനി ഗ്രീന്‍ഫീല്‍ഡ് ദേശീയ പാതയുടെ ലക്ഷ്യം. പുതിയ പാത വന്നാല്‍ വളവുകളും കയറ്റങ്ങളും നിറഞ്ഞ മൂന്നാര്‍ റൂട്ടിലൂടെയുള്ള സാഹസിക യാത്രയില്‍ നിന്ന് സാധാരണ യാത്രകാര്‍ക്കൊപ്പം ചരക്കുവാഹനങ്ങള്‍ക്കും ആശ്വാസിക്കാം. മൂന്നാര്‍ വഴിയുള്ള തിരക്കും ഇതോടെ കുറയും. കൊച്ചിയില്‍ നിന്ന് തേനിയിലേക്കുള്ള ദൂരം 100 കിലോമീറ്ററോളം കുറയ്ക്കുന്ന ഗ്രീന്‍ഫീല്‍ഡ് ദേശീയപാത കൊച്ചുകേരളത്തിന്റെ സാമ്പത്തിക വളര്‍ച്ചയ്ക്ക് മുതല്‍ക്കൂട്ടാകും.
പൂർണ്ണമായും പുതുതായി സ്ഥലമേറ്റെടുത്താണ് കൊച്ചി-തേനി ഹൈവേയുടെ നിര്‍മാണം. കേന്ദ്ര പദ്ധതിയായ ഭാരത് മാലയില്‍ ഉള്‍പ്പെടുത്തിയാണ് ഈ റോഡ് നിർമ്മിക്കുന്നത്. കൊച്ചിയില്‍ നിന്ന് തേനിയിലെത്തണമെങ്കില്‍ നിലവില്‍ മൂന്നാറിലെത്തി അവിടെ നിന്ന് ബോഡിനായ്ക്കന്നൂര്‍ വഴിവേണം തേനിയിലേക്ക് തിരിക്കാന്‍. 200 കിലോമീറ്ററോളമാണ് ചുറ്റിവളഞ്ഞുള്ള യാത്രയ്ക്ക് വേണ്ടിവരിക. പുതിയ പാത ഈ യാത്രാദൈര്‍ഘ്യം കുറയ്ക്കാന്‍ സഹായിക്കും.
പുതുതായ നിര്‍മിക്കുന്ന ഹൈവേയായതുകൊണ്ട് സ്ഥലമേറ്റെടുപ്പുണ്ടാകും. അടിമുടി പുതിയ പാതയായതുകൊണ്ട് മുന്നിലുള്ള വെല്ലുവിളികളും വലുതാണ്. എറണാകുളത്ത് നിന്നുമാത്രം 13 വില്ലേജുകളില്‍ നിന്ന് ഭൂമിയേറ്റെടുക്കുകയാണ് നിര്‍മ്മാണത്തിന് മുന്നിലുള്ള ആദ്യത്തെ കടമ്പ. മാറാടി, മരട്, കല്ലൂര്‍ക്കാട്, മഞ്ഞള്ളൂര്‍ തുടങ്ങി കച്ചവട-വ്യവസായിക-കാര്‍ഷിക മേഖലകള്‍ ഉള്‍പ്പെടും. ഇടുക്കിയില്‍ ദേവികുളം, തൊടുപുഴ താലൂക്കുകളിലും ഭൂമിയേറ്റെടുപ്പ് നടക്കും.
151 കിലോമീറ്റര്‍ ദൈര്‍ഘ്യമുള്ള കൊച്ചി-തേനി ഹൈവേയ്ക്ക് എറണാകുളം ജില്ലയിലെ ഭൂമിയേറ്റെടുപ്പ് നടപടികള്‍ 2021-ലാണ് ദേശീയപാത അതോറിറ്റി തുടങ്ങിയത്. 1489 കോടി രൂപയായിരുന്നു നാലുവരി പാതയ്ക്ക് ഭൂമിയേറ്റെടുക്കാന്‍ അന്ന് അനുവദിച്ചത്. ഇതില്‍ 372 കോടിയോളം രൂപ സംസ്ഥാന വിഹിതവും. ഈ തുക കിഫ്ബി വഴി നല്‍കാനായിരുന്നു തീരുമാനം. റോഡ് നിര്‍മാണത്തിനുള്ള മൊത്തം ചെലവ് കണക്കാക്കിയത് 10,236 കോടി രൂപയായിരുന്നു. കൊച്ചിയിലെയും തൂത്തുക്കുടിയിലെയും തുറമുഖങ്ങള്‍ ബന്ധിപ്പിച്ച് പണിയുന്ന ഹൈവേ കയറ്റുമതി-ഇറക്കുമതിയില്‍ വികസനത്തിന്റെ പുതിയ അധ്യായം രചിക്കുമെന്നാണ് പ്രതീക്ഷിക്കുന്നത്. അങ്കമാലി, നെടുങ്കണ്ടം തുടങ്ങിയ ഇടങ്ങളെ ബന്ധിപ്പിക്കുന്ന ഹൈവേ തുടങ്ങുന്നത് എറണാകുളം കുണ്ടന്നൂരില്‍ നിന്നാണ്. കുണ്ടന്നൂരില്‍ ആറുവരി ഹൈവേയ്ക്കായി ആകാശപാതയും ഉയരുന്നുണ്ട്. ഇടുക്കി നെടുങ്കണ്ടത്തെ തേവാംമെട്ടിലൂടെയാണ് പാത തമിഴ്‌നാട്ടിലേക്ക് കടക്കുക.
കൊച്ചി-ധനുഷ്ടകോടി ദേശീയ പാതയ്ക്ക് സമാന്തരമായി നിര്‍മിക്കുന്ന കൊച്ചി-തേനി ഗ്രീന്‍ഫീല്‍ഡ് ഹൈവേയുടെ അലൈന്‍മെന്റ് വിഷയത്തില്‍ അന്തിമതീരുമാനം ഈ വര്‍ഷത്തിന്റെ തുടക്കത്തിലുണ്ടാകുമെന്ന് പറഞ്ഞിരുന്നെങ്കിലും വൈകി. നിര്‍ദ്ദിഷ്ട ദേശീയപാതയ്ക്കായി നോക്കിവെച്ച പ്രദേശങ്ങളിലെ മലമ്പ്രദേശങ്ങളാണ് ഈ വൈകലിന് കാരണം. ചിലയിടങ്ങളില്‍ ആകാശപാതയെ താങ്ങിനിര്‍ത്താന്‍ വലിയ തൂണുകള്‍തന്നെ വേണ്ടിവരും. അങ്ങനെയാണെങ്കില്‍ അന്തിമ അലൈന്‍മെന്റിന്റെ തീരുമാനം വീണ്ടും വൈകും. കൂടാതെ ദേശീയപാതയുടെ ഭാഗമായി നിലവിലുള്ള ചില റോഡുകള്‍ വികസിപ്പിക്കുന്നുണ്ട്. ഇവ ഏതെല്ലാം റോഡുകളാണെന്ന കാര്യത്തിലും അന്തിമ തീരുമാനമുണ്ടാകണം. ജനസാന്ദ്രത കൂടിയതും സ്ഥലപരിമിതിയുള്ളതുമായ എറണാകുളം പോലൊരു ജില്ലയില്‍ ജനവാസമുള്ള സ്ഥലങ്ങളും നഗരങ്ങളുമൊഴിവാക്കി, കയറ്റങ്ങളും വളവുകളും കുറഞ്ഞ പാതപണിയുക എന്ന വെല്ലുവിളിയും ദേശീയപാതാ അതോറിറ്റിക്ക് മുന്നിലുണ്ട്. ഇത് പരിഹരിച്ചുകൊണ്ടായിരിക്കും പാതയുടെ നിര്‍മാണം. അതിനു മുന്നോടിയായി സ്ഥലം നിര്‍ണയിച്ച് ഭൂമിയേറ്റെടുപ്പിനുള്ള വിജ്ഞാപനം പുറപ്പെടുവിക്കണം. പാതയുടെ നിര്‍മാണം പൂര്‍ത്തിയായാല്‍ കൊച്ചിയില്‍ നിന്ന് തൂത്തുക്കുടിയിലേക്കും തിരിച്ചുമുള്ള ചരക്കുനീക്കത്തിന്റെ വേഗത കൂടുമെന്ന് മാത്രമല്ല, കയറ്റിറക്കങ്ങള്‍ കുറഞ്ഞ ഹൈവേയിലൂടെ ജനങ്ങൾക്ക് സുഗമമായ യാത്രയും ഉറപ്പിക്കാം. തമിഴ്‌നാട്ടിലെ കൊടൈക്കനാല്‍ പോലുള്ള വിനോദസഞ്ചാര കേന്ദ്രങ്ങളിലേക്കുള്ള ദൂരവും കുറയും. കാര്‍ഷിക ഉത്പന്നങ്ങള്‍ക്ക് പ്രധാനമായും തമിഴ്‌നാടിനെ ആശ്രയിക്കുന്ന കേരളത്തിന് പുതിയ പാത ആശ്രയമായിരിക്കും. തമിഴ്‌നാട്ടിലെ കാര്‍ഷിക ഗ്രാമങ്ങള്‍ക്കും പാത നേട്ടം കൊണ്ടുവരും.
