സ്‌പേസ് എക്‌സ് ഡ്രാഗണ്‍ ബഹിരാകാശ പേടകം സപ്തംബര്‍ രണ്ട് ശനിയാഴ്ചയാണ് അന്താരാഷ്ട്ര ബഹിരാകാശ നിലയത്തില്‍ നിന്ന് അണ്‍ഡോക്ക് ചെയ്യുന്നത്. അല്‍ നെയാദി ഏതാനും ദിവസങ്ങള്‍ക്കുള്ളില്‍ തിരിച്ചെത്തുമെന്ന് ദുബായിലെ മുഹമ്മദ് ബിന്‍ റാഷിദ് സ്‌പേസ് സെന്റര്‍ (എംബിആര്‍എസ്‌സി) അറിയിച്ചു. ഓഗസ്റ്റ് 31 വ്യാഴാഴ്ച ഭൂമിയില്‍ തിരിച്ചെത്തുമെന്നാണ് നേരത്തേ പ്രതീക്ഷിച്ചിരുന്നത്.
ഐഎസ്എസിനുള്ളില്‍ 200ലധികം ശാസ്ത്രീയ പരീക്ഷണങ്ങള്‍ നടത്തിയാണ് നെയാദി മടങ്ങുന്നത്. ബഹിരാകാശയാത്രികരുടെ പ്രതിരോധശേഷിയും ഐഎസ്എസിലെ സൂക്ഷ്മജീവ രോഗാണുക്കളും തമ്മിലുള്ള പ്രതികരണം വിശകലനം ചെയ്യുന്നതിനുള്ള ഹോസ്റ്റ്പഥോജന്‍ പരീക്ഷണത്തിലാണ് ഏറ്റവും അവസാനം അല്‍ നെയാദി പങ്കെടുത്തത്. അല്‍ നെയാദിയുടെ രക്തത്തില്‍ നിന്നുള്ള സാമ്പിളുകള്‍ പരിശോധിച്ച് ബഹിരാകാശ ജീവിതത്തോട് അദ്ദേഹത്തിന്റെ ശാരീരിക പ്രതിരോധ സംവിധാനം എങ്ങനെ പ്രതികരിച്ചുവെന്ന് കണ്ടെത്തും.
നാസയുടെ ജോണ്‍സണ്‍ സ്‌പേസ് സെന്ററുമായി സഹകരിച്ചാണ് ഈ പരീക്ഷണം നടത്തിയത്. ഐഎസ്എസിലും ഭൂമിയിലും ശേഖരിച്ച അല്‍ നെയാദിയുടെ ഡിഎന്‍എ സാമ്പിളുകള്‍ വഴിയാണ് പഠനഫലങ്ങള്‍ വിശകലനം ചെയ്യുക. ബയോളജിക്കല്‍ സാമ്പിള്‍ ശേഖരണത്തിലൂടെ ബഹിരാകാശ യാത്രികരും ബഹിരാകാശ നിലയത്തിന്റെ പരിതസ്ഥിതിയില്‍ ഉണ്ടായേക്കാവുന്ന സൂക്ഷ്മജീവ രോഗാണുക്കളും തമ്മിലുള്ള പ്രതിപ്രവര്‍ത്തനം ഹോസ്റ്റ്പഥോജന്‍ പഠനം പരിശോധിക്കുന്നു. ഇത് സ്‌ട്രെസ് ഹോര്‍മോണുകളുടെ ഫലങ്ങളെക്കുറിച്ചും ബഹിരാകാശയാത്രികന്റെ പ്രതിരോധ സംവിധാനത്തില്‍ ഒളിഞ്ഞിരിക്കുന്ന വൈറസ് വീണ്ടും സജീവമാക്കുന്നതിനെ കുറിച്ചും അറിവുകള്‍ നല്‍കും.
ബഹിരാകാശ നടത്തം പൂര്‍ത്തിയാക്കിയ ആദ്യ അറബ് വംശജന്‍, ബഹിരാകാശത്ത് ഏറ്റവുമധികം ദിവസം താമസിച്ച അറബ് ലോകത്തെ ആദ്യ യാത്രികന്‍ തുടങ്ങിയ ചരിത്രനേട്ടങ്ങള്‍ സ്വന്തമാക്കിയാണ് സുല്‍ത്താന്‍ അല്‍നെയാദി ഭൂമിയില്‍ തിരിച്ചെത്തുന്നത്. നാട്ടിലേക്ക് മടങ്ങുന്നതിനായുള്ള ശാരീരിക ഒരുക്കങ്ങള്‍ നടത്തുന്നതിന്റെ വീഡിയോ നെയാദി രണ്ടാഴ്ച മുമ്പ് എക്‌സില്‍ (പഴയ ട്വിറ്റര്‍) പങ്കിട്ടിരുന്നു. ബഹിരാകാശ യാത്ര മനുഷ്യരെ ശാരീരികമായും മാനസികമായും എങ്ങനെ ബാധിക്കുന്നുവെന്നും ഭൂമിയിലെ ജീവിതവുമായി പൊരുത്തപ്പെടാന്‍ എന്താണ് ചെയ്യേണ്ടതെന്നും അല്‍ നെയാദി പുതിയ വീഡിയോയില്‍ വിശദീകരിക്കുകയുണ്ടായി.
