ഷാരൂഖ് ഖാൻ നായകനായും വിജയ് സേതുപതി പ്രതിനായകനായും എത്തുന്ന ‘ജവാൻ’ സിനിമയുടെ ആവേശ്വോജ്ജ്വലമായ ട്രെയിലർ പുറത്ത്. മിലിട്ടറി ഓഫീസറായി വേറിട്ട ഗെറ്റപ്പുകളിൽ ഷാരൂഖ് എത്തുന്ന ചിത്രം ഒരു മാസ് അക്ഷൻ ത്രില്ലർ ആയിരിക്കുമെന്നാണ് ട്രെയിലർ നൽകുന്ന സൂചനകൾ. നയൻതാരയാണ് ചിത്രത്തിലെ നായിക. ദീപിക പദുക്കോണും പ്രധാന വേഷത്തിൽ ചിത്രത്തിലുണ്ട്. പ്രിയാമണി, സന്യ മൽഹോത്ര, സഞ്‍ജീത ഭട്ടാചാര്യ, സുനില്‍ ഗ്രോവര്‍, റിദ്ധി ദോഗ്ര, അമൃത അയ്യര്‍ എന്നിവരാണ് ‘ജവാനി’ലെ മറ്റ് പ്രധാന അഭിനേതാക്കൾ. ഷാരൂഖിന്‍റെ കരിയറിലെ തന്നെ ഏറ്റവും ചിലവേറിയ സിനിമയുടെ സംവിധായകൻ തമിഴിലെ ഹിറ്റ് ഡയറക്ടര്‍ അറ്റ്‍ലിയാണ്. അറ്റ്ലിയും എസ്. രാമനഗിരിവാസനും ചേർന്നാണ് തിരക്കഥയൊരുക്കിയിരിക്കുന്നത്. സുമിത് അറോറയാണ് സംഭാഷണം എഴുതിയിരിക്കുന്നത്.
വിക്രം, ആസാദ് എന്നീ രണ്ട് കഥാപാത്രങ്ങളായാണ് ഷാരൂഖ് ചിത്രത്തിൽ എത്തുന്നത്. ഖാലി എന്ന വേറിട്ട കഥാപാത്രമായി വിജയ് സേതുപതിയെത്തുന്നു. ഇവർ ആദ്യമായി ഒരുമിക്കുന്നു എന്നതുതന്നെയാണ് സിനിമയുടെ ഹൈലൈറ്റ്. സമൂഹത്തിലെ തെറ്റായ ചില കാര്യങ്ങളെ ഏതാനും വനിതകളുടെ സഹായത്തോടെ ഇല്ലാതാക്കാനുള്ള ഒരാളുടെ ശ്രമവും തുടർ സംഭവങ്ങളുമാണ് സിനിമയുടെ പ്രമേയം.
റെഡ് ചില്ലീസ് എന്‍റര്‍ടെയ്ൻമെന്‍റ്സിന്‍റെ ബാനറിൽ ഗൗരി ഖാൻ നിർമ്മിക്കുന്ന ചിത്രം സെപ്റ്റംബർ ഏഴിന് തിയേറ്ററുകളിൽ എത്തും. ഹിന്ദിക്കൊപ്പം തമിഴ്, തെലുങ്ക് ഭാഷകളിലും ചിത്രമെത്തുന്നുണ്ട്. ശ്രീ ഗോകുലം മൂവീസിന്‍റെ ബാനറിൽ ഗോകുലം ഗോപാലനാണ് ചിത്രം കേരളത്തിലും തമിഴ്‌നാട്ടിലും വിതരത്തിന് എത്തിക്കുന്നത്. തമിഴ്‌നാട്ടിൽ റെഡ്‍ജയ്ന്‍റ് മൂവീസ് ഡിസ്ട്രിബ്യുഷൻ പാർട്ണർ ആകും. കേരളത്തിൽ ഡ്രീം ബിഗ് ഫിലിംസ് പാർട്ണറാകും. തമിഴ്‌നാട്, കേരള സംസ്ഥാനങ്ങളിലെ വിതരണാവകാശം റെക്കോര്‍ഡ് തുകയ്ക്കാണ് ശ്രീ ഗോകുലം മൂവിസ് സ്വന്തമാക്കിയിരിക്കുന്നത്.
അനിരുദ്ധ് ആണ് ജവാന്‍റെ സംഗീതം നിര്‍വഹിച്ചിരിക്കുന്നത്. ചിത്രത്തിന്‍റേതായി നേരത്തെ പുറത്തിറങ്ങിയ ഗാനങ്ങള്‍ എല്ലാം തന്നെ ഹിറ്റ് ലിസ്റ്റില്‍ ഇടംനേടിയിട്ടുണ്ട്. ‘പഠാന്‍’ ആണ് ഷാരൂഖ് ഖാന്‍റേതായി ഏറ്റവും ഒടുവില്‍ തിയേറ്ററുകളിലെത്തിയ ചിത്രം. ആയിരം കോടിയിലധികം ആണ് ഈ ചിത്രം ബോക്സ് ഓഫീസില്‍ നിന്ന് സ്വന്തമാക്കിയിരുന്നത്. ഈ ബോക്സ് ഓഫീസ് വിജയം ആവർത്തിക്കാൻ തന്നെയാണ് ജവാന്‍റെ വരവ് എന്നാണ് ട്രെയിലറിൽ നിന്ന് മനസ്സിലാക്കാനാകുന്നത്.
കോ പ്രൊഡ്യൂസർ ഗൗരവ് വർമ്മ, ഛായാഗ്രഹണം ജി.കെ വിഷ്ണു, എഡിറ്റിങ് റൂബെൻ, പ്രൊഡക്ഷൻ ഡിസൈനർ ടി മുത്തുരാജ്, ഗാനരചന കുമാർ, സൗണ്ട് ഡിസൈനർ കുനാൽ രാജൻ, കോറിയോഗ്രഫി ഫറാ ഖാൻ, ഷോബി ആൻഡ് ലളിത, വൈഭവി മർച്ചന്‍റ്, എക്സിക്യുട്ടീവ് പ്രൊഡ്യൂസർ പ്രതീക് റാവൽ, പ്രൊഡക്ഷൻ മാനേജർ ഇ.ശരവണൻ, മാർക്കറ്റിംഗ് സ്നേക്ക്പ്ലാന്‍റ്.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
