അമിതമായ സോപ്പ് ഉപയോഗം ചർമ്മത്തിൻ്റെ സോഫ്‌റ്റ്‌നെസ് ഇല്ലാതാക്കുമോ?

ചർമ്മത്തിലെ എണ്ണയെയും മറ്റ് കൊഴുപ്പുകളെയും അഴുക്കിനെയും കളയാൻ ഏറെ നല്ലതാണ് സോപ്പ്. സോപ്പ് തന്മാത്രകൾ ആംഫിപതിക് ആണ്, അതായത് അവയ്ക്ക് ഹൈഡ്രോഫോബിക് (ജലത്തെ അകറ്റുന്ന), ഹൈഡ്രോഫിലിക് (ജലത്തെ ആകർഷിക്കുന്ന) ഉണ്ട്. സോപ്പും വെള്ളവും ഉപയോഗിച്ച് കഴുകുമ്പോൾ, ഈ തന്മാത്രകൾ നിങ്ങളുടെ ചർമ്മത്തിൽ എണ്ണ കണങ്ങളെ വലയം ചെയ്യുന്നു, അവ കഴുകിപ്പോകാൻ അനുവദിക്കുന്നു.

പിഎച്ച് ഘടകം

മനുഷ്യ ചർമ്മത്തിന് സ്വാഭാവികമായും അല്പം അസിഡിറ്റി ഉള്ള pH ലെവലുണ്ട് – ശരാശരി 5.5 ആണ് പിഎച്ച് ലെവൽ. ഇത് ദോഷകരമായ സൂക്ഷ്മാണുക്കൾക്കും മറ്റ് പ്രകോപനങ്ങൾക്കും എതിരായി പോരാടാൻ സഹായിക്കുന്നു. വിപണിയിൽ ലഭിക്കുന്ന മിക്ക സോപ്പുകളിലും ഉയർന്ന പിഎച്ച് നില ഏകദേശം 9-10 വരെ ഉണ്ട്. ഇത് ചർമ്മത്തിന്റെ സ്വാഭാവിക അസിഡിറ്റിയെ തടസ്സപ്പെടുത്തുകയും കഴുകിയ ശേഷം കൂടുതൽ ഡ്രൈയാക്കുകയും ചെയ്യും.

ചർമ്മത്തിന് അനുസരിച്ച് സോപ്പ് തിരഞ്ഞെടുക്കാം

ഓരോരുത്തർക്കും ഓരോ രീതിയിലുള്ള ചർമ്മമായിരിക്കും. അതുകൊണ്ട് തന്നെ ചർമ്മത്തിന് ചേരുന്ന സോപ്പ് തിരഞ്ഞെടുക്കേണ്ടത് വളരെ പ്രധാനമാണ്. എണ്ണമയമുള്ളതും വരണ്ടതും അതുപോലെ സാധാരണമായ ചർമ്മം അങ്ങനെ പല തരത്തിലുള്ള ചർമ്മക്കാരുണ്ട്. സെൻസിറ്റീവും വരണ്ടതുമായ ചർമ്മക്കാർക്ക് സോപ്പ് തിരഞ്ഞെടുക്കുന്നത് വളരെ പ്രയാസമുള്ള കാര്യമാണ്.

ചർമ്മത്തിലേക്ക് ഈർപ്പം ആകർഷിക്കുന്ന ഗ്ലിസറിൻ പോലുള്ള ചേരുവകൾ അടങ്ങിയ മോയ്സ്ചറൈസിംഗ് സോപ്പുകൾ വിപണിയിൽ ലഭ്യമാണ്. ചർമ്മത്തെ മിനുസപ്പെടുത്തുകയും ജലാംശം നൽകുകയും ചെയ്യുന്ന ഷിയ ബട്ടർ പോലുള്ള എമോലിയന്റുകൾ അടങ്ങിയവയാണിതൊക്കെ. ഇത്തരം ചർമ്മക്കാർ ഇങ്ങനെയുള്ള സോപ്പുകൾ തിരഞ്ഞെടുക്കാൻ ശ്രമിക്കുക.

പൊതുവെ സാധാരണ ബാർ സോപ്പുകളിൽ പിഎച്ച് നില വളരെ കൂടുതലായിരിക്കും. മാത്രമല്ല, സർഫാക്റ്റൻ്റുകളുടെ സാന്നിധ്യവും വളരെ കൂടുതലായിരിക്കും. സോപ്പ് ഉപയോഗിക്കുന്നത് നിർത്തേണ്ട ആവശ്യമില്ല പകരം ഇതിന് ബദലായുള്ള മാർഗങ്ങൾ സ്വീകരിക്കാൻ ശ്രദ്ധിക്കുക. ചർമ്മത്തിൻ്റെ രീതി കൂടി മനസിലാക്കി സോപ്പ് തിരഞ്ഞെടുക്കാനും ശ്രദ്ധിക്കേണ്ടത് ഏറെ പ്രധാനമാണ്.