കരുവന്നൂർ വായ്പ തട്ടിപ്പ്: സിപിഎം അംഗങ്ങൾക്കെതിരായ നടപടി ചർച്ച ചെയ്യാൻ നാളെ ജില്ല സെക്രട്ടേറിയറ്റ് യോഗം

തൃശൂർ: കരുവന്നൂർ വായ്പ തട്ടിപ്പ് കേസിൽ പ്രതികളായ പാർട്ടി അംഗങ്ങൾക്കെതിരായ നടപടി ചർച്ച ചെയ്യാൻ സിപിഎം ജില്ലാ സെക്രട്ടേറിയറ്റ് നാളെ യോഗം ചേരും. സിപിഎം സംസ്ഥാന നേതൃത്വത്തിന്‍റെ നിർദേശപ്രകാരമാണ് യോഗം നടക്കുന്നത്. സംസ്ഥാന സമിതി അംഗത്തിന്‍റെ സാന്നിധ്യത്തിലായിരിക്കും യോഗം നടക്കുകയെന്നാണ് റിപ്പോർട്ട്.



വായ്പാ തട്ടിപ്പുമായി ബന്ധപ്പെട്ട് ബാങ്ക് ജീവനക്കാർ, ഭരണ സമിതി അംഗങ്ങൾ എന്നിവർ ഉൾപ്പെടെ ആറ് പേരിൽ നിന്ന് സിപിഎം വിശദീകരണം തേടിയിരുന്നു. കേസിലെ മുഖ്യപ്രതി ഉൾപ്പെടെ മൂന്നുപേർ സിപിഎം അംഗങ്ങളാണ്. ഇവരിൽ രണ്ട് പേരാകട്ടെ ലോക്കൽ കമ്മിറ്റി അംഗങ്ങളും. മാനേജർ ബിജു കരീം സിപിഎം പൊറത്തിശ്ശേരി ലോക്കൽ കമ്മിറ്റി അംഗവും സെക്രട്ടറി ടിആർ സുനിൽ കുമാർ കരുവന്നൂർ ലോക്കൽ കമ്മിറ്റി അംഗവുമാണെന്നാണ് റിപ്പോർട്ട്. ചീഫ് അക്കൗണ്ടന്‍റ് സി കെ ജിൽസ് പാർട്ടി അംഗമാണെന്നും ഏഷ്യാനെറ്റ് ന്യൂസ് റിപ്പോർട്ട് പറയുന്നു.

Also Read : അമ്പലപ്പുഴയിലെ തെരഞ്ഞെടുപ്പ് വീഴ്ച; സിപിഎം അന്വേഷണ കമ്മീഷൻ തെളിവെടുപ്പ് ഇന്ന് മുതൽ



ബാങ്ക് അഡ്മിനിസ്ട്രേറ്റർക്കെതിരെ ബിജെപിയും രംഗത്തെത്തിയിട്ടുണ്ട്. നേരത്തെ പരാതി ലഭിച്ചപ്പോൾ ഒതുക്കി തീർക്കാൻ ശ്രമിച്ച അസിസ്റ്റന്‍റ് രജിസ്ട്രാറെയാണ് ഇപ്പോൾ അഡ്മിമിനിസ്ട്രർ ആയി നിയമിച്ചിരിക്കുന്നതെന്നാണ് ആരോപണം. സിപിഎമ്മിനെ സഹായിക്കാനാണ് ഇത്തരത്തിൻ നിയമനം നടത്തിയതെന്നാണ് ആക്ഷേപം.

വാക്‌സിൻ നൽകുന്നതിൽ കേരളം ദേശീയ ശരാശരിയേക്കാൾ മുന്നിൽ; ബാക്കിയുള്ളത് 4,99,000 വാക്‌സിനെന്നും മുഖ്യമന്ത്രി

കരുവന്നൂർ ബാങ്ക് തട്ടിപ്പ് ഇന്നലെ പ്രതിപക്ഷം നിയമസഭയിലും ഉന്നയിച്ചിരുന്നു. കരുവന്നൂർ സഹകരണ ബാങ്കിൽ നടന്ന 300 കോടിയുടെ തട്ടിപ്പ് സഭ നിർത്തിവച്ച് ചർച്ച ചെയ്യണം എന്നാവശ്യപ്പെട്ട് ഷാഫി പറമ്പിലാണ് അടിയന്തര പ്രമേയത്തിനു നോട്ടിസ് നൽകിയത്. എന്നാൽ സഹകരണ വകുപ്പിന്‍റെ അന്വേഷണത്തിലാണ് തട്ടിപ്പു കണ്ടെത്തിയതെന്നും ക്രൈംബ്രാഞ്ച് അന്വേഷണം നടക്കുന്ന സാഹചര്യത്തിൽ സഭ നിർത്തിവച്ചു ചർച്ച ചെയ്യേണ്ട ആവശ്യമില്ലെന്നും സഹകരണ മന്ത്രി പറഞ്ഞു.

ബാങ്കിൽ 104.37 കോടിയുടെ തട്ടിപ്പ് നടന്നതായും സഹകരണമന്ത്രി വി.എൻ.വാസവൻ സഭയെ അറിയിച്ചു. 7 ജീവനക്കാരെ സസ്പെൻഡ് ചെയ്തതായും മന്ത്രി പറഞ്ഞു.