മഹാരാഷ്ട്രയിൽ കനത്ത മഴയിൽ വ്യാപക നാശനഷ്ടം; രണ്ട് ദിവസത്തിനിടെ 129 മരണം

മുംബൈ: കഴിഞ്ഞ രണ്ട് ദിവസത്തിനിടയുണ്ടായ കനത്ത മഴയിലും മണ്ണിടിച്ചിലിലുമായി മഹാരാഷ്ട്രയിൽ 129 പേർ മരിച്ചു. പൂനെയിൽ മാത്രം 84,452 പേരെ സുരക്ഷിത സ്ഥലത്തേക്ക് മാറ്റിപ്പാർപ്പിച്ചിട്ടുണ്ട്. പല ഇടങ്ങളിൽ നിന്നും ആളുകളെ ഒഴിപ്പിക്കുന്നത് തുടരുകയാണ്. മരിച്ചവരിൽ 38 പേർ റായ്ഗഡിലെ മണ്ണിടിച്ചിലില്‍ പെട്ടവരാണെന്നും ടൈംസ് ഓഫ് ഇന്ത്യ റിപ്പോർട്ട് ചെയ്തു.

“കഴിഞ്ഞ 48 മണിക്കൂറിനിടയിൽ മഹാരാഷ്ട്രയിൽ മഴക്കെടുതിയിൽ മരിച്ചവരുടെ എണ്ണം 129 ആണ്. കൂടുതൽ മരണങ്ങൾ റിപ്പോർട്ട് ചെയ്തിരിക്കുന്നത് റായ്ഗഡ്, സതാര ജില്ലകളിലാണ്” സംസ്ഥാന ദുരന്ത നിവാരണ അതോറിറ്റിയിലെ ഉദ്യോഗസ്ഥൻ പറഞ്ഞു.

Also Read : ജി സുധാകരനെതിരെ നടപടിയുണ്ടാകുമോ? അമ്പലപ്പുഴയിലെ തെരഞ്ഞെടുപ്പ് വീഴ്ച; സിപിഎം അന്വേഷണ കമ്മീഷൻ തെളിവെടുപ്പ് ഇന്ന് മുതൽ



മണ്ണിടിച്ചിലിന് പുറമെ പലയിടങ്ങിലുമുണ്ടായ പ്രളയമാണ് ജനങ്ങൾക്ക് ദുരിതമായിരിക്കുന്നത്. സതാര ജില്ലയിൽ മാത്രം 127 പേർ മരിച്ചെന്നാണ് ഔദ്യോഗിക കണക്കുകൾ വ്യക്തമാക്കുന്നത്. കിഴക്കന്‍ ജില്ലകളായ ഗോണ്ടിയ, ചന്ദ്രപൂര്‍ എന്നിവിടങ്ങളിലും മരണങ്ങൾ റിപ്പോർട്ട് ചെയ്തിട്ടുണ്ട്. സൈന്യവും എന്‍ഡിആര്‍എഫും, നാട്ടുകാരും ചേര്‍ന്നുള്ള രക്ഷാപ്രവര്‍ത്തനം വിവിധയിടങ്ങളില്‍ തുടരുകയാണ്.

റായ്ഗഡ് ജില്ലയിൽ മണ്ണിടിച്ചിലിനെത്തുടർന്നുണ്ടായ അപകടത്തിൽ നിരവധിയാളുകളെ കാണാതെയായിട്ടുണ്ട്. സതാരയിലെ പത്താന്‍ തഹ്സിലിലെ അംബേഗര്‍, മിര്‍ഗാവ് ഗ്രാമങ്ങളിലും വീടുകള്‍ മണ്ണിനടിയിലായിട്ടുണ്ട്. മഹദിൽ എൻഡിആർഎഫും പ്രാദേശിക ഭരണകൂടവും ചേർന്നാണ് രക്ഷാപ്രവർത്തനം നടത്തുന്നത്.

കരുവന്നൂർ വായ്പ തട്ടിപ്പ്: സിപിഎം അംഗങ്ങൾക്കെതിരായ നടപടി ചർച്ച ചെയ്യാൻ നാളെ ജില്ല സെക്രട്ടേറിയറ്റ് യോഗം

അതിനിടെ കനത്ത മഴയെത്തുടര്‍ന്നുണ്ടായ മണ്ണിടിച്ചിലില്‍ ഗോവയില്‍ തീവണ്ടി പാളം തെറ്റി. മംഗളൂരുവില്‍ നിന്ന് മുംബൈയിലേക്ക് പോയ പാസഞ്ചര്‍ തീവണ്ടിയുടെ മേലാണ് മണ്ണിടിഞ്ഞ് വീണത്. യാത്രക്കാര്‍ക്കാർക്കും പരിക്കില്ല. പാളം തെറ്റിയ കോച്ചിലെ യാത്രക്കാരെ മറ്റ് കോച്ചുകളിലേക്ക് മാറ്റി തീവണ്ടി കൂലം സ്‌റ്റേഷനിലേക്ക്‌ യാത്ര തിരിക്കുകയായിരുന്നെന്നാണ് ഇംഗ്ലീഷ് വാർത്താ ചാനലായ എൻഡിടിവി റിപ്പോർട്ട് ചെയ്യുന്നത്.