സൗന്ദര്യത്തിന് സഹായിക്കുന്ന വീട്ടുവൈദ്യങ്ങള്‍ പലതുണ്ട്. ആരോഗ്യത്തിന് സഹായിക്കുന്ന ചിലതെല്ലാം സൗന്ദര്യത്തിനും സഹായിക്കുന്നവയാണ്. പ്രത്യേകിച്ചും പല പച്ചക്കറികളും പഴവര്‍ഗങ്ങളും ഈ ഗണത്തില്‍ പെടുന്നു. ആരോഗ്യപരമായ ഗുണങ്ങള്‍ ഒത്തിണങ്ങിയ ഒന്നാണ് മാതള നാരങ്ങ അഥവാ പോംഗ്രനേറ്റ്. ഇത് നല്‍കുന്ന ആരോഗ്യപരമായ ഗുണങ്ങള്‍ പലതാണ്. ഇതു പോലെ തന്നെ ഇത് സൗന്ദര്യത്തിനും ഉപയോഗിയ്ക്കാം. ഇതിന്റെ നീരും ഇതിന്റെ തൊലി ഉണക്കപ്പൊടിച്ചതുമെല്ലാം സൗന്ദര്യസംരക്ഷണത്തിന് ഉപയോഗിയ്ക്കാം. ഇതെക്കുറിച്ചറിയൂ.

ആന്റി ഓക്‌സിഡന്റുകൾ

ഗ്രീൻ ടീയേക്കാൾ കൂടുതൽ ആന്റി ഓക്‌സിഡന്റുകൾ മാതളനാരങ്ങയിൽ അടങ്ങിയിട്ടുണ്ട്. വിറ്റാമിൻ എ, ഇ, സി എന്നിവയും ഈ പഴത്തിൽ അടങ്ങിയിട്ടുണ്ട്. ഈ പോഷകങ്ങളൊക്കെ നമ്മുടെ ചർമ്മത്തെ പോഷിപ്പിക്കുക മാത്രമല്ല, ചർമ്മത്തിന് കേടുപാടുകൾ വരുത്തുന്ന ഫ്രീ റാഡിക്കലുകളുമായി പോരാടുകയും ചെയ്യുന്നു. എല്ലാ ചർമ്മ തരങ്ങളിലും മാതളനാരങ്ങ മികച്ച രീതിയിൽ പ്രവർത്തിക്കുന്നു. മുഖക്കുരു, ഹൈപ്പർ പിഗ്മെന്റേഷൻ എന്നിവ കുറയ്ക്കാൻ മാതളനാരങ്ങ സഹായിക്കുന്നു. യുവത്വം നിലനിർത്താൻ സഹായിക്കുന്ന മികച്ച ഗുണങ്ങളും ചർമ്മത്തിന് തിളക്കമേകുന്ന ഗുണങ്ങളും ഇതിലുണ്ട്.

​മുഖക്കുരുവും പാടുകളും

മുഖക്കുരുവും പാടുകളും ഇല്ലാതാക്കുന്നതിന് ഏറ്റവും മികച്ച പരിഹാര മാർഗ്ഗമായ മാതളനാരങ്ങയുടെ തൊലി വെറുതെ കളയരുത്. ചർമ്മത്തിലെ കൊളാജൻ നശിക്കുന്നത് തടയുന്നതിലൂടെ ഇത് ചർമ്മ കോശങ്ങളുടെ വളർച്ചയെ പ്രോത്സാഹിപ്പിക്കുന്നു. കഠിനമായ മുഖക്കുരുവിനും അതിന്റെ പാടുകൾക്കുമുള്ള ചികിത്സയ്ക്ക് ഇത് നന്നായി പ്രവർത്തിക്കുന്നു. ദോഷകരമായ അൾട്രാവയലറ്റ് വികിരണങ്ങളിൽ നിന്ന് ചർമ്മത്തെ സംരക്ഷിക്കുന്ന സംരക്ഷണ സവിശേഷതകൾ അടങ്ങിയ ഇവ പ്രകൃതിദത്തമായി നിർജ്ജീവ ചർമ്മ കോശങ്ങളെ നീക്കം ചെയ്യുവാനും സഹായകരമായി വർത്തിക്കുന്നു.

​ചർമ്മത്തിന്

ചർമ്മത്തിന് പ്രായം തോന്നിക്കുന്നത് തടയുവാനും ചർമ്മത്തെ മനോഹരമാക്കുവാനും ഇത് സഹായിക്കുകയും ചെയ്യുന്നു. ഇത് മങ്ങിയതും വരണ്ടതുമായ ചർമ്മത്തിൽ ജലാംശം പകരുകയും പോഷിപ്പിക്കുകയും ചെയ്യുന്നു. മാത്രമല്ല, മുഖക്കുരുവിനെ തടയുവാനും സുഖപ്പെടുത്തുവാനും, സൂര്യതാപത്തിൽ നിന്ന് സംരക്ഷണമേകുവാനും മാതളം സഹായിക്കുന്നു. മാതളനാരങ്ങയിലെ പ്യൂണിസിക് ആസിഡ് മുടിയുടെ വളർച്ച ത്വരിതപ്പെടുത്തുകയും രോമകൂപങ്ങളെ ശക്തിപ്പെടുത്തുകയും ചെയ്യുന്നു.

​ചർമ്മത്തിലെ ചുളിവുകൾ

ചർമ്മത്തിലെ ചുളിവുകൾ അകറ്റാൻ മാതളനാരങ്ങയുടെ തൊലി വളരെയധികം ഫലപ്രദമാണ്. കൂടാതെ, യുവത്വം തുളുമ്പുന്ന ചർമ്മം നേടുവാനും ഇത് സഹായിക്കുന്നു.ചർമ്മത്തിലെ നിർജ്ജീവ കോശങ്ങളെ നീക്കം ചെയ്യാൻ മാതളനാരങ്ങ സഹായിക്കുന്നു. ബ്ലാക്ക് ഹെഡ്‍സും വൈറ്റ് ഹെഡ്‍സും നീക്കംചെയ്യാൻ ഇത് ഏറെ ഫലപ്രദമാണ്. കൂടാതെ, ഇവ ഉപയോഗിക്കുന്നത് കൊണ്ട് ചർമ്മത്തിൽ യാതൊരുവിധ പ്രശ്‌നങ്ങളുംഉണ്ടാവുകയുമില്ല. നിങ്ങളുടെ ചർമ്മത്തെ തിളക്കമാർന്നതും മനോഹരവുമാക്കുന്ന ഒരു രഹസ്യ സൗന്ദര്യ വർദ്ധക വസ്തുവാണത്. ഇതിന്റെ നീര് മുഖത്തു പുരട്ടാം. ഇതിന്റെ തൊലി, വിത്ത് എന്നിവ ഉണക്കിപ്പൊടിച്ചോ മറ്റോ ഫേസ്പായ്ക്കായി ഉപയോഗിയ്ക്കാം. Also read: പരീക്ഷിക്കാം മത്തങ്ങ കൊണ്ടൊരു സൗന്ദര്യ കൂട്ട്