ഹജ്ജ് തീര്‍ഥാടനം കഴിഞ്ഞ് തിരികെയെത്തിയവര്‍ കൊവിഡ് ടെസ്റ്റിന് വിധേയരാവുകയോ ഐസൊലേഷനില്‍ കഴിയുകയോ വേണ്ടതില്ലെന്ന് സൗദി ആരോഗ്യ മന്ത്രാലയം അറിയിച്ചു. ഹജ്ജ് കഴിഞ്ഞ് കുടുംബത്തോടൊപ്പം ചേരുന്നതിന് മുമ്പ് ഇവയുടെ ആവശ്യമുണ്ടോ എന്നതുമായി ബന്ധപ്പെട്ട് വ്യാപകമായി സംശയങ്ങള്‍ ഉയര്‍ന്നു.
പരിശോധന ലക്ഷണങ്ങളുണ്ടെങ്കില്‍ മാത്രം
നേരത്തേ തന്നെ രണ്ട് ഡോസ് വാക്സിന് സ്വീകരിച്ചവര്‍ക്കു മാത്രമാണ് ഇത്തവണ ഹജ്ജിന് അനുമതി നല്‍കിയത് എന്നതിനാല്‍ അവര്‍ക്ക് കൊവിഡ് ടെസ്റ്റോ ഐസൊലേഷനോ വേണ്ടതില്ലെന്നും അദ്ദേഹം അറിയിച്ചു. അതേസമയം, രണ്ടാഴ്ചയ്ക്കകം എന്തെങ്കിലും കൊവിഡ് ലക്ഷണങ്ങള്‍ പ്രകടിപ്പിക്കുന്ന പക്ഷം അവര്‍ പരിശോധിച്ച് കൊവിഡ് ഇല്ലെന്ന് ഉറപ്പുവരുത്തണമെന്നും അദ്ദേഹം കൂട്ടിച്ചേര്‍ത്തു. 60,000ത്തോളം തീര്‍ഥാടകര്‍ ഉള്‍പ്പെടെ ഒരു ലക്ഷത്തോളം പേര്‍ പങ്കെടുത്ത ഹജ്ജ് തീര്‍ഥാടന വേളയില്‍ ആര്‍ക്കും കൊവിഡ് ബാധ റിപ്പോര്‍ട്ട് ചെയ്യപ്പെട്ടിട്ടില്ലെന്ന് സൗദി ആരോഗ്യ മന്ത്രി ഡോ. തൗഫീഖ് അല്‍ റബീഅ അറിയിച്ചു.
മുഴുവന്‍ ഹാജിമാരും മക്കയില്‍ നിന്ന് മടങ്ങി
അതിനിടെ, ഹജ്ജ് കര്‍മങ്ങള്‍ പൂര്‍ത്തിയാക്കിയ ശേഷം തീര്‍ഥാടകര്‍ മക്കയില്‍ നിന്ന് വീടുകളിലേക്ക് മടങ്ങി. വ്യാഴാഴ്ച ഉച്ചയോടെ മക്കയിലെ ഗ്രാന്റ് മസ്ജിദില്‍ ചെന്ന് കഅബയ്ക്കു ചുറ്റും വിടവാങ്ങള്‍ പ്രദക്ഷിണം (ത്വവാഫുല്‍ വിദാ) നിര്‍വഹിച്ച ശേഷമായിരുന്നു മടക്കം. കൊവിഡ് വ്യാപനത്തിന്റെ പശ്ചാത്തലത്തില്‍ സൗദിയില്‍ താമസിക്കുന്ന സ്വദേശികളും വിദേശികളും ഉള്‍പ്പെടെ 60,000ത്തോളം പേര്‍ക്ക് മാത്രമാണ് ഇത്തവണ ഹജ്ജ് തീര്‍ഥാടനത്തിന് അനുമതി ലഭിച്ചത്. കൊവിഡ് വ്യാപന സാധ്യത തടയാന്‍ ശക്തമായ മുന്നൊരുക്കങ്ങളായിരുന്നു സൗദി അധികൃതര്‍ നടപ്പിലാക്കിയത്.
നാളെ മുതല്‍ ഉംറ ബുക്കിംഗ് പുനരാരംഭിക്കും
ഹജ്ജ് തീര്‍ത്ഥാടനം ആരംഭിക്കുന്നതിന്റെ ഭാഗമായി ജൂലൈ 11 നിറുത്തിവച്ച ഉംറ തീര്‍ത്ഥാടനം നാളെ മുതല്‍ പുനരാരംഭിക്കും. സൗദിയ എയര്‍ലൈന്‍സില്‍ ടിക്കറ്റെടുക്കുന്നവര്‍ക്ക് ജൂലൈ 25 മുതല്‍ ഉംറ പെര്‍മിറ്റ് അനുവദിക്കും. ആദ്യ ഘട്ടത്തില്‍ പ്രതിദിനം 20,000 പേര്‍ക്കാണ് ഉംറക്ക് അനുമതി നല്‍കുക. കൊവിഡ് സാഹചര്യം വിലയിരുത്തിയ ശേഷം ഘട്ടംഘട്ടമായി തീര്‍ത്ഥാടകരുടെ എണ്ണം വര്‍ധിപ്പിച്ച് ഹജ്ജിന് മുമ്പുണ്ടായിരുന്ന എണ്ണത്തിലേക്ക് എത്തിക്കുവാനാണ് നീക്കം. അതിനിടെ, ജിദ്ദയിലേക്കും ത്വാഇഫിലേക്കും വിമാന യാത്രക്ക് ടിക്കറ്റെടുക്കുന്നവര്‍ക്ക് ഉംറ പെര്‍മിറ്റ് നല്‍കുമെന്ന് ദേശീയ വിമാനകമ്പനിയായ സൗദിയ എയര്‍ലൈന്‍സ് അറിയിച്ചു. ഉംറ പെര്‍മിറ്റ് അനുവദിച്ച് തുടങ്ങുന്ന 25 മുതല്‍ സൗദിയ വെബ്‌സൈറ്റ് വഴി ഈ സേവനവും ലഭ്യമാകും. തവക്കല്‍നാ, ഇഅ്തമര്‍നാ ആപ്ലിക്കേഷനുകളില്‍ രജിസ്റ്റര്‍ ചെയ്ത മൊബൈല്‍ നമ്പറാണ് ടിക്കെറ്റെടുക്കുമ്പോള്‍ നല്‍കേണ്ടത്. ടിക്കറ്റ് ബുക്ക് ചെയ്യുമ്പോള്‍ തന്നെ യാത്രക്കാരന്‍ ഉംറക്ക് അര്‍ഹതയുളള ആളാണോ എന്ന് ഹജ്ജ് ഉംറ മന്ത്രാലയം പരിശോധിക്കും. ഉംറ പെര്‍മിറ്റ് അനുവദിക്കുന്നതോടെ യാത്രക്കാരന്റെ തവക്കല്‍നായിലും ഇഅ്തമര്‍നയിലും ഉംറ പെര്‍മിറ്റ് തെളിയുകയും മൊബൈലില്‍ സന്ദേശം ലഭിക്കുകയും ചെയ്യും.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : report on neither covid test nor isolation required for pilgrims come back after hajj 2021
Malayalam News from malayalam.samayam.com, TIL Network
