സ്വന്തമായി വികസിപ്പിച്ചടുത്ത കൊവിഡ്-19 വാക്സിന് ഇറാന്‍ അടിയന്തര ഉപയോഗത്തിന് അനുമതി നല്‍കി കഴിഞ്ഞു. പാശ്ചാത്യ വാക്സിനുകളെ തള്ളിപ്പറഞ്ഞ ഇറാന്‍ പരമോന്നത നേതാവ് അയത്തുള്ള അലി ഖമനെയ് രണ്ട് ഡോസുകളും സ്വീകരിച്ചു.
ഇറാൻ പരമോന്നത നേതാവ് അലി ഖമനെയ് കൊവിഡ് വാക്സിൻ സ്വീകരിക്കുന്നു. Photo: AP
പൂര്‍ണമായും ഇറാനില്‍ നിര്‍മിച്ച ആദ്യ വാക്‌സിനായ കൊവ്ഇറാന്‍ ബറെകാത്തിനാണ് (COVIRAN BAREKAT) സര്‍ക്കാര്‍ അടിയന്തിര ഉപയോഗ അനുമതി നല്‍തിയത്. പിന്നാലെ രാജ്യത്തെ പരമോന്നത നേതാവ് ആയത്തുള്ള അലി ഖമനെയി ആദ്യ ഡോസ് വാക്സിന് സ്വീകരിക്കുകയും ചെയ്തു. ‘അനുഗ്രഹം’ എന്നാണ് ബറെകാത് എന്ന പേര്‍ഷ്യന്‍ പദത്തിന്‍റെ അര്‍ത്ഥം
വാക്‌സിനെ ദേശീയ അഭിമാനം എന്ന് വിശേഷിപ്പിച്ച ഖമനെയ് തനിക്ക് മറ്റ് രാജ്യങ്ങള്‍ നിര്‍മിച്ച വാക്‌സിനുകള്‍ ഉപയോഗിക്കാന്‍ താല്‍പര്യമില്ല എന്നും ഇറാന്‍ ഇത് കണ്ടുപിടിക്കുന്നത് വരെ കാത്തിരിക്കാന്‍ തയ്യാറായിരുന്നു എന്നും പറഞ്ഞു. 82-കാരനായ ഖമനെയ് മുന്‍പ് ധാരാളം ആരോഗ്യപ്രശ്‌നങ്ങള്‍ നേരിട്ടിരുന്നു
ടെഹ്‌റാന്‍ ആസ്ഥാനമായ ഷിഫഫാര്‍മ്ഡ് മരുന്ന് കമ്പനിയാണ് കൊവ്ഇറാന്‍ വാക്സിന് നിര്‍മാണത്തിന് പിന്നില്‍
നിലവില്‍ മാസം മൂന്ന് ദശലക്ഷം ഡോസ് ഉത്പാദിപ്പിക്കുന്നുണ്ടെന്നും ഇത് 11 ദശലക്ഷം ഡോസാക്കി ഉയര്‍ത്തി മിഡില്‍ ഈസ്റ്റിലെ ഏറ്റവും വലിയ വാക്സിന് നിര്‍മാതാക്കള്‍ എന്ന സ്ഥാനം നേടുമെന്നുമാണ് ഇറാന്‍ ഭരണനിര്‍വഹണ കാര്യാലയം സെതാദ് അവകാശപ്പെടുന്നത്
കൊവിഡ് 19ന്‍റെ തുടക്കം മുതലേ ഏറ്റവുമധികം വൈറസ് കേസുകള്‍ റിപ്പോര്‍ട്ടു ചെയ്‍ത രാജ്യങ്ങളിലൊന്നായിരുന്നു ഇറാന്‍. ചൈനക്ക് പിന്നാലെ ഇറ്റലിയിലും സ്‌പെയിനിലുമെല്ലാം വൈറസ് കത്തിപ്പടര്‍ന്ന സമയത്ത് ഏഷ്യയില്‍ വൈറസിന്‍റെ ഭീഷണി ഏറ്റവുമധികം നേരിട്ടത് ഇറാനായിരുന്നു.
അന്താരാഷ്ട്ര വാര്‍ത്താ മാധ്യമം അല്‍ ജസീറയുടെ കണക്ക് പ്രകാരം ഏകദേശം 83,000 ജീവനുകളാണ് ഇറാനില്‍ ഈയടുത്ത് കനത്ത നാശം വിതച്ച നാലാം തരംഗത്തിനിടെ നഷ്ടമായത്. അഞ്ചാം തരംഗം ഉടന്‍ ആരംഭിക്കും എന്ന മുന്നറിയിപ്പും രാജ്യത്ത് നല്‍കിക്കഴിഞ്ഞു
കഴിഞ്ഞ വര്‍ഷം ഡിസംബറിലാണ് സ്വന്തം വാക്സിന് നിര്‍മാണത്തിനുള്ള നടപടികള്‍ ഇറാന്‍ ആരംഭിക്കുന്നത്. ഏകദേശം ആറ് മാസത്തെ പരീക്ഷണങ്ങള്‍ക്ക് ശേഷം ഇക്കഴിഞ്ഞ ജൂണ്‍ 14ന് ലൈസന്‍സ് നേടുകയും ഇപ്പോള്‍ ആദ്യ ഡോസ് നല്‍കുകയും ചെയ്തു. ഈ വര്‍ഷം ഫെബ്രുവരിയില്‍ തന്നെ രാജ്യത്ത് പൊതു വാക്‌സിനേഷന്‍ ആരംഭിച്ചിരുന്നു. റഷ്യയുടെ സ്‍പുട്‍നിക് ആണ് ഇറാനില്‍ കൂടുതലായും ഉപയോഗിക്കുന്നത്.
‘ഇന്ത്യന്‍ ഡെല്‍റ്റ വകഭേദത്തിനെതിരെ കാര്യക്ഷമമായ ആന്‍റിബോഡികള്‍ സൃഷ്ടിക്കാന്‍ നമ്മുടെ പുതിയ വാക്സിന് കഴിയുന്നുണ്ട്. ന്യൂട്രലൈസേഷന്‍ ടെസ്റ്റുകളിലൂടെ അത് തെളിയിച്ചു കഴിഞ്ഞു’ കൊവ്ഇറാന്‍ വാക്സിന് ക്ലിനിക്കല്‍ ട്രയലുകള്‍ മേല്‍നോട്ടം വഹിച്ച ഡോ. മൊഹമ്മദ് റേസ സലേഹി വ്യക്തമാക്കുന്നു
ഡെല്‍റ്റ വകഭേദത്തിനെതിരെ 18 മുല്‍ 75 വയസ്സുവരെ പ്രായക്കാര്‍ക്കിടയില്‍ 93.3 ശതമാനം ഫലപ്രദമാണ് തങ്ങളുടെ വാക്സിന് എന്നാണ് നിര്‍മാതാക്കളുടെ അവകാശവാദം. എന്നാല്‍ വാക്‌സിന്‍റെ കൂടുതല്‍ ശാസ്ത്രീയ വിവരങ്ങള്‍ പുറത്തു വിടാന്‍ ഇറാന്‍ വിസമ്മതിക്കുകയാണ്. കൂടാതെ ഏഷ്യയിലെയും ലാറ്റിന്‍ അമേരിക്കയിലെയും യൂറോപ്പിലെയും 12 രാജ്യങ്ങള്‍ തങ്ങളുടെ വാക്സിന് വാങ്ങാന്‍ താല്‍പര്യം അറിയിച്ചിട്ടുണ്ട് എന്നും ഷിഫഫാര്‍മ്ഡ് അവകാശപ്പെടുന്നു
ക്യൂബയുമായി സഹകരിച്ച് ഇറാനിലെ പാസ്റ്റോര്‍ ഇന്‍സ്റ്റിറ്റ്യൂട്ട് വികസിപ്പിക്കുന്ന പാസ്റ്റ് കൊവാക് വാക്സിന് പ്രധാനമായും വൈറസിന്‍റെ ദക്ഷിണാഫ്രിക്കന്‍ വകഭേദത്തിനെതിരെയാണ് മികച്ചതെന്ന് ഇന്‍സ്റ്റിറ്റ്യൂട്ട് മേധാവി അലിറേസ ബിഗ്ലാരി അഭിപ്രായപ്പെട്ടത് ദിവസങ്ങള്‍ക്ക് മുന്‍പ് മാത്രമാണ്. അദ്ദേഹത്തിന്‍റെ അഭിപ്രായത്തില്‍ ഓക്‌സഫോര്‍ഡിന്റെ ആസ്ട്രാ സെനക വാക്സിന് നോര്‍മല്‍ കൊറോണ വൈറസിനെതിരെ 70 ശതമാനം ഫലപ്രാപ്തിയുണ്ടെങ്കിലും ദക്ഷിണാഫ്രിക്കന്‍ വകഭേദത്തിന് മുന്നില്‍ പരാജയപ്പെടുന്നുണ്ട് എന്നാണ്.
വിദേശ വാക്‌സിനുകള്‍ക്കെതിരെ ഇറാനിയന്‍ നേതാക്കളില്‍ നിന്ന് മുന്‍പും ഇത്തരം പ്രസ്താവനകള്‍ വന്നിട്ടുണ്ട്. അമേരിക്കയുടേയും (മൊഡേണ) യൂറോപ്പിന്‍റെയും (ആസ്ട്രസെനേക്ക) വാക്സിനുകളെ ‘ഒരിക്കലും വിശ്വസിക്കാനാകാത്തത്’ എന്നാണ് മുന്‍പ് ഖമനേയി പേരെടുത്ത് പറഞ്ഞ് വിമര്‍ശിച്ചത്. ഇത്തരം പ്രസ്താവനകള്‍ ജനങ്ങളെ വാക്സിന് എടുക്കുന്നതില്‍ നിന്ന് പിന്തിരിപ്പിക്കുകയും ചെയ്തു. ഇറാനിയന്‍ ആരോഗ്യ മന്ത്രാലയം പുറത്തു വിട്ട ഏറ്റവും പുതിയ റിപ്പോര്‍ട്ട് പ്രകാരം രാജ്യത്തെ മൊത്തം ജനസംഖ്യയുടെ ആകെ അഞ്ച് ശതമാനം മാത്രമാണ് വാക്സിന് സ്വീകരിച്ചിട്ടുള്ളൂ
റഷ്യയും ഓസ്‌ട്രേലിയയുമായി ചേര്‍ന്ന് അടുത്ത സെപ്റ്റംബറോടെ കൂടുതല്‍ പുതിയ വാക്‌സിനുകള്‍ നിര്‍മിക്കാനുള്ള ശ്രമമാണ് ഇപ്പോള്‍ ഇറാനില്‍ നടക്കുന്നത്.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : iran covid-19 vaccine coviran barekat ali khamenei got jabbed things to know
Malayalam News from malayalam.samayam.com, TIL Network
