താജ്‍മഹലിന്‍റെ മൂന്നിരട്ടി വലിപ്പം ഉണ്ടെന്ന് ഗവേഷകര്‍ പറയുന്ന ഒരു ക്ഷുദ്രഗ്രഹം (2008 Go20) ജൂലൈ 25ന് ഭൂമിക്ക് അരികിലൂടെ പറക്കും. ഇതിന് മുൻപും ഈ ഛിന്നഗ്രഹം ഈ വഴി വന്നിട്ടുണ്ട്. ഇത്തവണയും അപകടങ്ങളിലാതെ പോകും
ഛിന്നഗ്രഹം ഭൂമിക്ക് അരികിൽ. Photo: Representative / Neale LaSalle from Pexels
ഈ ഛിന്നഗ്രഹം ഭൂമിക്ക് തൊട്ടരികിലൂടെ കടന്നുപോകുമെന്നാണ് യു.എസ് ബഹിരാകാശ ഏജൻസി, നാസ പ്രവചനം.
‘മണിക്കൂറില്‍ 18,000 മൈല്‍ വേഗതയിലാണ് ഇത് ഭൂമിയോട് അടുക്കുന്നത്. താജ്‍മഹലിന്‍റെ മൂന്നിരട്ടിയോളം വലുപ്പം ഇതിന് ഉണ്ട്.’– ക്ഷുദ്രഗ്രഹത്തിന്‍റെ വലിപ്പത്തെക്കുറിച്ച് നാസയുടെ കണക്കുകള്‍ ഉദ്ധരിച്ച് വിവിധ മാധ്യമങ്ങള്‍ റിപ്പോര്‍ട്ട് ചെയ്തു.
ഭൂമിയോട് വളരെ അടുത്തുവരുമെങ്കിലും, 0.04 ആസ്‌ട്രോണമിക് യൂണിറ്റ് (3,718,232 മൈല്‍) അകലെയാണ് ഛിന്നഗ്രഹമുള്ളത്. ഭൂമിക്ക് ഇത് യാതൊരു ഭീഷണിയും ഉണ്ടാക്കില്ല. അതിനാല്‍ ഛിന്നഗ്രഹത്തിന്‍റെ സഞ്ചാര പാതയില്‍ ആശങ്കപ്പെടേണ്ടതില്ലെന്നും നാസ വ്യക്തമാക്കി.
‘ ഇതേ ഛിന്നഗ്രഹം നേരത്തെയും ഭൂമിക്ക് വളരെ അടുത്തുകൂടി കടന്നുപോയിട്ടുണ്ട്. അതിനാല്‍ പരിഭ്രാന്തരാകേണ്ട കാര്യമില്ല. 2034 ല്‍ ഇത് വീണ്ടും ഭൂമിക്ക് അടുത്തുകൂടി കടന്നുപോകും.’– പാത്ത്‌സാമന്ത പ്ലാനറ്റോറിയം ഡെപ്യൂട്ടി ഡയറക്ടര്‍ ഡോ. സുവേന്ദു പട്‌നായിക് വാര്‍ത്താ ഏജന്‍സിയായ എ.എന്‍.ഐക്ക് നല്‍കിയ അഭിമുഖത്തില്‍ പറഞ്ഞു.
ഇന്ത്യന്‍ സമയം അനുസരിച്ച് 2021 ജൂലൈ 25 ന് രാത്രി 11.21 ന് ‘2008 Go20’ ഭൂമിയോട് ഏറ്റവും അടുത്ത് വരുമെന്നും ഡോ. പട്‌നായിക് പറഞ്ഞു.
1935 ലും 1977 ലും യഥാക്രമം 19 ലക്ഷം കിലോമീറ്ററും 29 ലക്ഷം കിലോമീറ്ററും അകലെയായിട്ടായിരുന്നു ഭൂമിക്ക് അരികെ ഈ ഛിന്നഗ്രഹം വന്നത്. ഇത്തവണ ഇത് 45 ലക്ഷം കിലോമീറ്റര്‍ അകലെയാണെന്നും അദ്ദേഹം കൂട്ടിച്ചേര്‍ത്തു.
‘പല ഛിന്നഗ്രഹങ്ങളും ചൊവ്വയ്ക്കും വ്യാഴത്തിനും ഇടയില്‍ സൂര്യനെ പരിക്രമണം ചെയ്യുന്നുണ്ട്. അവയുടെ വലിപ്പം ഒരു മീറ്റര്‍ മുതല്‍ നൂറുകണക്കിന് കിലോമീറ്റര്‍ വരെയാണ്. ഈ ദശലക്ഷക്കണക്കിന് ഛിന്നഗ്രഹങ്ങള്‍ ചിലപ്പോള്‍ ഗുരുത്വാകര്‍ഷണത്തിലൂടെ ഭൂമിക്ക് അടുത്തേക്ക് വരാറുണ്ട്. അവയില്‍ 99.9 ശതമാനം ഛിന്നഗ്രഹങ്ങളും ഭൂമിയുടെ ഉപരിതലത്തില്‍ എത്തുന്നതിനുമുമ്പ് തന്നെ അന്തരീക്ഷത്തില്‍ വച്ച് ചാരമാകും.’– ഡോ. സുവേന്ദു പട്‌നായിക് എ.എന്‍.ഐയോട് പറഞ്ഞു.
ഭൂമിയോട് വളരെ അടുത്തേക്ക് വരുന്നതിനാല്‍ സൗരയൂഥത്തില്‍ ഭൂമിയുടെ പരിസരത്ത് കറങ്ങി നടക്കുന്ന ഭീഷണിയായേക്കാവുന്ന ‘നിയര്‍-എര്‍ത്ത് ഒബ്ജക്ട്’ കൂട്ടത്തിലാണ് ഈ ഛിന്നഗ്രഹത്തെ നാസ ഉള്‍പ്പെടുത്തിയിരിക്കുന്നത്.
‘നിയര്‍-എര്‍ത്ത് ഒബ്ജക്ട്’ എന്ന പട്ടികയില്‍ 23,628 ലധികം വലിയ ഛിന്നഗ്രഹങ്ങളെയാണ് ശാസ്ത്രജ്ഞര്‍ ഉള്‍പ്പെടുത്തിയിട്ടുള്ളത്. അവ ഭൂമിയോട് അടുക്കുന്നുണ്ടോ എന്നും അവയുടെ ചലനങ്ങളും നിരന്തരം നിരീക്ഷിക്കുകയും ചെയ്യുന്നുണ്ട്. ഇവയില്‍ 1,045 ഛിന്നഗ്രഹങ്ങള്‍ മാത്രമേ അപകടകാരികള്‍ ആയിട്ടുള്ളൂ എന്നാണ് ശാസ്ത്രജ്ഞരുടെ വിലയിരുത്തല്‍.
ഛിന്നഗ്രഹം എന്താണ്?
ഒരു ഗ്രഹത്തിന് സമാനമായ വലിയ പാറപോലെ തോന്നിക്കുന്ന ശിലാവസ്തുവാണ് ഛിന്നഗ്രഹം. ഇവ സൂര്യന് ചുറ്റും ഭ്രമണം നടത്തുന്നു. അമേരിക്കന്‍ ബഹിരാകാശ ഏജന്‍സിയായ നാസയുടെ കണക്ക് അനുസരിച്ച് 994,383 ഛിന്നഗ്രഹങ്ങള്‍ നിലവില്‍ സൂര്യന് ചുറ്റും ഭ്രമണം നടത്തുന്നുണ്ട്. 4.6 ബില്യണ്‍ വര്‍ഷങ്ങള്‍ക്ക് മുമ്പ് ഉണ്ടായ സൗരയൂഥത്തിന്റെ അവശിഷ്ടങ്ങളാണ് ഇവ.
ഈ ഛിന്നഗ്രഹങ്ങളെ ശാസ്ത്രജ്ഞര്‍ മൂന്ന് വിഭാഗങ്ങളായി തിരിച്ചിട്ടുണ്ട്. വലിയ ഗ്രഹങ്ങള്‍ക്ക് ഒപ്പം ഭ്രമണപഥം പങ്കുവെക്കുന്നവരാണ് ഒന്നാമത്തെ വിഭാഗം. ട്രോജന്‍ എന്നാണ് ഇവയെ പൊതുവെ വിളിക്കുന്നത്.
അടുത്ത ഒരുകൂട്ടം ഛിന്നഗ്രങ്ങള്‍ ചൊവ്വ, വ്യാഴം എന്നീ ഗ്രഹങ്ങള്‍ക്ക് ഇടയില്‍ കാണപ്പെടുന്നവയാണ്. ഏകദേശം 1.1 മില്ല്യണ്‍ ഛിന്നഗ്രഹങ്ങള്‍ ഇവിടെ ഉള്ളതായാണ് കണക്ക്.
ഭൂമിയുടെ ഭ്രമണ പഥത്തില്‍ വരുന്നവയാണ് മൂന്നാമത്തെ വിഭാഗം. ‘നിയര്‍-എര്‍ത്ത് ഒബ്ജക്ട്’ (എന്‍.ഇ.എ)
എന്നാണ് ഇവയെ പൊതുവെ വിളിക്കുന്നത്. ഇത്തരത്തില്‍ 10,000 ത്തോളം ഛിന്നഗ്രഹങ്ങള്‍ ഉണ്ടെന്നാണ് കണക്ക്. അതില്‍ 1400 ഓളമാണ് അപകടകരമായിട്ടുള്ളത്.
ഛിന്നഗ്രഹത്തെ തകര്‍ക്കാന്‍ ചൈന
അടുത്ത അറുപതു വര്‍ഷത്തിനുള്ളില്‍ ഭൂമിയിലേക്ക് പതിക്കാന്‍ സാധ്യതയുള്ള ‘ബെനു’ എന്ന ഛിന്നഗ്രഹത്തെ തകര്‍ക്കാനുള്ള ശ്രമത്തിലാണ് ചൈനീസ് ഗവേഷകര്‍. വിവിധ മാധ്യമങ്ങള്‍ റിപ്പോര്‍ട്ട് ചെയ്തത് അനുസരിച്ച് ഈ ദൗത്യത്തിന്റെ ഭാഗമായി ചൈന ഇരുപതിലധികം റോക്കറ്റുകളാണ് വിക്ഷേപിക്കുന്നത്.
85.5 ദശലക്ഷം ടണ്‍ (77.5 ദശലക്ഷം മെട്രിക് ടണ്‍) ഭാരം കണക്കാക്കുന്ന ‘ബെനു’ എന്ന ഛിന്നഗ്രഹം 2175 നും 2199 നും ഇടയില്‍ ഭൂമിയുടെ ഭ്രമണപഥത്തിന്റെ 4.6 ദശലക്ഷം മൈല്‍ (7.5 ദശലക്ഷം കിലോമീറ്റര്‍) ചുറ്റളവില്‍ എത്തിച്ചേരുമെന്നാണ് ഇവരുടെ പ്രതീക്ഷ. എന്നാല്‍ ഈ ഛിന്നഗ്രഹം എത്രത്തോളം അപകടം സൃഷ്ടിക്കുമെന്ന് പറയാന്‍ കഴിയില്ലെന്നും ഇത് ഭീഷണി തന്നെയാണെന്നും ചൈനീസ് ഗവേഷകര്‍ ചൂണ്ടിക്കാട്ടുന്നു.
23 ലോംഗ് മാര്‍ച്ച് 5 റോക്കറ്റുകള്‍ ഒരേ സമയം ഛിന്നഗ്രഹത്തിനെതിരെ പ്രയോഗിക്കാമെന്ന പ്രതീക്ഷയിലാണ് ചൈനയിലെ ദേശീയ ബഹിരാകാശ ശാസ്ത്ര കേന്ദ്രത്തിലെ ശാസ്ത്രജ്ഞര്‍. അങ്ങനെയെങ്കില്‍ ഛിന്നഗ്രഹത്തെ 6,000 മൈല്‍ (9,000 കിലോമീറ്റര്‍) ഭൂമിയുടെ ദൂരത്തിന്റെ 1.4 ഇരട്ടി വരെ വഴി തിരിച്ചുവിടാന്‍ കഴിഞ്ഞേക്കുമെന്നാണ് ഇവരുടെ കണക്കുക്കൂട്ടല്‍.
‘ഭൗമോപരിതലത്തിലേക്ക് എത്തുന്ന ‘ബെനു’ എന്ന ഛിന്നഗ്രഹം ഭൂമിയിലെ എല്ലാ ജീവജാലങ്ങള്‍ക്കും ഭീഷണിയാണ്. ഭൂമിയുമായി കൂട്ടിയിടിക്കാന്‍ സാധ്യതയുള്ള ബെനുവിനെ ഒന്നിലധികം ചെറിയ കഷണങ്ങളായി മാറ്റുകയാണ് ലക്ഷ്യം.’– ബീജിംഗിലെ നാഷണല്‍ ബഹിരാകാശ ശാസ്ത്ര കേന്ദ്രത്തിലെ ബഹിരാകാശ ശാസ്ത്ര എഞ്ചിനീയറായ മിങ്ടാവോ ലി പറഞ്ഞു.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : asteroid 2008 go20 to pass through near earth 2021 july
Malayalam News from malayalam.samayam.com, TIL Network
