Sumayya P | Samayam Malayalam | Updated: 25 Jul 2021, 10:21:42 AM
സിംഹം, പുലികള്‍, കടുവകള്‍, ആടുകള്‍, ഒട്ടകങ്ങള്‍, കുതിരകള്‍, പൂച്ചകള്‍, പട്ടികള്‍ തുടങ്ങി 18 ഇനം മൃഗങ്ങളുടെ രക്ത സാമ്പിളുകളാണ് പരിശോധനയ്ക്കായി ഉപയോഗിക്കുക
18 ഇനം മൃഗങ്ങളുടെ രക്തസാമ്പിളുകള്‍ പരിശോധിക്കും
ഏത് ഇനം മൃഗങ്ങള്‍ക്കാണ് കൊവിഡ് ബാധ ഉണ്ടായതെന്നും ഏതൊക്കെ മൃഗങ്ങളിലാണ് വൈറസിനെതിരായ ആന്റിബോഡി രൂപപ്പെട്ടത് എന്നും കണ്ടെത്താനുള്ള ശ്രമമാണ് ഗവേഷകര്‍ ഇതിലൂടെ ലക്ഷ്യമിടുന്നത്. സിംഹം, പുലികള്‍, കടുവകള്‍, ആടുകള്‍, ഒട്ടകങ്ങള്‍, കുതിരകള്‍, പൂച്ചകള്‍, പട്ടികള്‍ തുടങ്ങി 18 ഇനം മൃഗങ്ങളുടെ രക്ത സാമ്പിളുകളാണ് പരിശോധനയ്ക്കായി ഉപയോഗിക്കുകയെന്ന് സെന്‍ട്രല്‍ വെറ്ററിനറി റിസേര്‍ച്ച് ലബേറട്ടറിയിലെ മൈക്രോബയോളജിസ്റ്റ് ഡോ. ഉള്‍റിച്ച് വെര്‍ണറി അറിയിച്ചു. ഗവേഷണത്തിന് 15 ലക്ഷം ദിര്‍ഹം ചെലവ് വരുമെന്നാണ് കരുതുന്നത്.
മാര്‍സ് വൈറസ് ബാധ കണ്ടെത്താനും പരീക്ഷണം നടത്തി
മൃഗങ്ങളില്‍ കൊവിഡിനെതിരായ ആന്റിബോഡി കണ്ടെത്തുകയാണെങ്കില്‍ അവയ്ക്ക് വൈറസ് ബാധയുണ്ടായതായി കണക്കാക്കാനാകും. നേരത്തേ 34 വര്‍ഷം മുമ്പെടുത്ത 50 ഒട്ടകങ്ങളുടെ സാമ്പിളുകള്‍ മെര്‍സ് വൈറസ് ബാധ കണ്ടെത്തുന്നതിനായി പരിശോധനയ്ക്കു വിധേയമാക്കിയിരുന്നു. 2000ത്തിനു ശേഷമാണ് മെര്‍സ് വൈറസ് ശാസ്ത്രജ്ഞര്‍ കണ്ടെത്തിയതെങ്കിലും അതിനു പതിറ്റാണ്ടുകള്‍ മുമ്പ് തന്നെ മെര്‍സ് വൈറസിനെതിരായ ആന്റിബോഡി മൃഗങ്ങളില്‍ കണ്ടെത്തിയിരുന്നതായി തങ്ങളുടെ പഠനത്തിലൂടെ ബോധ്യമായെന്നും അദ്ദേഹം അറിയിച്ചു. ഏതെല്ലാം മൃഗങ്ങള്‍ക്കാണ് കൊവിഡ് ബാധ ഉണ്ടായിരുന്നതെന്ന് മനസ്സിലാക്കിയാല്‍ അവയില്‍ നിന്ന് മനുഷ്യരിലേക്ക് പകരാനുള്ള സാധ്യതയും കണ്ടെത്താനാവുമെന്ന കണക്കുകൂട്ടലിലാണ് ഗവേഷകര്‍.
പരീക്ഷണത്തിനുള്ള നടപടികള്‍ തുടങ്ങി
പരീക്ഷണത്തിന്റെ ഭാഗമായി മൃഗങ്ങളുടെ 500ലേറെ രക്ത സാമ്പിളുകള്‍ ഫ്രീസറില്‍ നിന്നും പുറത്തെടുത്തതായി ഡോ. ഉള്‍റിച്ച് വെര്‍ണറി അറിയിച്ചു. രണ്ടാഴ്ചയ്ക്കിടയില്‍ പരീക്ഷണം പൂര്‍ണമാവുമെന്നാണ് കരുതുന്നത്. ആന്റിബോഡി പരിശോധനാ ഫലം അതേദിവസം തന്നെ അറിയാനാവും. പരീക്ഷണ ഫലം എന്താവുമെന്ന് ഇപ്പോള്‍ പറയാനാവില്ലെങ്കിലും പൂച്ചയിലും പട്ടിയിലും കൊവിഡ് ബാധയ്ക്കുള്ള സാധ്യത കൂടുതലാണെന്നാണ് ഗവേഷകരുടെ നിഗമനം. അടുത്തിടെയായി ഒട്ടകങ്ങളില്‍ ജീവനില്ലാത്ത കൊവിഡ് വൈറസ് കുത്തിവച്ച് നടത്തിയ പരീക്ഷണത്തില്‍ അവയില്‍ ആന്റിബോഡി രൂപം കൊണ്ടതായി കണ്ടെത്തിയിരുന്നു. ഇവയില്‍ നിന്നുള്ള ആന്റിബോഡികള്‍ മനുഷ്യരിലെ കൊവിഡ് ചികില്‍സയ്ക്ക് വലിയ മുതല്‍ക്കൂട്ടാകുമെന്നാണ് ഗവേഷകര്‍ കരുതുന്നത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : uae scientists create covid19 antibody test for animals
Malayalam News from malayalam.samayam.com, TIL Network
