കുണ്ടറ പീഡനം: മന്ത്രി എ കെ ശശീന്ദ്രൻ്റെ ഇടപെടലിൽ യുവതിയും കുടുംബവും ഇന്ന് ഗവർണറെ കാണും

കുണ്ടറ: പീഡന പരാതി ഒതുക്കി തീർക്കാൻ ഇടപെടൽ നടത്തിയ വനം മന്ത്രി എ കെ ശശീന്ദ്രനെതിരെ യുവതി ഇന്ന് ഗവർണർക്ക് പരാതി നൽകും. യുവതിയും കുടുംബവും രാജ്ഭവനിൽ എത്തി ഗവർണർ ആരിഫ് മുഹമ്മദ് ഖാനെ കാണുകയും പരാതി കൈമാറുകയും ചെയ്യും.



നിയമവിദഗ്ധരുടെ സഹായത്തോടെ തയ്യാറാക്കിയ പരാതിയാണ് യുവതിയും കുടുംബവും ഗവർണർക്ക് കൈമാറുക. കേസ് ഒത്ത് തീർപ്പാക്കാൻ മന്ത്രി നേരിട്ട് ഇടപെടുകയും ഫോണിൽ വിളിച്ച് സംസാരിക്കുകയും ചെയ്തുവെന്ന് പരാതിയിൽ ചൂണ്ടിക്കാട്ടും. ഗവർണർക്ക് പരാതി നൽകുന്നതിനൊപ്പം ദേശീയ മനുഷ്യവകാശ കമ്മീഷനും ദേശീയ വനിത കമ്മീഷനും പരാതി നൽകുമെന്നാണ് റിപ്പോർട്ട്.

മുല്ലപ്പെരിയാ‍റിലെ ജലനിരപ്പ് 135.80 അടി ; 140 ൽ എത്തിയാൽ ജാഗ്രതാ നിർദ്ദേശം പുറപ്പെടുവിക്കും

ബിജെപി സംസ്ഥാന അധ്യക്ഷൻ കെ സുരേന്ദ്രൻ യുവതിയുടെ വീട് സന്ദർശിക്കുകയും ഗവർണർക്ക് പരാതി നൽകണമെന്ന് വ്യക്തമാക്കുകയും ചെയ്തിരുന്നു. ഇത് പ്രകാരമാണ് ഗവർണറെ കാണാൻ കുടുംബം തീരുമാനിച്ചത്.

എൻസിപി നേതാവ് കൈയിൽ കയറി പിടിച്ചതിനെ തുടർന്ന് കഴിഞ്ഞ ജൂൺ 28നാണ് യുവതി പോലീസിൽ പരാതി നൽകിയത്. കുണ്ടറ പോലീസ് സ്റ്റേഷനിൽ നേരിട്ടെത്തി പരാതി നൽകിയെങ്കിലും 24 ദിവസത്തിന് ശേഷമാണ് പോലീസ് മൊഴി രേഖപ്പെടുത്തിയത്. തുടർന്നാണ് പ്രാഥമിക അന്വേഷണം നടത്താൻ പോലീസ് തയ്യാറായത്.

ആരോപണ വിധേയനായ മുൻ എൻസിപി നേതാവ് പത്‌മാകരൻ്റെ അറസ്റ്റ് വൈകുന്നതിൽ പ്രതിഷേധം തുടരുകയാണ്. അറസ്റ്റ് നടപടികൾ ഇനിയും വൈകിയാൽ കുണ്ടറ പോലീസ് സ്റ്റേഷന് മുന്നിൽ പ്രതിഷേധിക്കുമെന്ന നിലപാടിലാണ് യുവതിയും കുടുംബവും.

ഹോട്ടലിൽ പോയത് പാർസൽ വാങ്ങാൻ; കയ്യേറ്റം ചെയ്തത് കയ്യിൽ പിടിച്ചതിനാൽ; യുവാവിനെതിരെ പരാതികൊടുക്കുമെന്ന് രമ്യാ ഹരിദാസ്

പത്‌മാകരൻ യുവതിയുടെ കയ്യിൽ കേറി പിടിച്ചെന്ന കേസ് ഒത്തുതീർപ്പാക്കാൻ മന്ത്രി എകെ ശശീന്ദ്രൻ ഇടപെട്ടുവെന്നാണ് ആരോപണം. യുവതിയുടെ അച്ഛനെ മന്ത്രി ഫോൺ വിളിച്ച് സംസാരിക്കുന്നതിന്‍റെ ഓഡിയോ കുടുംബം പുറത്തുവിട്ടിരുന്നു. യുവതിയുടെ പിതാവുമായി മന്ത്രി സംസാരിക്കുന്നതിന്‍റെ ശബ്ദരേഖയാണ് പുറത്ത് വന്നത്. പ്രശ്‌നം അടിയന്തരമായി നല്ല നിലയില്‍ തീര്‍ക്കണമെന്നാണ് മന്ത്രി യുവതിയുടെ അച്ഛനോട് ആവശ്യപ്പെടുന്നത്.