കൊവിഡ് രണ്ടാം തരംഗത്തില്‍ നിന്ന് കേരളം കരകയറുന്നില്ല. ഉയര്‍ന്ന ടി.പി.ആര്‍ നിരക്കില്‍ സംസ്ഥാനം തുടരുന്നു. മറ്റു സംസ്ഥാനങ്ങള്‍ കേസുകള്‍ കുറച്ചപ്പോള്‍, രാജ്യത്തിന് തന്നെ ആശങ്കയാണ് കേരളത്തിലെ ഉയര്‍ന്ന കൊവിഡ് കണക്കുകള്‍.
കൊവിഡ് വാക്സിൻ. Photo: ANI/File
ടി.പി.ആര്‍ നിരക്കിലും കുറവ് വരുന്നില്ല. അടുത്ത ഒന്ന് രണ്ട് മാസത്തിനുള്ളില്‍ രാജ്യം മൂന്നാം തരംഗത്തിലേക്ക് നീങ്ങും എന്ന് കേന്ദ്രവും ആരോഗ്യവിദഗ്‍ധരും മുന്നറിയിപ്പ് തരുമ്പോള്‍ എങ്ങനെയായിരിക്കും കേരളം അത് മറികടക്കേണ്ടത് എന്നതാണ് വെല്ലുവിളി നിറഞ്ഞ ചോദ്യം.
ഒന്നാം തരംഗത്തെ ഫലപ്രദമായി പിടിച്ചു കെട്ടിയ സംസ്ഥാനമാണ് കേരളം. അന്ന് വളരെ കുറച്ച് പേര്‍ക്ക് മാത്രമേ രോഗം വന്നുള്ള. അപ്പോള്‍ മറ്റു സംസ്ഥാനങ്ങളിലെ സ്ഥിതി ഇതായിരുന്നില്ല. അതിനാല്‍ത്തന്നെ സ്വാഭാവികമായും അവര്‍ക്ക് ആന്‍റി ബോഡികള്‍ മൂലം പ്രതിരോധശേഷി കൂടുതലായി കൈവന്നിരിക്കാം എന്നാണ് ആരോഗ്യ വിദഗ്ദര്‍ അഭിപ്രായപ്പെടുന്നത്.
എന്തുകൊണ്ടായിരിക്കും കേരളത്തിലെ കേസുകള്‍ ഇത്രമാത്രം കൂടുന്നത് എന്ന കാര്യത്തില്‍ വിദഗ്‍ധര്‍ക്കിടയില്‍ പല അഭിപ്രായങ്ങളുമുണ്ട്. കഴിഞ്ഞ ഒരു മാസത്തോളമായി പതിനായിരത്തിന് മുകളിലാണ് കേരളത്തിലെ കേസുകള്‍.
രാജ്യത്തെ മൊത്തം കേസുകള്‍ മുന്‍പത്തേതില്‍ നിന്ന് നേര്‍ പകുതിയായി കുറയുകയും ചെയ്തു. 80,000 ഉണ്ടായിരുന്നിടത്ത് ഇപ്പോള്‍ റിപ്പോര്‍ട്ട് ചെയ്യുന്നത് 40.000 കേസുകളാണ്. സംസ്ഥാനത്തെ 32 ലക്ഷത്തോളം ജനങ്ങള്‍ക്ക് ഇതുവരെ കൊവിഡ് ബാധിച്ചു കഴിഞ്ഞു. ശതമാനക്കണക്കില്‍ മഹാരാഷ്ട്ര മാത്രമാണ് മുന്നില്‍.
കേരളത്തിലെ കേസുകള്‍ കുറയാത്തതിനെ കുറിച്ച് ഒരു വിശദമായ പഠനം തന്നെ വേണ്ടി വരും എന്നാണ് മുഖ്യമന്ത്രി പിണറായി വിജയന്‍ കഴിഞ്ഞ ദിവസം പറഞ്ഞത്. ഇപ്പോഴത്തെ വര്‍ധനവ് മൂന്നാം തരംഗം തുടങ്ങിയത് മൂലമുള്ളതാണോ എന്ന് അറിയില്ലെന്നും ക്ലസ്റ്റര്‍ രൂപത്തിലാണ് നിലവില്‍ കേസുകള്‍ കൂടുതലും റിപ്പോര്‍ട്ട് ചെയ്യുന്നത് എന്നും മുഖ്യമന്ത്രി പറയുന്നു.
സംസ്ഥാനത്തെ 11 ജില്ലകളിലും ടി.പി.ആര്‍ നിരക്ക് പത്തിന് മുകളിലാണ്. മലപ്പുറത്താകട്ടെ, 17 ശതമാനവും. അപകടകരമായൊരു കണക്കാണിത്. മറ്റ് സംസ്ഥാനങ്ങള്‍ മൂന്നാം തരംഗത്തെ നേരിടാനുള്ള മുന്നൊരുക്കങ്ങള്‍ നടത്തുമ്പോള്‍ നമ്മള്‍ ഇപ്പോഴും രണ്ടാം തരംഗത്തില്‍ നിന്ന് കരകയറിയിട്ടില്ലെന്നത് ആശങ്കപ്പെടുത്തുന്നു.
വാക്‌സിനേഷന്‍റെ കാര്യത്തില്‍ രാജ്യത്ത് മുന്നില്‍ നില്‍ക്കുന്ന ഒരു സംസ്ഥാനമാണ് കേരളമെന്നും അതുകൊണ്ട് തന്നെയാണ് മറ്റ് സംസ്ഥാനങ്ങളുമായി താരതമ്യം ചെയ്യുമ്പോള്‍ ഇവിടെ മരണനിരക്ക് വളരെ കുറവാകുന്നതെന്നും മുഖ്യമന്ത്രി പറയുന്നു.
എന്നാല്‍ ഈയടുത്ത് ബക്രീദ് പ്രമാണിച്ച് കൊവിഡ് നിയന്ത്രണങ്ങള്‍ ഇളവ് നല്‍കിയ കേരളത്തിന്‍റെ നടപടി രാജ്യവ്യാപകമായി വിമര്‍ശനത്തിന് ഇടയാക്കിയിരുന്നു, പ്രത്യേകിച്ച് ഇന്ത്യന്‍ മെഡിക്കല്‍ അസോസിയേഷന്‍ കേരളത്തിനെതിരെ സുപ്രീം കോടതിയില്‍ വരെ പോകും എന്ന മുന്നറിയിപ്പും തന്നിരുന്നു.
‘കൊവിഡ് രണ്ടാം തരംഗം അവസാനിക്കുന്നതിന് മുന്നേ മൂന്നാം തംരംഗത്തിലേക്ക് കടക്കേണ്ടി വന്നാല്‍ കേരളം കടുത്ത മെഡിക്കല്‍ എമര്‍ജന്‍സി നേരിടേണ്ടി വരും’– ഐ.എം.എ കേരള ചാപ്റ്റര്‍ പ്രിതിനിധി ഡോ. എന്‍. സുല്‍ഫി പറയുന്നു.
ബക്രീദ് വിഷയത്തില്‍ കേന്ദ്ര സര്‍ക്കാരിന്‍റെയും കേരളത്തിലെ പ്രതിപക്ഷത്തിന്‍റെയും ഐ.എം.എ പോലുള്ള ഡോക്ടര്‍മാരുടെ സംഘടനകളുടേയും വിമര്‍ശനം കേരളത്തെ അന്ന് പ്രതിക്കൂട്ടില്‍ നിര്‍ത്തിയിരുന്നു. ഐ.എം.എ ദേശീയ സെക്രട്ടറിയും പ്രസിഡന്‍റും കേരളത്തിനെതിരെ സംയുക്ത വാര്‍ത്താ സമ്മേളനം വിളിച്ച് ഇളവുകള്‍ പിന്‍വലിക്കണം എന്ന ശക്തമായ താക്കീത് നല്‍കിയിരുന്നു.
കേരളത്തില്‍ ഇതുവരെ 1,85,94,437 ആളുകള്‍ വാക്‌സിന്‍ സ്വീകരിച്ചു കഴിഞ്ഞു. അതായത് മൊത്തം ജനസംഖ്യയുടെ 36.55 ശതമാനം. ഇതില്‍ 56,22,272 പേരും രണ്ട് ഡോസും സ്വീകരിച്ചവരാണ്. നാല്‍പതിനായിരത്തോളം ഗര്‍ഭിണികളും കേരളത്തില്‍ വാക്‌സിന്‍ സ്വീകരിച്ചു കഴിഞ്ഞു.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : covid second wave kerala maharashtra struggle to contain cases
Malayalam News from malayalam.samayam.com, TIL Network
