മീരാബായ് ചാനുവിന് എഎസ്പിയായി നിയമനം; ഒരു കോടി രൂപ സമ്മാനമായി നൽകും

ന്യൂഡൽഹി: ടോക്യോ ഒളിമ്പിക്സിൽ ഭാരോദ്വഹനത്തിൽ വെള്ളി മെഡൽ നേടിയ മീരാബായ് ചാനുവിന് എഎസ്പിയായി നിയമനം. മണിപ്പൂർ സർക്കാരിന്റേതാണ് തീരുമാനം. റെയിൽവേയിൽ ടിക്കറ്റ് എക്സാമിനർ ആയാണ് ചാനു പ്രവർത്തിച്ചിരുന്നത്. കഴിഞ്ഞ ദിവസം ഈ ജോലിക്കു പകരം മറ്റൊരു ജോലി നൽകുമെന്ന് മണിപ്പൂർ മുഖ്യമന്ത്രി ബിരെൻ സിങ് വ്യക്തമാക്കിയിരുന്നു.



പുതിയ ജോലിക്കൊപ്പം ഒരു കോടി രൂപ പാരിതോഷികമായി നൽകുമെന്നും മണിപ്പൂർ സർക്കാർ വ്യക്തമാക്കിയിട്ടുണ്ട്. വനിതകളുടെ 49 കിലോ ഗ്രാം ഭാരോദ്വഹനത്തിനാണ് മീരാബായ്ക്ക് ചരിത്രം കുറിച്ചത്.

സ്നാച്ചിൽ 87 കിലോയും ക്ലീൻ ആന്റ് ജെർക്കിൽ 115 കിലോയുമായി ആകെ 202 കിലോയാണ് മീരാബായ് ഉയർത്തിയത്. ആദ്യമായാണ് ഇന്ത്യൻ വനിത ഭാരോദ്വഹനത്തിൽ വെള്ളി നേടുന്നത്. പിവി സിന്ധുവിന് ശേഷം ഒളിമ്പിക്സിൽ വെള്ളി മെഡൽ നേടുന്ന ഇന്ത്യൻ വനിതയാണ് മീരാബായ്.

അതേസമയം, മീരാബായുടെ വെള്ളി സ്വർണ്ണം ആകാൻ ഇടയുണ്ടെന്നാണ് റിപ്പോർട്ട്. സ്വർണ്ണം നേടിയ ചൈനയുടെ താരം ഷിഹൂയി ഹൗ ഉത്തേജക മരുന്ന് ഉപയോഗിച്ചെന്ന സംശയത്തെത്തുട‍‍ര്‍ന്നാണിത്. ചൈനീസ് താരം പരിശോധനയിൽ പരാജയപ്പെട്ടാൽ മീരാബായിയെ സ്വ‍ര്‍ണ്ണ മെഡൽ ജേതാവായി പ്രഖ്യാപിക്കും.