റോഡ് വികസനം: കുരിശടികളും കപ്പേളകളും മാറ്റി നൽകണമെന്ന് കർദിനാൾ മാർ ജോർജ് ആലഞ്ചേരി

കൊച്ചി: റോഡ് വികസനത്തിനായി ആവശ്യമെങ്കിൽ ആരാധനാ കേന്ദ്രങ്ങൾ മാറ്റി നൽകാൻ തയ്യാറാകണമെന്ന് കർദിനാൾ മാർ ജോർജ് ആലഞ്ചേരി. ഗതാഗത ആവശ്യങ്ങളുടെ വികസനത്തിനായി കുരിശടികളോ കപ്പേളകളോ ചെറിയ ആരാധനലായങ്ങളോ മാറ്റി സ്ഥാപിക്കേണ്ടതായി വന്നാൽ അതിന് തയ്യാറാകണം. എല്ലാ ക്രൈസ്തവ വിഭാഗത്തിലുള്ളവരും ഈ നിർദേശം അംഗീകരിക്കണമെന്നും അദ്ദേഹം പറഞ്ഞു.



വികസനത്തിനായി ആരാധനാലയങ്ങള്‍ പൊളിച്ചാല്‍ ദൈവം ക്ഷമിക്കുമെന്ന് ഹൈക്കോടതി; ഹർജി തള്ളി

ആരാധനാലയങ്ങൾക്ക് വേണ്ടി ദേശീയപാതയുടെ അലൈൻമെൻ്റ് മാറ്റേണ്ടതില്ലെന്ന് ഹൈക്കോടതി കഴിഞ്ഞ ദിവസം വ്യക്തമാക്കിയിരുന്നു. നിസാര കാര്യങ്ങളുടെ പേരിൽ ദേശീയപാത സ്ഥലമേറ്റെടുപ്പ് വിഷയങ്ങളിൽ ഇടപെടില്ല. വികസ പദ്ധതിയുടെ ഭാഗമായി ആരാധനാലയങ്ങൾ ഏറ്റെടുക്കേണ്ടി വന്നാൽ ദൈവം പൊറുത്തുക്കൊള്ളുമെന്നും കോടതി വ്യക്തമാക്കി. മണ്ണിലും വിണ്ണിലും തൂണിലും തുരുമ്പിലും ദൈവം ഇരിക്കുന്നു’- എന്ന ശ്രീകുമാരന്‍ തമ്പിയുടെ വരികൾ ഉദ്ധരിച്ചായിരുന്നു കോടതി നിലപാട് വ്യക്തമാക്കിയത്. ഈ പശ്ചാത്തലത്തിൽ കൂടിയാണ് കർദിനാളിൻ്റെ പരാമർശം ഉണ്ടായത്.

നാടിൻ്റെ വികസനത്തിനായി സഹകരിക്കാൻ ക്രൈസ്തവ വിഭാഗങ്ങൾ തയ്യാറകണം. ഇക്കാര്യത്തിൽ സർക്കാർ വിവേകത്തോടെ വികസന പദ്ധതികൾ ആസൂത്രണം ചെയ്യണം. കൂടുതൽ ആളുകൾ എത്തുന്നതും ചരിത്ര പ്രാധാന്യമുള്ളവയുമായ ആരാധനാലയങ്ങളുടെ നിലനിൽപ്പിനെ ബാധിക്കാത്തവിധത്തിലാകണം സർക്കാർ ഇടപെടൽ നടത്തേണ്ടതെന്നും കർദിനാൾ വ്യക്തമാക്കി.

പൊതുനന്മ ലക്ഷ്യമാക്കി പ്രവർത്തിക്കാൻ എല്ലാവരും തയ്യാറാകണം. ദേശീയപാത 66ൻ്റെ വികസനത്തിനായി ക്ഷേത്രമിരിക്കുന്ന സ്ഥലം വിട്ടുനൽകിയ കൊവ്വൽ അഴിവാതുക്കൽ ക്ഷേത്രഭാരവാഹികളെ അഭിനന്ദിക്കുന്നതായും കെസിബിസി പ്രസിഡന്റും സിറോ മലബാർസഭ മേജർ ആർച്ച് ബിഷപ്പുമായ കർദിനാൾ പറഞ്ഞു.

ശബരിമല ആചാരം തിരുത്തുമോ? തന്ത്രി ബ്രാഹ്മണൻ മാത്രം; പറ്റില്ലെന്ന് ഇതര ജാതി തന്ത്രിമാർ; നിയമപോരാട്ടം

ദൈവം സർവ്വവ്യാപിയാണെന്നായിരുന്നു കോടതിയുടെ പരാമർശം. “വികസന പദ്ധതിയുടെ ഭാഗമായി ആരാധനാലയങ്ങൾ ഏറ്റെടുക്കേണ്ടി വന്നാൽ ദൈവം പൊറുത്തോളും. ഈ ഉത്തരവിട്ട ജഡ്ജിയോടും, പരാതി നൽകിയ ഹർജിക്കാരനോടും, വിധി നടപ്പാക്കുന്ന അധികൃതരോടും ദൈവം ക്ഷമിക്കും” – എന്നും കോടതി വ്യക്തമാക്കിയിരുന്നു. ജസ്റ്റിസ് ബി കുഞ്ഞികൃഷ്ണനാണ് ഹർജി പരിഗണിച്ചത്.