ഇലക്കറികള്‍ കര്‍ക്കടക കാലത്തു മാത്രമല്ല, ഏതു കാലത്താണെങ്കിലും ഏറെ നല്ലതു തന്നെയാണ്. ശരീരത്തിന് ആവശ്യമായ ഏറെ പോഷകങ്ങള്‍ അടങ്ങിയ ഒന്നാണിത്. മഗ്നീഷ്യം, ഫോസ്ഫറസ്, വൈറ്റമിനുകള്‍ തുടങ്ങിയ പല പ്രധാനപ്പെട്ട ഘടകങ്ങളും ഇലക്കറികളില്‍ അടങ്ങിയിട്ടുണ്ട്. കര്‍ക്കിടകത്തില്‍ മുരിങ്ങയില കഴിയ്ക്കരുതെന്നാണ് നാം പൊതുവേ കേള്‍ക്കാറ്. ഇത് വിഷമാണ്, കട്ടുണ്ടാകും, അതായത് കയ്പ്പുണ്ടാകും എന്നൊക്കെ പറഞ്ഞു കേള്‍ക്കാം. ഈ കയ്പ് വിഷാംശം കൊണ്ടാണെന്ന രീതിയിലെ കാര്യങ്ങള്‍ പൊതുവേ പറഞ്ഞു കേള്‍ക്കാം. എന്നാല്‍ വാസ്തവത്തില്‍ കര്‍ക്കിടക മാസത്തില്‍ മുരിങ്ങയില കഴിച്ചാല്‍ വിഷമാണോ. അതു കൊണ്ടാണോ ഇത് കഴിയ്ക്കരുതെന്ന് പഴമക്കാര്‍ പറയുന്നത്. ഇതെക്കുറിച്ച് കൂടുതലറിയൂ.

​മുരിങ്ങാമരം

മുരിങ്ങാമരം തടിയിലൂടെ വിഷം വലിച്ചെടുക്കുമെന്നും ഇതിനാലാണ് ഇത് പണ്ടു കാലത്ത് കിണിറ്റിന്‍ പരിസരത്ത് നട്ടിരുന്നതെന്നുമാണ് പറഞ്ഞു കേള്‍ക്കുന്നത്. അതായത് കിണറ്റിലെ വെള്ളം വിഷാംശം നീക്കി ശുദ്ധമാകാനാണ് മുരിങ്ങ ഇവിടെ നടുന്നത് എന്നാണ് വിശ്വാസം. ഇതിനാലാണ് മുരിങ്ങ കര്‍ക്കിടകത്തില്‍ വിഷമാകുന്നതെന്നു പറഞ്ഞാല്‍ ഏതു കാലത്തും കിണറ്റിലെ വിഷാംശം വലിച്ചെടുക്കാന്‍ മുരിങ്ങയ്ക്കു കഴിഞ്ഞാല്‍ ഏതു കാലത്തും ഇതില്‍ വിഷാംശം ഉണ്ടാകുമെന്ന് തന്നെയല്ലേ അര്‍ത്ഥം. അതായത് ഏതു കാലത്തും ഇത് കഴിയ്ക്കാന്‍ പാടില്ലെന്നതു തന്നെ. ഇതിനാല്‍ തന്നെ ഈ വാദത്തില്‍ കഴമ്പില്ലെന്നു വേണം, പറയാന്‍. കിണറ്റിന്‍ കരയില്‍ പണ്ട് മുരിങ്ങ നട്ടിരുന്നതിന്റെ അടിസ്ഥാനം വിഷം വലിച്ചെടുക്കുന്നതല്ല, നല്ല നനവ് ലഭിയ്ക്കുന്നതിനാണ്.

കര്‍ക്കിടക്കാലത്ത്

വാസ്തവത്തില്‍ കര്‍ക്കിടക്കാലത്ത് മുരിങ്ങായില കഴിയ്ക്കാതിരിയ്ക്കാന്‍ ആരോഗ്യപരമായ മറ്റൊരു കാരണമാണ് പറയുന്നത്. കര്‍ക്കിടകം മഴക്കാലം കൂടിയാണ്. ദഹനത്തിനു ബുദ്ധിമുട്ടുള്ള, വയര്‍ സംബന്ധമായ പ്രശ്‌നങ്ങളുള്ള കാലം കൂടിയാണിത്. ഇത്തരം ഘട്ടത്തില്‍ മുരിങ്ങയില കഴിച്ചാല്‍ ദഹിയ്ക്കാന്‍ പ്രയാസം നേരിടും. മുരിങ്ങയിലയെ ഇത്തരത്തില്‍ വില്ലനാക്കുന്നത് സെല്ലുലോസ്എന്നൊരു ഘടകമാണ്. ഇതിനെ ദഹിപ്പിയ്ക്കണമെങ്കില്‍ നമ്മുടെ ശരീരത്തിലെ സെല്ലുലേസ് എന്ന എന്‍സൈമിനേ കഴിയൂ. എന്നാല്‍ ഇതു നമ്മുടെ ശരീരത്തില്‍ ഇല്ല. എന്നാല്‍ വേവിച്ചു കഴിച്ചാല്‍ ഈ സെല്ലുലേസ് കുറേയെല്ലാം നമ്മുടെ ശരീരം തന്നെ ആഗിരണം ചെയ്യുന്നു. ബാക്കിയുള്ള സെല്ലുലേസ് മല വിസര്‍ജനത്തിലൂടെ പുറത്തു പോകും. മുരിങ്ങയില കഴിച്ചാല്‍ പിറ്റേന്നു മലത്തിലൂടെ നാരുകളും മുരിങ്ങയിലയുടെ അംശങ്ങളും പുറത്തു പോകുന്നതായി കാണാം. ഇത് ഈ സെല്ലുലേസ് എന്നതാണ്. ബാക്കിയെല്ലാ ഇലക്കറികളിലും ഈ സെല്ലുലേസ് കുറഞ്ഞ അളവിലേ ഉള്ളൂ. എന്നാല്‍ മുരിങ്ങായിലയില്‍ കൂടിയ തോതില്‍ ഉണ്ട്. ഇത് മഴക്കാലത്ത് ദഹനം കൂടുതല്‍ ബുദ്ധിമുട്ടാക്കുന്നുവെന്നത് തന്നെയാണ് ഇതില്‍ ഈ സമയത്ത് വിഷം, ഇതിനാല്‍ കഴിയ്ക്കരുത് തുടങ്ങിയ ന്യായങ്ങള്‍ പറയുന്നത്.

വയറിളക്കം

ഇതു പോലെ തന്നെ കര്‍ക്കിടകത്തില്‍ ഇതൊഴിവാക്കാന്‍ അടിസ്ഥാനമായ മറ്റൊരു കാര്യം കൂടിയുണ്ട്. ഇതില്‍ നിയിസിമൈന്‍ എന്ന പേരിലെ ഒരു രാസപദാര്‍ത്ഥമുണ്ട്. ഇതാണ് നല്ല ശോധന നല്‍കാന്‍ ഫൈബറുകള്‍ക്കൊപ്പം നമ്മെ സഹായിക്കുന്നത്. കര്‍ക്കിടകത്തില്‍ ആ കാരണം കൊണ്ടു തന്നെ നമുക്ക് വയറിളക്കം പോലുള്ള അവസ്ഥകള്‍ ഉണ്ടാകാന്‍ സാധ്യതയുണ്ട്. പൊതുവേ ഇത്തരം രോഗാവസ്ഥകള്‍ക്കു സാധ്യതയുള്ള സമയം കൂടിയാണ് മണ്‍സൂണ്‍. ഇതുകൊണ്ടു കൂടിയാണ് കര്‍ക്കിടകത്തില്‍ മുരിങ്ങയില നിഷിദ്ധം എന്ന രീതി പണ്ടു മുതല്‍ പിന്‍തുടര്‍ന്ന് വന്നിരുന്നത്.

മറ്റൊരു ശാസ്ത്രീയ വശം

ഇതിന് മറ്റൊരു ശാസ്ത്രീയ വശം കൂടിയുണ്ട്. മുരിങ്ങയില പൊതുവേ ശരീരത്തിലെ കൊഴുപ്പ് നീക്കാന്‍ നല്ലതാണ്. അതായത് ഇത് ശരീരം കൊഴുപ്പ് വലിച്ചെടുക്കുന്നതിനെ തടയുന്നു. എന്നാല്‍ മഴക്കാലത്ത് ശരീരത്തിന്റെ ഊഷ്മാവ് നില നിര്‍ത്തുന്നതിന് കൂടുതല്‍ കൊഴുപ്പ് ആവശ്യമായി വരുന്നു. മുരിങ്ങയില കൊഴുപ്പ് ശരീരം വലിച്ചെടുക്കുന്നതിനെ തടയുന്നു. ദഹന പ്രശ്‌നങ്ങളും വയറിന്റെ ആരോഗ്യപ്രശ്‌നങ്ങളുമില്ലാത്തവര്‍ക്ക് മുരിങ്ങയില കര്‍ക്കിടത്തിലും ഏതു കാലത്തിലും കഴിയ്ക്കാം. നല്ലതു പോലെ വേവിച്ചു കഴിയ്ക്കണം എന്നതു മാത്രമേയുള്ളൂ. ഇതിന്റെ ഇലയേ ഈ പ്രശ്‌നമുണ്ടാക്കുന്നുള്ളൂ. ഇതിന്റെ ഇല ഉണക്കിപ്പൊടിച്ചതോ ഇതു പോലെ മുരിങ്ങാക്കായോ എല്ലാം തന്നെ നാം ഉപയോഗിയ്ക്കുന്നു. മുരിങ്ങ കര്‍ക്കിടകത്തില്‍ വിഷമെങ്കില്‍ മുരിങ്ങാക്കായയും ഉപയോഗിയ്ക്കാന്‍ പറ്റില്ലെന്നതാണ് വാസ്തവം. കാരണം മുരിങ്ങ തടിയിലൂടെയാണ് പോഷകം വലിച്ചെടുക്കുന്നത്. ഇതിനാല്‍ ഇലകളില്‍ ഉണ്ടാകുന്നത് കായയിലും ഉണ്ടാകും. കാല്‍മുട്ടുവേദന: അര മുറി നാരങ്ങയില്‍ പരിഹാരം…..