പെഗാസസ്: കേന്ദ്രം മൗനം തുടരുന്നു; കൂടുതല്‍ ഹര്‍ജികള്‍ സുപ്രീംകോടതിയില്‍

കേന്ദ്ര സര്‍ക്കാര്‍ രാജ്യത്തെ ആരെയെങ്കിലും നേരിട്ടോ അല്ലാതെയോ നിരീക്ഷിക്കുന്നതിന് പെഗാസസ് സോഫ്റ്റ്‌വെയര്‍ ഉപയോഗിച്ചിട്ടുണ്ടോ എന്നും ഉന്നതര്‍ക്ക് പുറമേ രാജ്യത്തെ സാധാരണ പൗരന്മാരെ നിരീക്ഷിക്കാനും ഇത് ഉപയോഗിച്ചിരുന്നോ എന്നും വ്യക്തമാക്കണം എന്നും സുപ്രീം കോടതിയില്‍ സമര്‍പ്പിച്ച ഹര്‍ജിയില്‍ പറയുന്നുണ്ട്. കൂടാതെ സുപ്രീം കോടതിയിലെ ഏതെങ്കിലും സിറ്റിംഗ് ജഡ്ജിയോ വിരമിച്ച ജഡ്ജിയോ ആരോപണത്തെക്കുറിച്ചുള്ള അന്വേഷണത്തിന് മേല്‍നോട്ടം വഹിക്കണം എന്നും ഹര്‍ജിയില്‍ ആവശ്യപ്പെടുന്നുണ്ട്.

കഴിഞ്ഞ പത്ത് ദിവസത്തോളമായി ലോകത്താകമാനമുള്ള മാധ്യമ കൂട്ടായ്മകളുടെ അന്വേഷണ റിപ്പോര്‍ട്ടുകളാണ് പെഗാസസ് ഡാറ്റാ ബേസിലെ ഫോണ്‍ നമ്പറുകളുടെ ഉടമകളെ തിരിച്ചറിയാന്‍ സഹായിക്കുന്നത്. എന്നാല്‍ സ്‌പൈവെയര്‍ സൃഷ്ടാക്കളായ ഇസ്രായേലി കമ്പനി എന്‍.എസ്.ഒ ഗ്രൂപ്പിന്റെ വാദമനുസരിച്ച് തങ്ങളില്‍ നിന്ന് കരാര്‍ പ്രകാരം സ്‌പൈവെയര്‍ വാങ്ങിയ ഔദ്യോഗിക സര്‍ക്കാരുകള്‍ക്ക് മാത്രമേ സേവനം നല്‍കുന്നുള്ളൂ എന്നാണ്

ഈ പറയുന്ന ‘ഔദ്യോഗിക സര്‍ക്കാരുകളില്‍’ ഇന്ത്യയും ഉള്‍പ്പെട്ടിട്ടുണ്ടോ എന്ന സംശയമാണ് വിഷയത്തില്‍ കൂടുതല്‍ അന്വേഷണം ആവശ്യപ്പെട്ടുകൊണ്ടുള്ള ഹര്‍ജികള്‍ക്കെല്ലാം പിന്നിലും. ഇക്കാര്യത്തില്‍ പാര്‍ലെന്‍റില്‍ നടന്നുകൊണ്ടിരിക്കുന്ന മണ്‍സൂണ്‍ സമ്മേളനത്തില്‍ വരുന്ന ചോദ്യങ്ങള്‍ക്കടക്കം കേന്ദ്രം പാലിക്കുന്ന മൗനവും പ്രധാന പ്രതിപക്ഷമായ കോണ്‍ഗ്രസ് ഉന്നയിക്കുന്ന ആരോപണം സംശയം ബലപ്പെടുത്തുന്നുണ്ട് എന്നതും വസ്തുത.

‘ഇത്തരത്തില്‍ മിലിട്ടറി ഗ്രേഡിലുള്ള ഒരു ചാര സോഫ്റ്റ്‌വെയര്‍ ഉപയോഗിക്കുക എന്നത് തന്നെ മൗലിക അവകാശങ്ങളുടെ ലംഘനമാണ്. ഇന്ത്യന്‍ ജനാധിപത്യത്തിന്റെ തെടുംതൂണുകളായ പ്രസ്ഥാനങ്ങളെ ഒളിഞ്ഞു നോക്കുന്നതിനും ആക്രമിക്കുന്നതിനും തുല്യമാണ്’– ഇരു മാധ്യമപ്രവര്‍ത്തകരും പെറ്റീഷണില്‍ ആരോപിക്കുന്നു. മാത്രമല്ല, പെഗാസസിനെതിരെ വിശ്വാസയോഗ്യമായ ഒരു മറുപടിയോ സ്വതന്ത്ര അന്വേഷണമോ കേന്ദ്രസര്‍ക്കാര്‍ എടുക്കാത്തത് വളരെ അപകടകരമായ അവസ്ഥയാണെന്നും പറയുന്നുണ്ട്

ഇതില്‍ എടുത്ത് പറയുന്നത് രാജ്യത്തെ സാധാരണ പൗരന്മാരേയും ഇത്തരത്തില്‍ നിരീക്ഷിച്ചിട്ടുണ്ടെങ്കില്‍ അത് സ്വകാര്യത, സ്വതന്ത്ര ആശയവിനിമയം തുടങ്ങിയ മൗലികാവകാശങ്ങളുടെ കടുത്ത ലംഘനമാണ് എന്നതാണ്

രാജ്യസുരക്ഷ, പബ്ലിക് എമര്‍ജന്‍സി തുടങ്ങിയ അവസരങ്ങളില്‍ മാത്രമാണ് സര്‍ക്കാരിന് ഇന്ത്യയില്‍ ഇത്തരത്തില്‍ നിരീക്ഷണം നടത്താന്‍ അധികാരമുള്ളൂ എന്നിരിക്കെ, ഇപ്പോഴത്തെ റിപ്പോര്‍ട്ടുകള്‍ പ്രകാരം പൂര്‍ണമായും നിയമവിരുദ്ധമായ പ്രവര്‍ത്തിയാണ് നടന്നിരിക്കുന്നത് എന്ന് കാണാം — ഹര്‍ജി ആരോപിക്കുന്നു.

മുന്‍പ് 2019ലും വാട്‌സാപ്പ് അടക്കം ഉള്‍പ്പെട്ട സമാനമായ കണ്ടെത്തലുകളില്‍ പ്രിയങ്ക ഗാന്ധിയുടെ ഫോണ്‍ ചോര്‍ത്തിയെന്ന് കോണ്‍ഗ്രസ് ആരോപിച്ചിരുന്നു. ഏകദേശം 1400 പേരുടെ വിവരങ്ങള്‍ ചോര്‍ന്നെന്നായിരുന്നു ആരോപണം. കൂടുതലും കോണ്‍ഗ്രസ് നേതാക്കളായിരുന്നു എന്നതിനാലും പിന്നീട് കൂടുതല്‍ അന്വേഷണം നടത്തിയില്ല എന്നതിനാലും അന്നും പ്രതിസ്ഥാനത്ത് കേന്ദ്ര സര്‍ക്കാര്‍ തന്നെയായിരുന്നു

പാരിസ് ആസ്ഥാനമായ ഫോര്‍ബിഡന്‍ സ്റ്റോറീസ് എന്ന മാധ്യമ സംഘടനക്കും മനുഷ്യാവകാശ സംഘടന ആംനെസ്റ്റി ഇന്റര്‍നാഷണലിനും ചോര്‍ന്നു കിട്ടിയ ചില വിവരങ്ങള്‍ അവര്‍ മാധ്യമ കൂട്ടായ്മക്ക് കൈമാറുന്നതോടെയാണ് ഇപ്പോള്‍ വിവാദമായ കണ്ടെത്തലുകളിലേക്ക് നയിച്ച അന്വേഷണങ്ങളുടെയെല്ലാം തുടക്കം.

ഹര്‍ജികള്‍ വേറെയും

എന്‍ റാമിനും ശശി കുമാറിനും മുന്നേ തന്നെ പല പ്രമുഖരും ജുഡീഷ്യല്‍ അന്വേഷണം ആവശ്യപ്പെട്ട് ഹര്‍ജികള്‍ സുപ്രീം കോടതിയില്‍ നല്‍കിയിട്ടുണ്ട്. അതില്‍ സുപ്രീം കോടതി അഭിഭാഷകനായ മനോഹര്‍ ലാല്‍ ശര്‍മ്മയും രാജ്യസഭാ എം.പി കൂടിയായ ജോണ്‍ ബ്രിട്ടാസും അടക്കമുള്ളവരുണ്ട്

‘പെഗാസസ് ചോര്‍ത്തല്‍ ഇന്ത്യന്‍ ജനാധിപത്യത്തേയും ഭരണവ്യവസ്ഥയേയും രാജ്യ സുരക്ഷയേയും കടന്നാക്രമിക്കുന്ന വിഷയം’ എന്നാണ് മനോഹര്‍ ലാല്‍ ശര്‍മ്മ വിശേഷിപ്പിച്ചത്. വിഷയത്തില്‍ പരമോന്നത ന്യായപീഠം ഇടപെട്ട് ഒരു പ്രത്യേക അന്വേഷണ സംഘത്തെ നിയോഗിച്ച് സത്യം പുറത്ത് കൊണ്ടുവരണം എന്നായിരുന്നു അദ്ദേഹം ഹര്‍ജിയില്‍ ആവശ്യപ്പെട്ടത്

ഹര്‍ജി പ്രകാരം പ്രധാനമന്ത്രി നരേന്ദ്ര മോദിയും അന്വേഷണ ഏജന്‍സിയായ സി.ബി.ഐയുമാണ് ഉത്തരം നല്‍കേണ്ടത്. സംഭവത്തില്‍ എഫ്.ഐ.ആര്‍ രജിസ്റ്റര്‍ ചെയ്യുന്നതിന് താന്‍ ആദ്യം സമീപിച്ചത് സി.ബി.ഐയെ ആയിരുന്നെന്നും എന്നാല്‍ തീര്‍ത്തും നിരുത്തരവാദപരമായ സമീപനം അവിടെ നിന്നും ഉണ്ടായതിനാലാണ് കോടതിയെ സമീപിക്കേണ്ടി വന്നതെന്നും ശര്‍മ്മ ഹര്‍ജിയില്‍ ആരോപിക്കുന്നു. ഇത്തരത്തില്‍ പൊതു താല്‍പര്യ പര്‍ജികളുടേയും മറ്റും പേരില്‍ നേരത്തേ തന്നെ പ്രശ്‌സ്തനായ വ്യക്തിയാണ് മനോഹര്‍ ലാല്‍ ശര്‍മ്മ

സി.പി.എം നേതാവായ ജോണ്‍ ബ്രിട്ടാസിന്റെ ഹര്‍ജി പ്രധാനമായും ചൂണ്ടികാണിക്കുന്നത് കേന്ദ്ര ഐ.ടി മന്ത്രി അശ്വിനി വൈഷ്ണവിന്റെ പ്രസ്താവനകളാണ്. പാര്‍ലമെന്റില്‍ ഒരു ചോദ്യത്തിന് ഉത്തരമായി ‘രാജ്യത്ത് നിയമവിരുദ്ധമായി ഒന്നും തന്നെ നടന്നിട്ടില്ല’ എന്നായിരുന്നു മന്ത്രി പറഞ്ഞത്. അപ്പോള്‍ ഇപ്പോള്‍ നടന്നുകൊണ്ടിരിക്കുന്നത് കേന്ദ്രത്തിന്റെ അനുമതിയോടെ ‘ഔദ്യോഗികമായിട്ടാണോ’ എന്നായിരുന്നു ബ്രിട്ടാസ് ഹര്‍ജിയില്‍ ചോദിച്ചിരിക്കുന്നത്.

ചോര്‍ത്തല്‍ നടത്തിയിരിക്കുന്നത് കേന്ദ്ര സര്‍ക്കാരാണെങ്കില്‍ അത് നിയമവിരുദ്ധമായ മനുഷ്യാവകാശ ലംഘനമാകുമെന്നും എന്നാല്‍ ചെയ്തിരിക്കുന്നത് ഏതെങ്കിലും വിദേശ ശക്തിയാണെങ്കില്‍ അത് രാജ്യത്തിന്റെ പരമാധികാരത്തിലും ആഭ്യന്തര സുരക്ഷയിലും വന്ന പിഴവാണെന്നും അതിനാല്‍ത്തന്നെ രണ്ട് അവസരങ്ങളിലും ഉത്തരം പറയേണ്ടത് കേന്ദ്രസര്‍ക്കാര്‍ തന്നെയാണെന്നും ഹര്‍ജിയില്‍ പരാമര്‍ശിക്കുന്നു.

****