ഹിമാചലില്‍ മിന്നല്‍ പ്രളയം: എട്ടു പേര്‍ മരിച്ചു, നിരവധി പേരെ കാണാതായി

ഷിംല: അതിശക്തമായ മഴയെത്തുടർന്ന് ഹിമാചൽ പ്രദേശിലുണ്ടായ മിന്നൽ പ്രളയത്തിൽ വ്യാപക നാശനഷ്ടം. എട്ട് പേർ മരിച്ചതായി സംശയിക്കുന്നെന്നും ഏഴുപേരെ കാണാതായെന്നും സംസ്ഥാന ദുരന്ത നിവാരണ സേന ഉദ്യോഗസ്ഥൻ പറഞ്ഞു.

കുളുവില്‍ നാലു പേരും ചമ്പയിൽ ഒരാളും ലഹോൾ സ്പിതിയില്‍ മൂന്നു പേരും മരിച്ചെന്നാണ് റിപ്പോർട്ട്. ലാഹോൾ സ്പിതിയില്‍നിന്ന് ഏഴു പേരെ കാണാതായെന്നും സംസ്ഥാന ദുരന്ത നിവാരണ ഡയറക്ടർ സുധേഷ് കുമാർ മോക്ത പറഞ്ഞു. പൂനം (26), മകൻ നികുഞ്ഞ് (4) എന്നിവരാണ് കുളുവിൽ മരിച്ചത്. നദിയിഷ ജലനിരപ്പ് ഉയർന്നതോടെ ഒഴുക്കിൽപ്പെട്ടാണ് ഇരുവരും മരിച്ചത്. ഇന്ന് പുലർച്ചെ 6.15 ഓടെയായിരുന്നു ഇവർ അപകടത്തിൽപ്പെട്ടതെന്ന് ഇംഗ്ലീഷ് വാർത്താ ചാനലായ എൻഡിടിവി റിപ്പോർട്ട് ചെയ്തു.

കശ്മീരിൽ മേഘവിസ്ഫോടനം: ഏഴു മരണം, നിരവധി പേരെ കാണാനില്ല

ഇന്നലെ രാത്രിയോടെ ഉണ്ടായ മേഘവിസ്ഫോടനത്തെ തുടർന്നാണ് സംസ്ഥാനത്ത് കനത്ത മഴയും മിന്നൽപ്രളയവും ഉണ്ടായത്. വാഹനങ്ങളും തൊഴിലാളികളുടെ ടെന്‍റും ഒഴുകിപോയവയിൽ ഉൾപ്പെടുന്നുണ്ടെന്നാണ് റിപ്പോർട്ട്. മൂന്ന് തൊഴിലാളികൾ മരിച്ചതായും നിരവധിപ്പേരെ കാണാതായെന്നും ഉദ്യോഗസ്ഥൻ കൂട്ടിച്ചേർത്തു.

പോലീസും ഇന്തോ- ടിബറ്റൻ ബോർഡർ പോലീസും (ഐടിബിപി) ചേർന്ന് കാണാതായവർക്കായി തെരച്ചിൽ നടത്തുകയാണ്. നദിയിലെ ശക്തമായ ഒഴുക്കിനെത്തുടർന്ന് ഇന്നലെ രാത്രി നിർത്തിവെച്ച തെരച്ചിൽ രാവിലെ പുനഃരാരംഭിക്കുകയായിരുന്നു.

അസം – മിസോറം അതിര്‍ത്തിയിലെ വെടിയൊച്ചകള്‍

ദേശീയ ദുരന്ത പ്രതികരണ സേന രക്ഷാപ്രവര്‍ത്തനത്തിനു നേതൃത്വം നല്‍കി വരികയാണെന്ന് ലാഹോൾ സ്പിതി ഡെപ്യൂട്ടി കമ്മീഷണർ നീരജ് കമാർ പറഞ്ഞു. പ്രദേശത്ത് മണ്ണിടിച്ചിലിനെത്തുടർന്നും ആളുകൾ ഒറ്റപ്പെട്ടിട്ടുണ്ടെന്നാണ് റിപ്പോർട്ട്.