പ്ലസ് ടു പരീക്ഷ കാലുകൊണ്ടെഴുതി നേടിയത് ഫുൾ എ പ്ലസ്; ഇരു കൈകളുമില്ലാത്ത ദേവികയുടേത് മിന്നും ജയം

മലപ്പുറം: കാലുകൊണ്ട് പരീക്ഷയെഴുതിയ വള്ളിക്കുന്ന് സിബിഎച്ച്എസിലെ ദേവിക നേടിയത് മിന്നും ജയം. എല്ലാ വിഷയങ്ങളിലും എ പ്ലസ് വാങ്ങിയ ദേവിക എസ്എസ്എൽസിക്ക് നേടിയ അതേ വിജയം ആവർത്തിച്ചു. ഹ്യുമാനിറ്റീസായിരുന്നു ദേവികയുടെ വിഷയം.



എഴുതാന്‍ കൈകളില്ലെങ്കിലും ഫുള്‍ എപ്ലസ് ‘കാല്‍പ്പിടി’യിലൊതുക്കി ദേവിക

ഒലിപ്രംകടവിന് സമീപത്ത് താമസിക്കുന്ന ചോയിമഠത്തിൽ പി സജീവിന്‍റെയും സുജിതയുടേയും മകളാണ് ദേവിക. ജന്മനാ ദേവികയ്ക്ക് ഇരുകൈകളുമുണ്ടായിരുന്നില്ല. എന്നാല്‍ അച്ഛനുമമ്മയും അവളെ കാലുകൾകൊണ്ട് എഴുതാൻ പഠിപ്പിച്ചു. പഠനത്തില്‍ ദേവിക അസാമാന്യമായ മികവ് പുലര്‍ത്തി.

കാലുപയോഗിച്ച് മനോഹരമായി ചിത്രം വരയ്ക്കാറുമുണ്ട് ദേവിക. പ്ലസ്ടുവും ബിരുദവുമൊക്കെ കഴിഞ്ഞ് സിവില്‍ സര്‍വ്വീസ് നേടണമെന്നതാണ് ഈ മിടുക്കിയുടെ ആഗ്രഹം.