കട്ടതിനോ കവർന്നതിനോ അല്ല യുഡിഎഫിന്റെ കവർച്ചയെ എതിർത്തതിനാണ് കേസ്: കെ ടി ജലീൽ

മലപ്പുറം: നിയമസഭാ കയ്യാങ്കളി കേസിൽ വിചാരണ നേരിടാൻ തയ്യാറാണെന്ന് മുൻ മന്ത്രി കെടി ജലീൽ. കട്ടതിനോ കവർന്നതിനോ അല്ല, യുഡിഎഫിന്റെ കവർച്ചയെ എതിർത്തതിനാണ് കേസെന്നും അദ്ദേഹം പറഞ്ഞു.



“യുഡിഎഫ് സർക്കാരിൻ്റെ അഴിമതിക്കെതിരെ നടത്തിയ സമരത്തിൽ നിയമസഭക്കകത്ത് വെച്ച് പ്രക്ഷുബ്ധമായ ചില രംഗങ്ങൾ അരങ്ങേറി. ബഹുമാനപ്പെട്ട സുപ്രിംകോടതി പ്രസ്തുത സംഭവവുമായി ബന്ധപ്പെട്ട് അന്നത്തെ നിയമസഭാ സെക്രട്ടറി നൽകിയ പരാതിയുടെ അടിസ്ഥാനത്തിൽ എടുത്ത കേസിലെ പ്രതികൾ വിചാരണ നേരിടണം എന്ന് വിധി പ്രസ്താവിച്ചിരിക്കയാണ്. വിധിയെ സ്വാഗതം ചെയ്യുന്നു. വിചാരണ നടക്കട്ടെ. പറയാനുള്ളത് ബന്ധപ്പെട്ട കോടതിയെ ബോധിപ്പിക്കും. കട്ടതിനോ കവർന്നതിനോ അല്ല യുഡിഎഫിൻ്റെ കവർച്ചയെ എതിർത്തതിനാണ് കേസ്.” കെടി ജലീൽ ഫേസ്ബുക്ക് പോസ്റ്റിൽ പറഞ്ഞു.

Also Read: വിദ്യാഭ്യാസമന്ത്രിയടക്കം വിചാരണ നേരിടും; രാജി ആവശ്യപ്പെട്ട് പ്രതിപക്ഷം; തിരിച്ചടി നേരിട്ട് സർക്കാർ

2015ൽ കെഎം മാണി ധനമന്ത്രിയായിരിക്കേയാണ് വിവാദമായ നിയമസഭാ കയ്യാങ്കളി നടന്നത്. ബാര്‍ കോഴ വിവാദത്തിൽ ആരോപണം നേരിടുന്ന കെ എം മാണിയെ നിയമസഭയിലെത്തി ബജറ്റ് പ്രസംഗം അവതരിപ്പിക്കാൻ അനുവദിക്കില്ലെന്ന് അന്നു പ്രതിപക്ഷത്തായിരുന്ന എൽഡിഎഫ് വ്യക്തമാക്കുകയായിരുന്നു. എതിര്‍പ്പ് അവഗണിച്ച് ബജറ്റ് പ്രസംഗവുമായി നിയമസഭയിലെത്തിയ കെഎം മാണിയുടെ ബജറ്റ് അവതരണം തടസ്സപ്പെടുത്താനായി പ്രതിപക്ഷം നടത്തിയ പ്രതിഷേധം കയ്യാങ്കളിയിലേയ്ക്ക് വഴി മാറുകയായിരുന്നു.