പല്ല് വേദനയ്ക്ക് ആശുപത്രിയിലെത്തി; കാത്തിരിപ്പ് നീണ്ടതോടെ ഡോക്ടറെ കുത്തിപ്പരിക്കേൽപ്പിച്ച് യുവാവ്

ഗ്രേറ്റർ നോയിഡ: പല്ല് വേദനയ്ക്ക് ആശുപത്രിയിലെത്തി കാത്തിരിപ്പ് നീണ്ടതോടെ ക്ഷമ നശിച്ച യുവാവ് ഡോക്ടറെ കുത്തിപ്പരിക്കേൽപ്പിച്ചു. ഉത്തർപ്രദേശിലെ ഗ്രേറ്റർ നോയിഡയിൽ ഇന്നലെയാണ് സംഭവം. ജർച്ച സ്വദേശിയായ മുഹമ്മദ് കുമൈൽ എന്ന 21 കാരനാണ് ഡോക്ടറെ ആക്രമിച്ചതെന്ന് ഇംഗ്ലീഷ് വാർത്താ ചാനലായ ടൈംസ് നൗവാണ് റിപ്പോർട്ട് ചെയ്തത്.

ദാദ്രി മേഖലയിൽ ഡെന്‍റൽ ക്ലിനിക് നടത്തുന്ന ഡോ അജയ് ഘോഷ് ശർമ്മയെയാണ് (45) യുവാവ് ആക്രമിച്ചത്. ശനിയാഴ്ച രാവിലെ 11 മണിയോടെയായിരുന്നു സംഭവം. ഡോക്ടറെ കാണാൻ പല്ലുവേദനയുമായെത്തിയ യുവാവ് കാത്തിരിപ്പ് നീണ്ടതോടെ തർക്കത്തിലേർപ്പെടുകയും ഡോക്ടറെ കുത്തുകയുമായിരുന്നു.

Also Read : ബെംഗളൂരുവിൽ ക്രൂരപീഡനം വീഡിയോയിൽ: യുവതിയെ കോഴിക്കോട് നിന്നു കണ്ടെത്തി



കടുത്ത പല്ലുവേദനയുമായാണ് കുമൈൽ ഡെന്‍റിസ്റ്റിനെ കാണാനെത്തിയത്. ആശുപത്രിയിൽ തിരക്കുള്ളതിനാൽ ഡോക്ടറെ പെട്ടെന്ന് കാണാൻ കഴിഞ്ഞില്ല. ഇതോടെ ഡോക്ടറുമായി വാക്കു തർക്കത്തിലേർപ്പെടുകയായിരുന്നു. തർക്കം രൂക്ഷമായതിനു പിന്നാലെ യുവാവ് കത്തിയെടുത്ത് ഡോക്ടറെ കുത്തുകയായിരുന്നു. ഡോക്ടറെ ഉടൻ തന്നെ സമീപത്തെ ആശുപത്രിയിലേക്ക് കൊണ്ടുപോയി. വിവരം അറിഞ്ഞ് സ്ഥലത്തെത്തിയ പോലീസ് യുവാവിനെ കസ്റ്റഡിയിലെടുക്കുകയും ചെയ്തു.

Also read : മെഡിക്കൽ പിജി സർട്ടിഫിക്കറ്റ് വ്യാജം; കരുനാഗപ്പള്ളി താലൂക്ക് ആശുപത്രിയിലെ ഗൈനക്കോളജിസ്റ്റിനെ സസ്പെന്റ് ചെയ്തു



കൊലപാതക ശ്രമത്തിന് ഐപിസി സെക്ഷൻ 308 പ്രകാരമാണ് യുവാവിനെതിരെ കേസ് രജിസ്റ്റർ ചെയ്തിരിക്കുന്നത്. മൂർച്ചയേറിയ ആയുധം കൊണ്ടാണ് ഡോക്ടറെ യുവാവ് കുത്തിയതെന്നും പരിക്കേറ്റ ഡോ. ശർമ്മ ആശുപത്രിയിലാണെന്നും അഡീഷണൽ ഡെപ്യൂട്ടി കമ്മീഷണർ വിശാൽ പാണ്ഡ പറഞ്ഞു.