കടുവ സംരക്ഷണത്തില്‍ ലോകത്തിലെ പ്രധാന പങ്ക് ഇന്ത്യയുടെത്?

നമ്മുടെ ജൈവവൈവിധ്യം തകരാതെ നിലനിര്‍ത്തുന്നതില്‍ പ്രധാന പങ്ക് വഹിക്കുന്നതില്‍ ഇന്ത്യന്‍ കാടുകളിലെ യഥാര്‍ത്ഥ രാജാക്കന്മാരായ കടുവകളുടെ പങ്ക് അത്രമാത്രം പ്രധാനമാണെന്നിരിക്കെ, കടുവള്‍ക്കായുള്ള ദിനം ഏറ്റവും പ്രാധാന്യത്തോടെ കൈകാര്യം ചെയ്യേണ്ടതും ഇന്ത്യക്കാര്‍ തന്നെയാണ്. സസ്യഭുക്കുകളായ മൃഗങ്ങളുടെ എണ്ണം നിയന്ത്രിക്കുന്നതില്‍ കടുവ പോലുള്ള ഇരപിടിയന്മാരായ മാംസഭുക്കുകളുടെ പങ്കിനെ നിസ്സാരമായി കാണാനാകില്ല. അല്ലാത്ത പക്ഷം പ്രകൃതിയുടെ സന്തുലിതാവസ്ഥ തന്നെ നഷ്ടപ്പെട്ട് മനുഷ്യനടക്കം പട്ടിണിയിലേക്ക് വീഴും.

കടുവ സൗഹൃദ ജൈവവ്യവസ്ഥക്കാണ് നാം ഊന്നല്‍ കൊടുക്കേണ്ടതെന്നും കാടിനോടും മൃഗങ്ങളോടും ചേര്‍ന്നുകൊണ്ട് നൂറ്റാണ്ടുകളായി പിന്തടരുന്ന ജീവീതരീതി മുന്നോട്ട് കൊണ്ടുപോകേണ്ടത് അത്യാവശ്യമാണെന്നും പ്രധാനമന്ത്രി ട്വീറ്റില്‍ ഓര്‍മിപ്പിക്കുന്നുണ്ട്.

എന്തുകൊണ്ട് ഒരു ദിനം?

2010 റഷ്യയിലെ സെന്റ് പീറ്റേഴ്‌സ്ബര്‍ഗില്‍ നടന്ന ഉച്ചകോടിയില്‍ ലോകത്തെ പ്രമുഖ രാജ്യങ്ങളെല്ലാം ചേര്‍ന്ന് ഒരു കരാറില്‍ ഒപ്പുവെച്ചിരുന്നു. ജൂലൈ 29 ലോക കടുവ ദിനമായി ആചരിക്കും എന്നത് കരാറിലെ ഒരു വ്യവ്സ്ഥ മാത്രമാണ്. കൂടാതെ ലോകത്ത് അപകടകരമായ രീതിയില്‍ കുറഞ്ഞുവരുന്ന കടുവകളുടെ എണ്ണം, അതുമൂലമുണ്ടാകുന്ന ജൈവവൈവിധ്യത്തിലെ മാറ്റങ്ങള്‍ എന്നിവയെല്ലാം സൂക്ഷമമായി പഠിക്കുമെന്നും ഉച്ചകോടിയില്‍ തീരുമാനമാനിച്ചിരുന്നു

രണ്ട് കടുവ വര്‍ഗങ്ങളാണ് ഇപ്പോള്‍ ബാക്കിയുള്ളത്. കോണ്ടിനെന്റല്‍ (പാന്തെറ ടൈഗ്രിസ്) കടുവകളും സുണ്ട (പാന്തെറ ടൈഗ്രിസ് സൊണ്ടായിക്ക) കടുവകളും. ഇതില്‍ സുണ്ട വിഭാഗത്തില്‍ ഇനി ആകെ ബാക്കിയുള്ളത് ഇന്തോനേഷ്യയില്‍ കാണുന്ന സുമാത്രന്‍ കടുവകള്‍ മാത്രമാണ്. ബാലി, ജാവ വിഭാഗങ്ങള്‍ വംശനാശത്തിന് ഇരകളായി. കോണ്ടിനെന്റല്‍ കടുവകളാണ് എണ്ണത്തില്‍ കൂടുതല്‍. ബംഗാള്‍, മലായന്‍, ഇന്തോചൈനീസ്, അമുര്‍ (സൈബീരിയന്‍) വിഭാഗങ്ങള്‍ നിലവിലുണ്ട്. ഇക്കൂട്ടത്തില്‍ കാസ്പിയന്‍ കടുവകള്‍ക്കാണ് വംശനാശം സംഭവിച്ചത്. ഇതിന് പുറമേ വേള്‍ഡ് വൈല്‍ഡ്‌ലൈഫ് സംഘടനയുടെ കണക്കുകള്‍ പ്രകാരം സൗത്ത് ചൈന വിഭാഗത്തിലെ കടുവകള്‍ക്കും വംശനാശം സംഭവിച്ചു കഴിഞ്ഞിട്ടുണ്ട്. ഇന്ത്യ, ബംഗ്ലാദേശ്, നേപ്പാള്‍ തുടങ്ങിയവ ഉള്‍പ്പെടുന്ന ഉപഭൂഗന്ധത്തില്‍ കാണുന്നത് ബംഗാള്‍ കടുവകളാണ്.

കടുവകള്‍ ഏറെയുള്ള രാജ്യങ്ങള്‍ 2010ല്‍ തങ്ങള്‍ക്കുള്ളതിന്റെ ഇരട്ടിയായി 2022ല്‍ കടുവകളുടെ എണ്ണം വര്‍ധിപ്പിക്കും എന്നൊരു തീരുമാനം അന്ന് സെന്റ് പീറ്റേഴ്‌സ്ബര്‍ഗില്‍ എടുത്തിരുന്നു. അതില്‍ പ്രകാരം 2022നും നാല് വര്‍ഷം മുന്നേ ഈ നേട്ടം ഇന്ത്യ കൈവരിച്ചിരിക്കുന്നു എന്ന് പ്രധാനമന്ത്രി 2018ല്‍ ഔദ്യോഗികമായി അറിയിച്ചത്. ഇതോടെ ഇന്ത്യ ലോകത്തെ എഴുപത് ശതമാനം കടുവകളുടേയും വാസസ്ഥലമായി മാറുകയായിരുന്നു.

എന്നാല്‍ ഇതിനെല്ലാം വളരെ മുന്നേ കടുവ സംരക്ഷണ നിയമം നടപ്പിലാക്കിയ രാജ്യമാണ് ഇന്ത്യ. 1973ലെ പ്രൊജക്ട് ടൈഗര്‍ പദ്ധതിയുടെ ലക്ഷ്യം ദേശീയ മൃഗം ഇന്ത്യയില്‍ വംശനാശം സംഭവിക്കാതെ നിലനിര്‍ത്തുക എന്നതായിരുന്നു. 1973ല്‍ വെറും 9 ടൈഗര്‍ റിസര്‍വ്വുകളുമായി തുടങ്ങി ഇന്ന് 51 റിസര്‍വ്വുകളാണ് രാജ്യത്താകമാനമുള്ളത്. 18 സംസ്ഥാനങ്ങളിലായി മൊത്തം 71027.10 ചതുരശ്ര അടി വിസ്തീര്‍ണം കടുവകള്‍ക്ക് വേണ്ടി മാത്രമുള്ള റിസര്‍വ്വ്ഡ് വനമേഖലയാണ്.

കേരളത്തിലെ പെരിയാറും പറമ്പിക്കുളവും ഈ പ്രൊജക്ടിന്റെ ഭാഗമായുള്ള ദേശിയോദ്യാനങ്ങളാണ്. 2006ല്‍ 46 കടുവകളുണ്ടായിരുന്നിടത്ത് 2010 ആയപ്പോള്‍ എണ്ണം 71 ആയി. പിന്നീട് 2014ല്‍ 136 ആയി ഉയരുകയും ചെയ്തു.

ഇന്ത്യയിലെ മൊത്തം കടുവകളുടെ എണ്ണത്തിലും ആശ്വാസകരമായ വര്‍ധനവുണ്ടായി. 2014 സെന്‍സസില്‍ രാജ്യത്തെ ആകെ കടുവകളുടെ എണ്ണം 2,226 ആയിരുന്നെങ്കില്‍ 2018ല്‍ അത് 2,967 ആയി ഉയര്‍ന്നു. രാജ്യത്ത് നിന്ന് തന്നെ കടുവകള്‍ നാമാവശേഷമായി പോകും എന്ന ഒരു അവസ്ഥയില്‍ നിന്നാണ് ഇന്ത്യ ഈ നേട്ടം എത്തിപ്പിടിച്ചത് എന്ന വസ്തുക കണക്കുകള്‍ക്ക് മേലെയാണ്

എന്നാല്‍ അന്താരാഷ്ട്ര തലത്തിലേക്ക് വന്നാല്‍ കണക്കുകള്‍ ഇത്രയും ആശ്വാസം നല്‍കുന്നതല്ല. എഴുപത് ശതമാനം കടുവകളും അധിവസിക്കുന്നത് ഇന്ത്യയിലാണ് എന്ന് പറയുമ്പോള്‍ അതിന്റെ മറുവശം, ലോകത്ത് ഇനി ആകെ അവശേഷിക്കുന്നത് വെറും 3900 കടുവകള്‍ മാത്രമാണ് എന്നാണ്. വേള്‍ഡ് വൈല്‍ഡ് ലൈഫ് ഫണ്ടിന്റെ കണക്കുകളാണിത്.

ഏഷ്യയിലും റഷ്യയുടെ സൈബീരിയന്‍ മേഖലയിലും മാത്രമാണിന്ന് കടുവകള്‍. ഏകദേശം 660 പൗണ്ടോളം ഭാരം വെക്കുന്ന ഈ വലിയ ജീവിക്ക് തങ്ങളുടെ ശരാശരി ജീവിത കാലയളവായ 20 വര്‍ഷം പൂര്‍ത്തിയാക്കണമെങ്കില്‍ ഇന്ന് ഒരുപാട് വെല്ലുവിളികളെ അതിജീവിക്കേണ്ടി വരുന്നു. ആവാസവ്യവസ്ഥയില്‍ വന്ന മാറ്റം, മനുഷ്യന്റെ അമിതമായ കടന്നുകയറ്റം, തന്റെ ഭക്ഷണമായ മറ്റ് ജീവികളുടെ കുറവ്, തോലിനും നഖത്തിലും മറ്റുമായുള്ള വേട്ടയാടല്‍ എന്നിവയെല്ലാം അതിജീവിച്ച് ഒരു കടുവ നിലനില്‍ക്കുക എന്നത് വലിയ വെല്ലുവിളി തന്നെയാണ്. സൈബീരിയയിലെ അമുര്‍ കടുവകളാണ് തോലിന് ഏറ്റവും വേട്ടയാടപ്പെടുന്നത്.

****