ഓണക്കാലത്ത് രണ്ട് ശമ്പളമില്ല, ഓണം ബോണസും അനിശ്ചിതത്വത്തിൽ; ധനമന്ത്രി

തിരുവനന്തപുരം: ഓണക്കാലത്ത് ഇത്തവണ സര്‍ക്കാര്‍ ജീവനക്കാര്‍ക്ക് രണ്ട് ശമ്പളം കിട്ടില്ലെന്ന് ധനമന്ത്രി കെ എൻ ബാലഗോപാൽ. മനോരമ ന്യൂസിന് നൽകിയ അഭിമുഖത്തിലാണ് ഇക്കാര്യം പറഞ്ഞത്.



Also Read : കൊവിഡ് കേസുകളിലെ വര്‍ദ്ധനവ്: സംസ്ഥാനത്ത് ഇന്നും നാളെയും സമ്പൂര്‍ണ ലോക്ഡൗൺ



മാസാവസാനമാണ് ഓണം എത്തുന്നത് എങ്കിൽ ആ മാസത്തെ ശമ്പളവും ഓണത്തിന് മുൻപ് സര്‍ക്കാര്‍ ജീവനക്കാര്‍ക്ക് നൽകുന്ന പതിവുണ്ടായിരുന്നു. ഇങ്ങനെയാണ് മാസം രണ്ട് ശമ്പളം സര്‍ക്കാര്‍ ജീവനക്കാര്‍ക്ക് ലഭിച്ചിരുന്നത്. എന്നാൽ, ഇത്തവണ അത്തരത്തിൽ രണ്ട് ശമ്പളം ലഭിക്കില്ലെന്ന് വ്യക്തമാക്കിയിരിക്കുകയാണ് ധനമന്ത്രി കെ എൻ ബാലഗോപാൽ.

സാമ്പത്തിക പ്രതിസന്ധി കടുത്തതോടെ ബോണസും ഉത്സവബത്തയും നൽകുന്നതും അനിശ്ചിതത്വത്തിലായി. നിലവിലെ സന്ദര്‍ഭത്തിന്റെ ഗൗരവം എല്ലാവരും മനസ്സിലാക്കണമെന്ന് ധനമന്ത്രി കെ എൻ ബാലഗോപാൽ വ്യക്തമാക്കി.

കൊവിഡ് കാലത്തും ഏറെ സംരക്ഷിക്കപ്പെട്ട വിഭാഗം ശമ്പളവും പെൻഷനും കിട്ടുന്ന വിഭാഗവുമാണെന്നും ധനമന്ത്രി വ്യക്തമാക്കി. മറ്റ് മേഖലകളില്‍ വളരെ ഗുരുതരമായ സ്ഥിതിയാണുള്ളത്. അതെല്ലാം കണക്കാക്കി എല്ലാവര്‍ക്കും ഓണം എത്തിക്കുക എന്ന സമീപനമായിരിക്കും സര്‍ക്കാരിന്റേത് എന്ന് മന്ത്രി മാധ്യമത്തോട് പറഞ്ഞു. അതേസമയം, ഉത്സവബത്തയും ബോണസും വേണ്ടന്ന് വയ്ക്കുന്നതിൽ സര്‍ക്കാര്‍ അന്തിമ തീരുമാനമെടുത്തിട്ടില്ലെന്ന് മന്ത്രി വ്യക്തമാക്കി.

ഇത് സംബന്ധിച്ച് ആലോചനകള്‍ നടന്നുവരികയാണ്. മുഖ്യമന്ത്രിയുടേതാകും അന്തിമ തീരുമാനമെന്നാണ് മനോരമ റിപ്പോര്‍ട്ട് ചെയ്യുന്നത്.

Also Read : ഒറ്റ ദിവസംകൊണ്ട് അഞ്ച് ലക്ഷം ഡോസ് വാക്സിൻ വിതരണം; ഒരു ലക്ഷം ഡോസ് ലഭിച്ചത് തലസ്ഥാന ജിലയ്ക്ക്



കൊവിഡ് കാലഘട്ടമായിരുന്നുവെങ്കിലും കഴിഞ്ഞ വട്ടം ഓണം അഡ്വാൻസായി 15,000 രൂപ വരെ നൽകി. 27,360 രൂപ വരെ ശമ്പളമുള്ളവര്‍ക്ക് 4,000 രൂപ ബോണസും അതിൽ കൂടിയ ശമ്പളമുള്ളവര്‍ക്ക് 2750 രൂപ ഉത്സവബത്തയും നൽകിയിരുന്നു. അതിന് പുറമെ, രണ്ട് മാസത്തെ ശമ്പളം അടക്കം 6,000 കോടിയിലേറെ രൂപയായിരുന്നു സംസ്ഥാന സര്‍ക്കാര്‍ ചെലവാക്കിയത് എന്നും മനോരമ ഓൺലൈൻ റിപ്പോർട്ട് ചെയ്തു.