പൂര്‍ണമായി വാക്സിന് എടുത്തവരാണെങ്കിലും ഇന്ത്യയില്‍ നിന്ന് വരുന്നവര്‍ക്ക് വീണ്ടും ഹോട്ടല്‍ ക്വാറന്റൈന് ഏര്‍പ്പെടുത്താന്‍ ഖത്തര്‍ തീരുമാനം. ആഗസ്റ്റ് രണ്ട് തിങ്കളാഴ്ച ഉച്ചയ്ക്ക് 12 മണി മുതല്‍ നിയമം പ്രാബല്യത്തില്‍ വരുമെന്ന് ഔദ്യോഗിക വൃത്തങ്ങള്‍ അറിയിച്ചു.
ഖത്തറില്‍ നിന്ന് വാക്‌സിനെടുത്തവര്‍ക്ക് രണ്ടു ദിവസം
ഖത്തര്‍ ആരോഗ്യ മന്ത്രാലയത്തിന്റെ അംഗീകാരമുള്ള വാക്സിന് പൂര്‍ണമായി എടുത്തവരെ ക്വാറന്റൈനില്‍ നിന്ന് ഒഴിവാക്കുമെന്നായിരുന്നു നേരത്തേ ഖത്തര്‍ ആരോഗ്യ മന്ത്രാലയം അധികൃതര്‍ അറിയിച്ചിരുന്നത്. എന്നാല്‍ ആറ് രാജ്യങ്ങള്‍ക്ക് ഈ ഇളവ് ബാധകമല്ലെന്ന് ഇന്നലെ അറിയിക്കുകയായിരുന്നു. ഈ രാജ്യങ്ങളില്‍ കൊവിഡിന്റെ ഡെല്‍റ്റ വകഭേദം വ്യാപകമായതിനെ തുടര്‍ന്നാണ് നടപടി. ഈ രാജ്യങ്ങളില്‍ നിന്ന് വരുന്നവര്‍ ഖത്തറില്‍ നിന്ന് പൂര്‍ണമായി വാക്സിന് സ്വീകരിച്ചവരോ ഇവിടെ വച്ച് കൊവിഡ് രോഗമുക്തി നേടിയവരോ ആണെങ്കില്‍ രണ്ട് ദിവസത്തേക്കാണ് ഹോട്ടല്‍ ക്വാറന്റൈന് നിര്‍ബന്ധമാക്കിയിരിക്കുന്നത്. ക്വാറന്റൈനില്‍ കഴിയുന്ന രണ്ടാം ദിവസം പിസിആര്‍ പരിശോധന നടത്തണം. ടെസ്റ്റ് ഫലം നെഗറ്റീവ് ആണെങ്കില്‍ അന്നു തന്നെ ക്വാറന്റൈന് അവസാനിപ്പിക്കുകയും ചെയ്യാം.
പുറത്തുനിന്ന് വാക്‌സിനെടുത്തവര്‍ക്ക് 10 ദിവസം
എന്നാല്‍ ഖത്തറിന് പുറത്ത് നിന്ന് വാക്സിന് എടുത്തവര്‍ക്കും പൂര്‍ണമായി വാക്സിന് എടുക്കാത്തവര്‍ക്കും കൊവിഡ് മുക്തി നേടിയവര്‍ക്കും 10 ദിവസമാണ് ഹോട്ടല്‍ ക്വാറന്റൈന്. വാക്സിനെടുത്ത് സന്ദര്‍ശക വിസയില്‍ വരുന്നവര്‍ക്കും ഈ വ്യവസ്ഥ ബാധകമാണ്. നിലവില്‍ പൂര്‍ണമായി വാക്സിന് എടുക്കാത്തവര്‍ക്ക് ടൂറിസ്റ്റ്, വിസിറ്റ്, ഓണ്‍ അറൈവല്‍ വിസകളില്‍ ഖത്തര്‍ പ്രവേശനം അനുവദിക്കുന്നില്ല. നിലവില്‍ രാജ്യങ്ങളെ ഗ്രീന്‍, യെല്ലോ, റെഡ് വിഭാഗങ്ങളില്‍ ഉള്‍പ്പെടുത്തിയാണ് ഖത്തര്‍ യാത്രാ നയം പ്രഖ്യാപിച്ചിരിക്കുന്നത്. 30 രാജ്യങ്ങള്‍ ഗ്രീന്‍ പട്ടികയിലും 88 രാജ്യങ്ങള്‍ യെല്ലോ പട്ടികയിലും ഇന്ത്യ ഉള്‍പ്പെടെയുള്ള 94 രാജ്യങ്ങള്‍ റെഡ് പട്ടികയിലുമാണുള്ളത്. എന്നാല്‍ റെഡ് രാജ്യങ്ങളില്‍ തന്നെ ആറ് ഏഷ്യന്‍ രാജ്യങ്ങള്‍ക്ക് അധിക നിയന്ത്രണങ്ങള്‍ ഏര്‍പ്പെടുത്തുകയായിരുന്നു.
പിസിആര്‍ നെഗറ്റീവ് സര്‍ട്ടിഫിക്കറ്റ് നിര്‍ബന്ധം
അതേസമയം, രാജ്യത്തെത്തുന്ന എല്ലാവര്‍ക്കും യാത്രയുടെ 72 മണിക്കൂറിനുള്ളില്‍ എടുത്ത ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് നിര്‍ബന്ധമാണ്. എന്നാല്‍ ഗ്രീന്‍ കാറ്റഗറിയില്‍ പെട്ടവരാണെങ്കില്‍ ക്വാറന്റൈന്റെ നാലാം ദിവസം ഒരു പിസിആര്‍ ടെസ്റ്റ് കൂടി നടത്തണം. യെല്ലോ പട്ടികയില്‍ പെട്ടവര്‍ ആറാം ദിവസവും റെഡ് പട്ടികയില്‍പ്പെട്ടവര്‍ ഒന്‍പതാം ദിവസും സ്വന്തം ചെലവില്‍ ടെസ്റ്റ് നടത്തണം. ഇതിനു പുറമെ, പൂര്‍ണമായി വാക്സിന് എടുത്തവരാണെങ്കിലും റെഡ് കാറ്റഗറിയില്‍ നിന്ന് വരുന്നവര്‍ എയര്‍പോര്‍ട്ടില്‍ വച്ച് ഒരു പിസിആര്‍ ടെസ്റ്റ് നടത്തി നെഗറ്റീവാണെന്ന് തെളിയിക്കണം.
വാക്സിനെടുക്കാത്തവര്‍ക്ക് ക്വാറന്റൈന്
രണ്ട് ഡോസ് എടുക്കേണ്ട വാക്‌സിന്റെ ഒരു ഡോസ് മാത്രം എടുത്തവര്‍, വാക്സിനെടുത്ത് 14 ദിവസം പൂര്‍ത്തിയാക്കാത്തവര്‍, ഖത്തര്‍ ആരോഗ്യ മന്ത്രാലയത്തിന്റെ അംഗീകാരമില്ലാത്ത വാക്സിനെടുത്തവര്‍, ഖത്തറിന് പുറത്ത് നിന്ന് കൊവിഡ് വന്ന് ഭേദമായവര്‍ എന്നിവര്‍ക്ക് ഹോട്ടല്‍ ക്വാറന്റൈന് നിര്‍ന്ധമാണ്. എന്നാല്‍ ഇവര്‍ വരുന്ന രാജ്യത്തിന്റെ കാറ്റഗറിയുടെ അടിസ്ഥാനത്തില്‍ ക്വാറന്റൈന് വ്യവസ്ഥകളില്‍ മാറ്റങ്ങളുണ്ട്. ഗ്രീന്‍ പട്ടികയില്‍ പെട്ട രാജ്യങ്ങളില്‍ നിന്ന് വരുന്നവര്‍ക്ക് അഞ്ച് ദിവസത്തെ ഹോം ക്വാറന്റൈന് മതി. യെല്ലോ രാജ്യങ്ങളില്‍ നിന്ന് വരുന്നവര്‍ ഏഴു ദിവസം ഹോട്ടല്‍ ക്വാറന്റൈനില്‍ കഴിയണം. റെഡ് കാറ്റഗറി രാജ്യങ്ങളില്‍ നിന്ന് വരുന്നവര്‍ക്ക് 10 ദിവസത്തെ ഹോട്ടല്‍ ക്വാറന്റൈനാണ് വ്യവസ്ഥ ചെയ്തിരിക്കുന്നത്. ഫൈസര്‍ ബയോണ്‍ടെക്, മോഡേണ, കോവിഷീല്‍ഡ്, ജോണ്‍സണ്‍ ആന്റ് ജോണ്‍സണ്‍ എന്നിവയ്ക്ക് പുറമേ സിനോഫാം, സിനോവാക് എന്നീ വാക്സിനുകള്‍ക്കും ഉപാധികളോടെ ഖത്തര്‍ ആരോഗ്യ മന്ത്രാലയം അംഗീകാരം നല്‍കിയിട്ടുണ്ട്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : qatar makes quarantine for indians again compulsory
Malayalam News from malayalam.samayam.com, TIL Network
