ഒമാന്‍ തീരത്തിനു സമീപം ഇസ്രായേലി എണ്ണക്കപ്പല്‍ ആക്രമിക്കപ്പെട്ടു; രണ്ട് മരണം

മസ്‌ക്കറ്റ്: അറബിക്കടലില്‍ ഒമാന്‍ തീരത്ത് നിന്ന് അല്‍പം അകലെയായി ഇസ്രായേലി എണ്ണക്കപ്പല്‍ ആക്രമണത്തിനിരയായി. ആക്രമണത്തില്‍ കപ്പലിലുണ്ടായിരുന്ന രണ്ടുപേര്‍ കൊല്ലപ്പെട്ടതായി കപ്പല്‍ സര്‍വീസ് കൈകാര്യം ചെയ്യുന്ന സോഡിയാക് മാരിടൈം എന്ന ഇസ്രായേല്‍ കമ്പനി അറിയിച്ചു. ഒമാനിന് വടക്കുകിഴക്കുള്ള മസീറ ദ്വീപിനു സമീപത്ത് വച്ച് വ്യാഴാഴ്ച അര്‍ധ രാത്രിക്കു ശേഷമാണ് മെര്‍സര്‍ സ്ട്രീറ്റ് എന്നു പേരുള്ള ഓയില്‍ ടാങ്കറിനെതിരേ ആക്രമണം നടന്നത്. കപ്പലിലെ ജീവനക്കാരായ ബ്രിട്ടീഷ്, റൊമാനിയന്‍ പൗരന്‍മാരാണ് കൊല്ലപ്പെട്ടതെന്നും മറ്റാര്‍ക്കും പരിക്കുകളോ മറ്റോ ഉള്ളതായി റിപ്പോര്‍ട്ടില്ലെന്നും കപ്പല്‍ ഓപ്പറേറ്റര്‍ അറിയിച്ചു. ബ്രിട്ടനിലെ മാരിടൈം സെക്യൂരിറ്റി സ്ഥാപനമായ ആംബ്രെയുടെ ജീവനക്കാരനാണ് കൊല്ലപ്പെട്ട ബ്രിട്ടീഷുകാരന്‍.



Also Read: “ബിന്‍ ലാദിനെ സൗദിക്ക് വിട്ടുനല്‍കിയിരുന്നുവെങ്കില്‍ ട്രേഡ് സെന്റര്‍ ആക്രമണം ഉണ്ടാകുമായിരുന്നില്ല”

ഇസ്രായേലി ബിസിനസ് രാജാവായ ഇയാല്‍ ഓഫറിന്റെ ഉടമസ്ഥതയിലുള്ള കപ്പലാണ് ആക്രമിക്കപ്പെട്ടത്. കപ്പലിനെതിരേ ഡ്രോണ്‍ ആക്രമണമാണ് നടന്നതെന്നാണ് പ്രാഥമിക നിഗമനം. ആക്രമണത്തിന് തൊട്ടുമുമ്പ് കപ്പലിനു സമീപം ഒരു ഡ്രോണ്‍ ശ്രദ്ധയില്‍പ്പെട്ടതായി സ്വകാര്യ മാരിടൈം ഇന്റലിജന്‍സ് കമ്പനിയായ ഡ്രയാല്‍ ഗ്ലോബല്‍ അറിയിച്ചു. എന്നാല്‍ ആക്രമണത്തിന് പിന്നില്‍ ആരാണെന്ന് വ്യക്തമല്ല. സ്‌ഫോടക വസ്തുക്കള്‍ നിറച്ച വണ്‍വേ ഡ്രോണുകള്‍ ഉപയോഗിച്ചുള്ള ആക്രമണം പതിവാക്കിയ ഇറാന്‍, യമനിലെ ഹൂത്തി വിമതര്‍ തുടങ്ങിയവരാണ് സംശയത്തിന്റെ നിഴലിലുളളത്.

Also Read: അവശ്യ സാധനങ്ങളുടെ വില നിയന്ത്രിക്കണമെന്ന ആവശ്യവുമായി ഒമാന്‍ ഗ്രാന്‍റ് മുഫ്ത്തി

അതേസമയം, ലൈബീരിയന്‍ പതാക വഹിച്ച ജാപ്പനീസ് ഉടമസ്ഥതയിലുള്ള കപ്പലാണിതെന്നാണ് സോഡിയാക്കിന്റെ വാദം. എന്നാല്‍ ഇസ്രായേല്‍ ഉടമസ്ഥതയിലുള്ളതാണ് കപ്പലെന്ന് ബ്രിട്ടീഷ് പ്രതിരോധ മന്ത്രാലയം നേരത്തേ വ്യക്തമാക്കിയിരുന്നു. സംഭവത്തോട് ഇസ്രായേല്‍ അധികൃതര്‍ പ്രതികരിച്ചിട്ടില്ല. കഴിഞ്ഞ ഏതാനും മാസങ്ങള്‍ക്കിടയില്‍ ഇസ്രായേല്‍ എണ്ണക്കപ്പലുകള്‍ക്കു നേരെ നേരത്തേയും ആക്രമണമുണ്ടായിരുന്നു. ആക്രമണത്തിന് പിന്നില്‍ ഇറാനാണെന്നായിരുന്നു ഇസ്രായേല്‍ ആരോപണം. ഒമാന്‍ തലസ്ഥാനമായ ഒമാനിന് 300 കിലോമീറ്റര്‍ തെക്കുകിഴക്കാണ് കപ്പലിന് നേരെ ആക്രമണം നടന്ന സ്ഥലം.