ബജറ്റ് സമ്മേളനത്തില്‍ പാസ്സാക്കിയ ബിൽ പാര്ലമെന്റ് അംഗീകരിച്ചു. കുട്ടികളുടെ സംരക്ഷണവുമായി ബന്ധപ്പെട്ട നിയമം. പഴയ പല ഭേദഗതികളിലും കാര്യമായ മാറ്റം വരുത്തിയ നിയമം.
നിർഭയയുടെ അമ്മ. Photo: TOI
ഈ വര്‍ഷം തന്നെ മാര്‍ച്ചില്‍ ബജറ്റ് സെഷനിടെ ലോകസഭ പാസ്സാക്കിയ ബില്ലാണ് ഇപ്പോള്‍ രാജ്യസഭയും അംഗീകരിച്ചിരിക്കുന്നത്. കടുത്ത അഭിപ്രായഭിന്നതകള്‍ക്കിടയിലും ഭരണപക്ഷവും പ്രതിപക്ഷവും ഒരേപോലെ അംഗീകരിക്കുന്നു എന്നതാണ് ബില്ലിന്റെ എടുത്തു പറയേണ്ട പ്രത്യേകതയും.
എന്താണ് നിയമം? മാറ്റങ്ങളെന്തൊക്കെ
2000ലെ ഇന്ത്യന്‍ ജുവനൈല്‍ ഡെലിക്വന്‍സി ആന്റ് ജസ്റ്റിസ് ലോ 2015ല്‍ നലിയ രീതിയില്‍ മാറ്റത്തോടെ പുതിയതായി അവതരിപ്പിക്കുയായിരുന്നു. ഈ നിയമത്തിന് ഒരുപാട് അപാകതകളുണ്ടായിരുന്നു എന്ന് പിന്നീട് തിരിച്ചറിയുകയും അതിന്‍പ്രകാരം പഴുതുകളടക്കുന്ന ഒരു പുതിയ നിയമത്തിന്റെ സാധ്യത പാര്ലമെന്റ് ഒന്നടങ്കം അംഗീകരിക്കുകയും ചെയ്തു
‘രാജ്യത്തെ കുട്ടികള്‍ സുരക്ഷക്കും സ്വസ്ഥമായ ജീവിതത്തിനും വേണ്ടി ഭരണകര്‍ത്താക്കളുടെ ശ്രദ്ധ കൂടുതലായി ആവശ്യപ്പെടുന്ന സമയമാണിത്’ ബില്‍ അവതരിപ്പിച്ചുകൊണ്ട് കേന്ദ്ര വനിത-ശിശുക്ഷേമ വകുപ്പ് മന്ത്രി സ്മൃതി ഇറാനി അഭിപ്രായപ്പെട്ടു.
‘ഭൂരിഭാഗം പാര്‍ലമെന്റേറിയന്‍ ജനപ്രതിനിധികളും സമൂഹത്തിലെ അരികവല്‍ക്കരിക്കപ്പെട്ടവരുടെ കൂടെയാണ്. അതിനാല്‍ത്തന്നെ ഇത്തരമൊരു വിഷയം അംഗീകാരം നേടും എന്നുറപ്പാണ്’ മന്ത്രി കൂട്ടിച്ചേര്‍ത്തു.
പുതിയ നിയമത്തിലെ പ്രധാന മാറ്റം എന്നുപറയാവുന്നത് കുറ്റകൃത്യങ്ങളിലും മറ്റ് ക്രിമനല്‍ പ്രവര്‍ത്തനങ്ങളിലും ഏര്‍പ്പെടുന്ന കുട്ടികളെക്കുറിച്ചുള്ളതാണ്. കഴിഞ്ഞ കുറച്ച് വര്‍ഷങ്ങളില്‍ ഏറ്റവും വിവാദമുണ്ടാക്കിയ ഒരു വിഷയമാണ് ഗൗരവമേറിയ കുറ്റകൃത്യങ്ങളില്‍ ഏര്‍പ്പെടുന്ന 18 വയസ്സിന് താഴെയുള്ളവരുടെ നിയമനടപടികള്‍ സംബന്ധിച്ചുള്ള കാര്യങ്ങള്‍. കുറ്റത്തിന്റെ സ്വഭാവമനുസരിച്ച് 16 മുതല്‍ 18 വയസ് വരെയുള്ളവരേയും മുതിര്‍ന്നവരായി കാണാം എന്നുള്ളതാണ് പുതിയ തീരുമാനം.
2012ലെ രാജ്യത്തെ നടുക്കിയ ഡല്‍ഹി കൂട്ടബലാത്സംഘ കേസാണ് പുതിയ നിയമത്തിന്റെ പ്രാധാന്യത്തിലേക്ക് നയിച്ചത്. അന്ന് 18 വയസ് ആയിട്ടില്ല എന്ന കാരണത്താല്‍ പ്രതികളിലൊരാളെ ശിക്ഷിക്കാന്‍ കഴിഞ്ഞിരുന്നില്ല
ദത്തെടുക്കുന്നതുമായി ബന്ധപ്പെട്ടതാണ് ബില്ലിലെ മറ്റൊരു പ്രധാന തീരുമാനം. നിലവില്‍ ഏറെ സങ്കീര്‍ണതകളുള്ള അഡോപ്ഷന് ആക്ട് കൂടുതല്‍ സൗഹൃദപരമാക്കുക എന്നതാണ് ഭേദഗതിയുടെ ലക്ഷ്യം എന്ന് സ്മൃതി ഇറാനി വ്യക്തമാക്കി. അതിന്റെ ഭാഗമായി ഇനി മുതല്‍ കോടതിക്ക് പകരം ജില്ലാ മജിസ്‌ട്രേറ്റിനോ അഡീഷണല്‍ ജില്ലാ മജിസ്‌ട്രേറ്റിനോ ജുവനൈല്‍ ജസ്റ്റിസ് ആക്ട് സെക്ഷന്‍ 61 പ്രകാരം ഇത് സംബന്ധിച്ച ഉത്തരവുകള്‍ നല്‍കാം.
2018 ജൂലെ വരെയുള്ള കാലയളവില്‍ ആകെ 629 ദത്തെടുക്കല്‍ കേസുകളാണ് രാജ്യത്തെ വിവിധ കോടതികളിലായി തീരുമാനമാകാതെ കെട്ടിക്കിടക്കുന്നത്. അതിനാല്‍ത്തന്നെ കേസുകള്‍ കോടതിയില്‍ നിന്ന് മാറ്റുന്നതോടെ വേഗത്തില്‍ തീര്‍പ്പാകുന്നതിനുള്ള സാധ്യതകള്‍ തെളിയും. ഇതോടെ പ്രാധാന്യം കുറയുക 1956ലെ ഹിന്ദു അഡോപ്ഷന് ആന്റ് മെയിന്റനന്‍സ് ആക്ടും 1890ലെ ഗാര്‍ഡിയന്‍സ് ഓഫ് വാര്‍ഡ് ആക്ടുമാണ്. മുസ്ലം വിഭാഗത്തിലെ ദത്തെടുക്കലുമായി ബന്ധപ്പെട്ടുള്ളതാണ് ഗാര്‍ഡിയന്‍സ് ആക്ട്.
സെന്‍ഡ്രല്‍ അഡോപ്ഷന് റിസോഴ്‌സ് അതോറിറ്റിക്ക് കൂടുതല്‍ അധികാരമുള്ള ഒരു സ്വതന്ത്ര ഏജന്‍സിയായി ഇനി പ്രവര്‍ത്തിക്കാം. അനാഥര്‍, ഉപേക്ഷിക്കപ്പെട്ടവര്‍, മറ്റ് കാരണങ്ങളാല്‍ മാറ്റി നിര്‍ത്തപ്പെവര്‍ എന്നിങ്ങനെയുള്ള കുട്ടികളെ സംബന്ധിച്ചാണ് പുതിയ ഭേദഗതിയില്‍ പറയുന്നത്
കോടതിയുടെ ഭാരം കുറയ്ക്കുക എന്നത് മാത്രമല്ല അധികാരം മജിസ്‌ട്രേറ്റിന് നല്‍കുന്നതിലൂടെ ഉദ്ദേശിക്കുന്നതെന്നും പകരം ദത്തെടുക്കല്‍ പ്രക്രിയ കൂടുതല്‍ എളുപ്പമുള്ളതാക്കി രാജ്യത്ത് ആ പ്രവണതക്ക് പ്രോത്സാഹനം കൊടുക്കുക എന്ന ലക്ഷ്യം കൂടിയുണ്ടെന്ന് ബില്‍ വിശദീകരിക്കവെ സ്മൃതി ഇറാനി വ്യക്തമാക്കി. നിലവില്‍ നിയമങ്ങളുടെ സങ്കീര്‍ണതകള്‍ മൂലവും തീരുമാനമാകാന്‍ എടുക്കുന്ന ഭീമമായ കാലതാമസം മൂലവും പലരും താല്‍പര്യമുണ്ടായിട്ടും അഡോപ്ഷന് മുന്നോട്ട് വന്നിരുന്നില്ല രാജ്യത്ത്.
പുതിയ മാറ്റങ്ങള്‍ രാജ്യത്തെ ലക്ഷക്കണക്കിന് വരുന്ന അനാഥബാല്യങ്ങള്‍ക്ക് പുതിയ ജീവിതത്തിലേക്ക് കടക്കാന്‍ വഴിയൊരുക്കും എന്ന പ്രതീക്ഷയും മന്ത്രി പങ്കുവെക്കുന്നു.
ജില്ലാ മജിസ്‌ട്രേറ്റിന്റെ പുതിയ ചുമതല
ദത്തെടുക്കല്‍ പ്രക്രിയകളില്‍ മാത്രമല്ല, കുട്ടികളുമായി ബന്ധപ്പെട്ട മറ്റനേകം നിയമങ്ങളിലും ജില്ലാ, അഡീഷണല്‍ ജില്ലാ മജിസ്‌ട്രേറ്റുമാരുടെ അധികാരപരിധി വിപുലീകരിക്കപ്പെട്ടു. ഇനി മുതല്‍ ചൈല്‍ഡ് വെല്‍ഫെയര്‍ കമ്മിറ്റികള്‍, വിവിധ ജുവനൈല്‍ ജസ്റ്റിസ് ബോര്‍ഡുകള്‍, ബാലാവകാശ സംരക്ഷണ യൂണിറ്റുകള്‍ എന്നിവയെല്ലാം ജില്ലാ മജിസ്‌ട്രേറ്റിന് തീരുമാനമെടുക്കാം.
2018-19 കാലയളവില്‍ നടത്തിയ എന്‍.സി.പി.സി.ആര്‍ സര്‍വ്വേയുടെ റിപ്പോര്‍ട്ടുകളാണ് കേന്ദ്രത്തെ ബാലാവകാശ നിയമങ്ങളില്‍ മാറി ചിന്തിക്കാന്‍ പ്രേരിപ്പിച്ചത്. റിപ്പോര്‍ട്ട് പ്രകാരം രാജ്യത്തെ 7,000 ചൈല്‍ഡ് ഹോമുകളില്‍ 1.5 ശതമാനവും നിയമങ്ങള്‍ പാലിക്കുന്നില്ല എന്നും 29 ശതമാനവും നടത്തിപ്പുമായി ബന്ധപ്പെട്ട് ധാരാളം പ്രശ്‌നങ്ങള്‍ നേരിടുന്നുണ്ട് എന്നുമാണ്. ഏറ്റവും ഞെട്ടിക്കുന്ന വസ്തുത എന്തായിരുന്നു എന്നുവെച്ചാല്‍, രാജ്യത്തെ ഒരു ചെല്‍ഡ് ഹോം പോലും 100 ശതമാനം നിയമം പാലിച്ച് നടത്തപ്പെടുന്നില്ല എന്നതാണ്.
പലപ്പോഴും രജിസ്‌ട്രേഷനിലും മറ്റും തിരിമറി നടത്തിയാണ് ഇത്തരം ബാലഭവനങ്ങള്‍ അനധികൃതമായി പ്രവര്‍ത്തിക്കുന്നത്. പുതിയ നിയമം പ്രകാരം ഈ പ്രശ്‌നം ഉണ്ടാകാതിരിക്കാന്‍ ജില്ലാ മജിസ്‌ട്രേറ്റിന്റെ അുവാദമില്ലാതെ ഇനി രാജ്യത്ത് ചൈല്‍ഡ് ഹോമുകള്‍ തുടങ്ങാന്‍ കഴിയില്ല.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : juvenile justice bill become act parliament 2021 monsoon session
Malayalam News from malayalam.samayam.com, TIL Network
