Sumayya P | Samayam Malayalam | Updated: 03 Jun 2021, 11:07:36 AM
ആവശ്യത്തിന് വൈറ്റമിന്‍ ഡി ഉള്ളവരില്‍ കൊവിഡ് ബാധ ഗുരുതരമായ ആരോഗ്യ പ്രശ്‌നങ്ങള്‍ ഉണ്ടാക്കിയിട്ടില്ലെന്നും പഠനത്തില്‍ വ്യക്തമായി.
59 ശതമാനം പേരിലും വൈറ്റമിന്‍ ഡിയുടെ കുറവ്
ഖലീഫ യൂനിവേഴ്‌സിറ്റി സെന്റര്‍ ഫോര്‍ ബയോടെക്‌നോളജിയിലെ ഡോ. ഹബീബ അല്‍ സഫര്‍, സായിദ് യൂനിവേഴ്‌സിറ്റിയിലെ ക്ലിനിക്കല്‍ ബയോകെമിസ്ട്രി അസോസിയേറ്റ് പ്രഫസര്‍ ഡോ. ഫത്മ അല്‍ അനൂതി എന്നിവരാണ് ഇതുമായി ബന്ധപ്പെട്ട് പഠനം നടത്തിയത്. കൊവിഡ് ബാധ ഗുരുതരമായ ആരോഗ്യ പ്രശ്‌നങ്ങള്‍ സൃഷ്ടിച്ച രോഗികളില്‍ നടത്തിയ പഠനത്തില്‍ അവരില്‍ 59 ശതമാനം പേരിലും വൈറ്റമിന്‍ ഡിയുടെ കാര്യമായ കുറവ് കണ്ടെത്തിയതായി ഗവേഷകര്‍ പറഞ്ഞു. അതേസമയം, ആവശ്യത്തിന് വൈറ്റമിന്‍ ഡി ഉള്ളവരില്‍ കൊവിഡ് ബാധ ഗുരുതരമായ ആരോഗ്യ പ്രശ്‌നങ്ങള്‍ ഉണ്ടാക്കിയിട്ടില്ലെന്നും പഠനത്തില്‍ വ്യക്തമായി.
വൈറ്റമിന്‍ ഡിയുടെ കുറവ് നികത്തണമെന്ന് ആരോഗ്യ വകുപ്പ്
യുഎഇ ജനസംഖ്യയില്‍ 70 ശതമാനത്തിലേറെയും വൈറ്റമിന്‍ ഡിയുടെ കുറവുണ്ടെന്നാണ് കണ്ടെത്തല്‍. അതുകൊണ്ടുതന്നെ ഇക്കാര്യത്തില്‍ കൂടുതല്‍ ജാഗ്രത പാലിക്കണമെന്ന് യുഎഇ ആരോഗ്യ വകുപ്പ് മുന്നറിയിപ്പ് നല്‍കി. അന്താരാഷ്ട്ര തലത്തില്‍ നടത്തിയ പഠനങ്ങളും യുഎഇ ഗവേഷണ ഫലത്തെ സാധൂകരിക്കുന്നതാണെന്നും ബന്ധപ്പെട്ടവര്‍ പറഞ്ഞു. കഴിഞ്ഞ വര്‍ഷം സപ്തംബറില്‍ അബൂദാബിയില്‍ നടന്ന വൈറ്റമിന്‍ ഡി ഡെഫിഷ്യന്‍സി വാര്‍ഷിക അന്താരാഷ്ട്ര സമ്മേളനത്തില്‍ സൂര്യതാപം ഏല്‍ക്കുന്നതിലൂടെ ലഭിക്കുന്ന സംരക്ഷണം വളരെ പ്രധാനമാണ് വിദഗ്ധര്‍ അഭിപ്രായപ്പെട്ടിരുന്നു.
വൈറ്റമിന്‍ ഡിയുടെ അളവ് എങ്ങനെ കൂട്ടാം?
യുഎഇ പോലുള്ള സൂര്യപ്രകാശം വേണ്ടുവോളം ലഭിക്കുന്ന പ്രദേശത്ത് ആളുകള്‍ മുറികളില്‍ നിന്നും വാഹനങ്ങളില്‍ നിന്നും പുറത്തിറങ്ങി നടക്കാന്‍ തയ്യാറാവാത്തതാണ് വൈറ്റമിന്‍ ഡിയുടെ കാര്യമായ കുറവ് റിപ്പോര്‍ട്ട് ചെയ്യപ്പെടാന്‍ കാരണമെന്ന് ഗവേഷകരിലൊരാളായ ഡോ. ഫത്മ അല്‍ അനൂത്തി പറഞ്ഞു. കോരമീന്‍, മത്തി, അയല തുടങ്ങിയ മല്‍സ്യങ്ങള്‍ വൈറ്റമിന്‍ ഡി സമ്പുഷ്ടമാണ്. ഇതിനു പുറമെ, വൈറ്റമിന്‍ ഡി സപ്ലിമെന്റുകളും ലഭ്യമാണ്. എന്നാല്‍ വയസ്സിനും ശരീര ഭാരത്തിനും അനുസൃതമായി എത്ര അളവ് കഴിക്കണമെന്നത് ഡോക്ടറുമായി ആലോചിച്ച് തീരുമാനിക്കാവുന്നതാണ്. പക്ഷെ, അതിനേക്കാളൊക്കെ നല്ലത് തൊലിപ്പുറത്തേല്‍ക്കുന്ന സൂര്യ പ്രകാശത്തിലൂടെ വൈറ്റമിന്‍ ഡിയുടെ അളവ് കൂട്ടുന്നതാണെന്ന് ഡോ. ഫത്മ പറയുന്നു.
ദിവസവും 15 മിനുട്ട് വെയില്‍ കായണം
ദിവസവും രാവിലെ 10നും വൈകിട്ട് മൂന്നിനും ഇടയിലുള്ള സമയത്ത് ശരാശരി 15 മിനുട്ട് വെയില്‍ കായുന്നതിലൂടെ ശരീരത്തിന് ആവശ്യമായ വൈറ്റമിന്‍ ഡി ലഭിക്കുമെന്നാണ് ഡോക്ടര്‍മാരുടെ പക്ഷം. അതേസമയം, സണ്‍സ്‌ക്രീന്‍ പോലുള്ള സൂര്യ താപത്തെ തടയുന്ന ക്രീമുകളോ മറ്റോ ശരീരത്തില്‍ പുരട്ടാതെ വേണം വെയില്‍ കായാല്‍. അധിക നേരം വെയിലത്ത് നില്‍ക്കാതിരിക്കാന്‍ ശ്രദ്ധിക്കുകയും വേണം. രക്ത പരിശോധനയിലൂടെ വൈറ്റമിന്‍ ഡിയുടെ അളവ് ആവശ്യത്തിന് ഉണ്ടോ എന്ന് പരിശോധിക്കുകയാണ് ആദ്യം വേണ്ടത്. ഇതിന്റെ അളവില്‍ വലിയ കുറവ് കാണുന്ന പക്ഷം ഡോക്ടറുടെ ഉപദേശം തേടിയ ശേഷം പ്രതിവിധി തേടുന്നതാവും നല്ലതെന്നും ഡോക്ടര്‍മാര്‍ പറഞ്ഞു. കൊവിഡിന്റെ തീവ്രത കുറയ്ക്കാന്‍ മാത്രമല്ല, കാന്‍സര്‍, ഹദ്രോഗം, ഹൈപ്പര്‍ടെന്‍ഷന്‍, വിഷാദം, പൊണ്ണത്തടി, പ്രമേഹം തുടങ്ങിയവയ്‌ക്കെതിരായ മികച്ച പ്രതിരോധം കൂടിയാണ് വൈറ്റമിന്‍ ഡി.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : uae study reveals correlation between vitamin d levels and severity of covid-19 infection
Malayalam News from malayalam.samayam.com, TIL Network
