ഒരു മനുഷ്യൻ്റെ ജീവിത ബന്ധങ്ങളിൽ സൗഹൃദം പോലെ സ്വാതന്ത്ര്യവും നിഷ്കളങ്കതയും അനുഭവപ്പെടുന്ന മറ്റൊരു ഇടമുണ്ടാവില്ല. അതുകൊണ്ടുതന്നെയാണ് മറ്റേതൊരു ബന്ധങ്ങളിൽ നിന്നും സൗഹൃദം വേറിട്ടു നിൽക്കുന്നതും.
വിജയത്തിന്റെ താക്കോൽ
ഒരൊറ്റ ആത്മാവ് രണ്ട് ശരീരങ്ങളിലായി വസിക്കുന്നുണ്ടെങ്കിൽ അതിൻറെ പേരാണ് സൗഹൃദമെന്ന് അരിസ്റ്റോട്ടിൽ പറഞ്ഞ വാചകമുണ്ട്. എന്തിനും ഏതിനും കൂടെ നിൽക്കാൻ നിഴലുപോലെ ഒരു ചങ്ക് ഉണ്ടല്ലോ എന്ന ധൈര്യമാണ് ചിലരുടെയൊക്കെ ഏറ്റവും വലിയ സമ്പാദ്യം പോലും. അതാണ് ചില സാഹചര്യങ്ങളിൽ തോൽവികളെ പോലും മറികടന്ന് മുന്നോട്ടുപോകാൻ പലർക്കും പ്രചോദനം നൽകുന്നത്. എന്തുകൊണ്ടാണ് സൗഹൃദം ഏതൊരാളെയും ജീവിതത്തിൽ ഏറ്റവും പ്രാധാന്യമർഹിക്കുന്നത് എന്ന് ചോദിച്ചാൽ അതിന് ഒരൊറ്റ ഉത്തരമേയുള്ളൂ. സൗഹൃദത്തിൻറെ ചില്ലയിൽ ആയിരിക്കും ഒരു വ്യക്തിയുടെ ജീവിതത്തിലെ ഏറ്റവും മനോഹരമായ നിമിഷങ്ങളെല്ലാം പൂവിട്ടിരിക്കുന്നത്.
ഏതൊരു ജീവിതം ബന്ധമായാലും അതിൻ്റെ വിജയത്തിന്റെ താക്കോൽ നല്ല സൗഹൃദമാണ് എന്നുപറയാം. ചിലപ്പോൾ കുട്ടിക്കാലത്തുതന്നെ നല്ല സൗഹൃദങ്ങൾ പലതും നമുക്ക് ലഭിച്ചെന്നിരിക്കും. ഇതിൽ പലതും ഒരു ഘട്ടം കഴിയുമ്പോൾ നമ്മളിൽനിന്ന് അകന്നുപോകുകയും നഷ്ടപ്പെടുകയും ഒക്കെ ചെയ്തേക്കാം. പകരം പുതിയ ചിലർ ജീവിതത്തിലേക്ക് കടന്നു വരികയും ചെയ്യും. നല്ല സൗഹൃദങ്ങൾ ഉണ്ടാവുന്നതിന് ഒരു പ്രായവും ഒരിക്കലും ഒരു വിഷയമല്ല. കാരണം എല്ലാകാലത്തും ഒരു മനുഷ്യൻറെ ക്ഷേമവും സന്തോഷവും സങ്കടവുമെല്ലാം പൂർത്തീകരിക്കപ്പെടണമെങ്കിൽ അതു പങ്കിടാൻ നല്ല സൗഹൃദങ്ങൾ ഉണ്ടാവേണ്ടത് ആവശ്യമാണ്. ഒരാളുടെ ജീവിതത്തിൽ സൗഹൃദങ്ങൾ എന്തെല്ലാം കാര്യങ്ങൾ നൽകുന്നുണ്ടെന്ന് അറിയാം.
ഏറ്റവും വലിയ മനുഷ്യബന്ധം
ബാല്യകാലം മുതൽ വാർദ്ധക്യം വരെയുള്ള നമ്മുടെ ജീവിതത്തിലെ ഓരോ ഋതു കാലഘട്ടങ്ങളിലും സുഹൃത്തുക്കൾ നമ്മെ സ്വാധീനിക്കുന്നുണ്ട്. ഏതു പ്രായത്തിലായാലും ഒരുമിച്ച് പുതിയ ഹോബികൾ പരീക്ഷിക്കുന്നതിൽ തുടങ്ങി ഉത്തരവാദിത്തങ്ങൾ ഏറ്റെടുത്ത് പൂർത്തീകരിക്കുന്നതിനും ജീവിതത്തിൽ ഒരു ലക്ഷ്യബോധം ഉണ്ടാക്കുന്നതും വരെയുള്ള കാര്യങ്ങളിൽ ഒരു ഉപദേശകരായി കൂടെ നിൽക്കുക സുഹൃത്തുക്കളായിരിക്കും. നമ്മുടെ ജീവിതത്തിൽ ഉയർച്ചകളും താഴ്ചകളും ഉണ്ടാവുമ്പോൾ അത് വിലപ്പെട്ടതാക്കി മാറ്റാൻ കഴിയുക അത് പങ്കുവെക്കാൻ നല്ല സൗഹൃദങ്ങൾ ഉണ്ടാവുമ്പോണ്.
ഓരോ കാലഘട്ടത്തിലും നിങ്ങളുടെ ജീവിതത്തിലേക്ക് സുഹൃത്തുക്കളായി കടന്നുവരുന്ന ഓരോ വ്യക്തികളും അറിഞ്ഞോ അറിയാതെയോ നിങ്ങൾക്ക് നിരവധി കാര്യങ്ങളെ പഠിപ്പിച്ചു തരുന്നുണ്ട്. സന്തോഷിക്കാനും നന്നായി സംഭാഷണം നടത്താനും, ക്ഷമിക്കാനും, പഠിക്കാനും ഒക്കെ സൗഹൃദങ്ങൾ നിങ്ങൾക്ക് വഴികാട്ടിയാകും. ഒന്നാലോചിച്ചാൽ ഒരാളുടെ ജീവിതത്തിലെ ചെറുതും വലുതുമായ എല്ലാത്തിൻ്റെയും അടിസ്ഥാനം സൗഹൃദം ആയിരിക്കും. വിവാഹബന്ധം മുതൽ തൊഴിൽ പരമായ സഹപ്രവർത്തക ബന്ധങ്ങൾ വരെയുള്ള എല്ലാ ബന്ധങ്ങളുടെയും അടിസ്ഥാനം സൗഹൃദത്തിൽ വേരുറച്ച് നിൽകുന്നു. ചങ്ങാതിമാരിൽ നിന്നും ലഭിക്കുന്ന നിരവധി കാര്യങ്ങൾ സമൂഹത്തിൽ നാം മറ്റുള്ളവരുമായി ഇടപഴകുമ്പോഴും നമ്മെ സ്വാധീനിക്കുന്നുണ്ട്.
സൗഹൃദങ്ങൾ സന്തോഷം നൽകുമ്പോൾ
സൗഹൃദത്തിന്റെ ഏറ്റവും വലിയ ഗുണം അത് നമ്മുടെ മനസ്സിനും ശരീരത്തിനും കൂടുതൽ ശക്തിപകരുന്നു എന്നതാണ്. എപ്പോഴും നിഴലുപോലെ കൂടെ നിൽക്കാൻ ചങ്ങാതിയായ ഒരാളെങ്കിലും ഉണ്ടെങ്കിൽ എന്ത് കാര്യത്തിനും മുന്നിട്ടിറങ്ങാൻ നിങ്ങൾക്ക് ഒട്ടും മടിയുണ്ടാവില്ല. ആ ധൈര്യം നമ്മുടെ ജീവിതത്തിലും ചിന്തകളിലും ഉറപ്പായും തെളിഞ്ഞുകാണുകയും ചെയ്യും. കെട്ടുറപ്പുള്ള സൗഹൃദങ്ങൾ ഉണ്ടായിരിക്കുന്നത് ഒരാളുടെ തലച്ചോറിന്റെ ആരോഗ്യം മെച്ചപ്പെടുത്താൻ സഹായിക്കുമെന്ന് അടുത്തിടെ നടന്ന ഒരു ഗവേഷക പഠനം പോലും നിഗമനം ചെയ്യുന്നുണ്ട്. ഒരാൾ അനുഭവിക്കുന്ന മാനസിക സമ്മർദ്ദത്തിൻ്റെ സാധ്യതകൾ കുറയ്ക്കാനും ഭയമില്ലാതെ തന്നെ മെച്ചപ്പെട്ട ജീവിതശൈലി തിരഞ്ഞെടുപ്പുകൾ നടത്താനും ആരോഗ്യപ്രശ്നങ്ങളിൽ നിന്നും രോഗങ്ങളിൽ നിന്നും വേഗത്തിൽ കരകയറാനുമൊക്കെ നല്ല സുഹൃത്തുക്കളുടെ സാന്നിധ്യം സഹായിക്കുമെന്ന് പറയപ്പെടുന്നു. നിങ്ങൾക്ക് സന്തോഷം നൽകുന്ന ആളുകളുമായി സമയം ചെലവഴിക്കാൻ തിരഞ്ഞെടുക്കുമ്പോൾ നിങ്ങൾ കൂടുതൽ സന്തുഷ്ടരായി മാറും. അതുപോലെതന്നെ സങ്കടങ്ങളെ നേരിടുന്ന സമയങ്ങളിൽ ഇവരുടെ സാന്നിധ്യം നമ്മെ സാന്ത്വനിപ്പിക്കുകയും ചെയ്യും.
ഏകാന്തതയിൽ ആശ്വാസമാകാൻ
ഏകാന്തമായ സമയങ്ങളിൽ കൂട്ടായി ഉള്ളത് സുഹൃത്തുക്കൾ അല്ലാതെ മറ്റാരാണ്? സമൂഹത്തിലും ജീവിതത്തിലും ഒരാൾ അനുഭവിക്കുന്ന ഏകാന്തതയേയും ഒറ്റപ്പെടലുകളേയും കുറയ്ക്കാൻ സൗഹൃദബന്ധങ്ങൾ ഏറ്റവുമധികം പങ്കുവഹിക്കുന്നുണ്ട്. ഒരു മനുഷ്യൻറെ ഏകാന്തതയെ പൂർണ്ണമായും ഇല്ലാതാക്കാൻ കഴിയില്ലെങ്കിലും ചില സമയങ്ങളിൽ സുഹൃത്തുക്കളുടെ സാന്നിധ്യം ഏറ്റവും മികച്ച രീതിയിൽ നമ്മെ സഹായിക്കുന്നുണ്ട്. ഒരു പ്രതിസന്ധിയോ വിഷമഘട്ടമോ കടന്നു വരുമ്പോൾ സുഹൃത്തുക്കൾ കൂടെയില്ലെങ്കിൽ അതിനെ നേരിടുക കൂടുതൽ കഠിനമായിരിക്കും. പല സൗഹൃദങ്ങളും ഒന്നും എല്ലാ കാലവും അടർന്നു വീഴാതെ നിലനിൽക്കുന്നതല്ല. എങ്കിൽപോലും വന്നുപോകുന്ന സൗഹൃദങ്ങളെല്ലാം ഓരോരുത്തരുടേയും ജീവിതത്തിന് എന്തെങ്കിലും പ്രത്യേകതകളെ സമ്മാനിച്ചിട്ടാണ് കടന്നുപോവുക. അല്ലെങ്കിൽ തന്നെയും ഏതൊരു സന്ദർഭങ്ങളിലാവട്ടെ, നിങ്ങളെക്കുറിച്ച് കൂടുതൽ അറിയുകയും നിങ്ങളെ മനസ്സിലാക്കുകയും ചെയ്യുന്ന ഒരു വ്യക്തി ഒപ്പം ഉണ്ടായിരിക്കുന്നത് എത്ര പ്രധാനമാണെന്ന് നിങ്ങൾ തിരിച്ചറിയും. നമുക്ക് നമ്മളായി തന്നെയിരിക്കാൻ കഴിയുന്ന ഏറ്റവും സുരക്ഷിതമായ വൈകാരിക ഇടമാണ് സൗഹൃദ ബന്ധങ്ങൾ. ഏകാന്തതയിൽ നിന്നും ഒറ്റപ്പെടലിൽ നിന്നുമെല്ലാം പുറത്തു കടക്കാനുള്ള താക്കോലാണ് അത്.
Also read: സൗഹൃദങ്ങൾക്ക് പരിധികളില്ല, പരിമിതിയും
ജീവിതത്തിന് കൂടുതൽ അർത്ഥ തലങ്ങൾ
സുഹൃത്ത് ബന്ധങ്ങൾ നമ്മുടെ ചിന്തകളേയും അടിസ്ഥാന മൂല്യവ്യവസ്ഥകളേയും ഏറ്റവുമധികം സ്വാധീനിക്കുന്നുണ്ട്. സുഹൃത്തുക്കളുമായി സമയം ചെലവഴിക്കുമ്പോഴുള്ള പലതരത്തിലുള്ള സംഭാഷണത്തിലൂടെ പുതിയ കാര്യങ്ങൾ നമ്മൾ പഠിക്കുകയും അതിനെ ഏറ്റെടുക്കുകയും ചെയ്യും. ഹൃദയംഗമമായ രീതിയിൽ കരുതലും പിന്തുണയും നൽകാനും അത് ഏറ്റുവാങ്ങാനും ഒക്കെ സാഹചര്യമൊരുങ്ങും. പ്രയാസമേറിയ സമയങ്ങളിലൂടെ, കടന്നുപോവുമ്പോൾ സുഹൃത്തുക്കൾ നമ്മെ സഹായിക്കുകയും പിന്തുണ നൽകുകയും ചെയ്യും. തിരിച്ചു നാമത് പങ്കുവെക്കുകയും ചെയ്യുന്നു. ജീവിതത്തിൽ നാം മറ്റുള്ളവരോട് നന്ദിയുള്ളവരായിരിക്കുകയും മറ്റുള്ളവർ‌ക്കായി നല്ല കാര്യങ്ങൾ ചെയ്യുകയും ചെയ്യുന്നു. അതുകൊണ്ടുതന്നെ നമ്മുടെ ജീവിതത്തിന് കൂടുതൽ അർത്ഥ തലങ്ങൾ പകർന്നുതരാൻ സൗഹൃദങ്ങൾ വഴിയൊരുക്കും. നല്ല സൗഹൃദങ്ങൾ കൂടെയുണ്ടെങ്കിൽ നമ്മൾ വെറുതെ ജീവിക്കുകയല്ല മറിച്ച് നമ്മൾ അഭിവൃദ്ധി പ്രാപിക്കുകയാണ് ചെയ്യുന്നത് എന്ന് തിരിച്ചറിയാം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : this is why friendship is important in our lives
Malayalam News from malayalam.samayam.com, TIL Network
