Sumayya P | Samayam Malayalam | Updated: 02 Aug 2021, 09:11:59 AM
ടെസ്റ്റ് ഫലം നെഗറ്റീവ് ആണെങ്കില്‍ അന്നു തന്നെ ക്വാറന്റൈന്‍ അവസാനിപ്പിക്കുകയും ചെയ്യാം. എന്നാല്‍ ഖത്തറിന് പുറത്ത് നിന്ന് പൂര്‍ണമായി വാക്സിന് എടുത്തവര്‍ക്കും വാക്സിന് എടുക്കാത്തവര്‍ക്കും കൊവിഡ് മുക്തി നേടിയവര്‍ക്കും 10 ദിവസമാണ് ഹോട്ടല്‍ ക്വാറന്റൈന്‍
നടപടി വിവേചനപരമെന്ന് ആക്ഷേപം
ഇന്ത്യ ഉള്‍പ്പെടെയുള്ള രാജ്യങ്ങളില്‍ നിന്ന് വരുന്നവര്‍ ഖത്തറില്‍ നിന്ന് പൂര്‍ണമായി വാക്സിന് സ്വീകരിച്ചവരോ ഇവിടെ വച്ച് കൊവിഡ് രോഗമുക്തി നേടിയവരോ ആണെങ്കില്‍ രണ്ട് ദിവസത്തേക്കാണ് ഹോട്ടല്‍ ക്വാറന്റൈന്‍ നിര്‍ബന്ധമാക്കിയിരിക്കുന്നത്. ക്വാറന്റൈനില്‍ കഴിയുന്ന രണ്ടാം ദിവസം പിസിആര്‍ പരിശോധന നടത്തണം. ടെസ്റ്റ് ഫലം നെഗറ്റീവ് ആണെങ്കില്‍ അന്നു തന്നെ ക്വാറന്റൈന്‍ അവസാനിപ്പിക്കുകയും ചെയ്യാം. എന്നാല്‍ ഖത്തറിന് പുറത്ത് നിന്ന് പൂര്‍ണമായി വാക്സിന് എടുത്തവര്‍ക്കും വാക്സിന് എടുക്കാത്തവര്‍ക്കും കൊവിഡ് മുക്തി നേടിയവര്‍ക്കും 10 ദിവസമാണ് ഹോട്ടല്‍ ക്വാറന്റൈന്‍. ഈ തീരുമാനത്തിനെതിരേയാണ് പ്രവാസി സമൂഹത്തില്‍ നിന്ന് പ്രതിഷേധം ഉയരുന്നത്. ഒരേ വാക്സിന് സ്വീകരിച്ചവര്‍ വിവിധ രാജ്യങ്ങളില്‍ നിന്ന് വരുമ്പോള്‍ അവര്‍ക്കിടയില്‍ ക്വാറന്റൈന്‍ കാര്യത്തില്‍ വിവേചനം കാണക്കുന്നത് ശരിയല്ലെന്ന് ഇവര്‍ ചൂണ്ടിക്കാട്ടുന്നു.
പ്രവാസികളെ പിഴിയാനുള്ള വഴിയോ?
വാക്സിന് എടുക്കാത്തവര്‍ക്കവര്‍ക്കെന്ന പോലെ വാക്സിന് എടുത്തവര്‍ക്കും 10 ദിവസത്തെ ഹോട്ടല്‍ ക്വാറന്റൈന്‍ ഏര്‍പ്പെടുത്തിയ നടപടി പ്രവാസികളില്‍ നിന്ന് പണം ഈടാക്കാനുള്ള പരിപാടിയാണോ എന്ന സംശയവും ചിലര്‍ സാമൂഹ്യ മാധ്യമങ്ങളില്‍ ഉന്നയിച്ചു. രണ്ടു ദിവസത്തെ ഹോട്ടല്‍ ക്വാറന്റൈനു പോലും വലിയ തുകയാണ് ഖത്തര്‍ ഈടാക്കുന്നതെന്നാണ് ഒരു ട്വിറ്റര്‍ ഉപയോക്താവിന്റെ ആക്ഷേപം. രണ്ട് ദിവസത്തേക്കുള്ള ഹോട്ടല്‍ ചെലവ് 900 റിയാലില്‍ നിന്നാണ് തുടങ്ങുന്നത്. ഇത് പ്രവാസികളുടെ ജീവിതം ദുസ്സഹമാക്കുമെന്നും ട്വിറ്റര്‍ സന്ദേശത്തില്‍ പറയുന്നു. അതേസമയം 10 ദിവസത്തെ ക്വാറന്റീന് 4500 റിയാലിന് മുകളിലാണ് തുക ഈടാക്കുന്നത്. സാധാരണക്കാരായ പ്രവാസികളെ സംബന്ധിച്ചിടത്തോളം താങ്ങാന്‍ കഴിയാത്തതാണ് ഇതെന്നും വിമര്‍ശകര്‍ പറയുന്നു.
എവിടെ നിന്നെടുത്താലും വാക്‌സിന്റെ ഫലം മാറുമോ?
ഒരേ വാക്സിന് തന്നെ ഖത്തറില്‍ നിന്നെടുത്താല്‍ രണ്ട് ദിവസവും പുറത്ത് നിന്നെടുത്താല്‍ 10 ദിവസവും ക്വാറന്റീന് ഏര്‍പ്പെടുത്തുന്നതിന്റെ യുക്തി എന്താണെന്നാണ് പലരുടെയും ചോദ്യം. ലോകാരോഗ്യ സംഘടന അംഗീകരിച്ച വാക്സിനുകളോട് രാജ്യത്തിന് അനുസരിച്ച് നയം സ്വീകരിക്കുന്നത് എങ്ങിനെയെന്ന് ലോകാരോഗ്യ സംഘടനയെ ടാഗ് ചെയ്ത് പാകിസ്താന്‍ പ്രവാസിയായ ഉമൈര്‍ മെഹ്ഫൂസ് ട്വിറ്ററിലൂടെ ചോദിക്കുന്നു. ഒരേ വാക്സിന് ഖത്തറില്‍ നിന്നെടുത്താലും പുറത്തുനിന്ന് എടുത്താലും അതിന്റെ ഫലത്തില്‍ എങ്ങനെയാണ് വ്യത്യാസമുണ്ടാവുക എന്നാണ് അദ്ദേഹം ചോദിക്കുന്നത്.
കൊവിഡ് വകഭേദങ്ങളുടെ വ്യാപനം
അതേസമയം, ഇന്ത്യ ഉള്‍പ്പെടെയുള്ള ആറ് ഏഷ്യന്‍ രാജ്യങ്ങളില്‍ കൊവിഡിന്റെ ഡെല്‍റ്റ വകഭേദം പടര്‍ന്നുപിടിച്ചതാണ് ഈ രാജ്യങ്ങളില്‍ നിന്നു വരുന്നവര്‍ക്ക് ഹോട്ടല്‍ ക്വാറന്റൈന്‍ വ്യവസ്ഥ ചെയ്തത്. ആദ്യമായി ഇന്ത്യയില്‍ കണ്ടെത്തിയ ഡെല്‍റ്റ വകഭേദം ഇപ്പോള്‍ 90ലേറെ രാജ്യങ്ങളില്‍ വ്യാപിച്ചിട്ടുണ്ട്. നിലവില്‍ ദിവസേന ശരാശരി 40,000ലേറെ കൊവിഡ് കേസുകളാണ് ഇന്ത്യയില്‍ റിപോര്‍ട്ട് ചെയ്യുന്നത്. ജൂലൈ 28ന് ബംഗ്ലാദേശില്‍ 16,000 കേസുകളാണ് റിപോര്‍ട്ട് ചെയ്തത്. നേപ്പാള്‍, ശ്രീലങ്ക, പാകിസ്താന്‍, ഫിലിപ്പീന്‍സ് ഉള്‍പ്പെടെയുള്ള മറ്റ് രാജ്യങ്ങളിലും ദിവസവും ആയിരിക്കണക്കിന് പുതിയ കേസുകള്‍ കണ്ടെത്തുന്നുണ്ട്.
അതേസമയം, യുഎഇ, സൗദി അറേബ്യ, കുവൈത്ത് ഉള്‍പ്പെടെയുള്ള ഗള്‍ഫ് രാജ്യങ്ങളുമായി താരതമ്യം ചെയ്യുമ്പോള്‍ ഖത്തറിന്റെ നിലപാട് ഭേദമാണെന്നും സോഷ്യല്‍ മീഡിയയില്‍ ചിലര്‍ അഭിപ്രായപ്പെടുകയുണ്ടായി. ഇവയില്‍ പല രാജ്യങ്ങളും ഇന്ത്യയില്‍ നിന്നുള്ളവര്‍ക്കോ രണ്ടാഴ്ചയ്ക്കകം ഇന്ത്യ സന്ദര്‍ശിച്ചവര്‍ക്കോ പ്രവേശനം തന്നെ അനുവദിക്കുന്നില്ലെന്ന കാര്യവും അവര്‍ ചൂണ്ടിക്കാട്ടുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : qatar health ministry says hotel quarantine is mandatory for some asian nationals who have been vaccinated
Malayalam News from malayalam.samayam.com, TIL Network
