കാത്തിരിപ്പ് നീളും; ഇന്ത്യ- യുഎഇ വിമാന സര്‍വീസ് ഉടന്‍ പുനരാരംഭിക്കില്ല

അബുദാബി: ഇന്ത്യ ഉള്‍പ്പെടെയുള്ള ഏഷ്യന്‍ രാജ്യങ്ങളില്‍ നിന്ന് യുഎഇയിലേക്കുള്ള വിമാന വിലക്ക് പെട്ടെന്ന് പുനരാരംഭിക്കില്ലെന്ന് സൂചന. ഇതുമായി ബന്ധപ്പെട്ട സര്‍ക്കുലര്‍ വിമാന കമ്പനികള്‍ക്ക് ലഭിച്ചതായാണ് വിവരം. യാത്രാ വിലക്ക് ആഗസ്ത് ഏഴിന് ശേഷവും തുടരുമെന്നാണ് പുതിയ റിപ്പോര്‍ട്ട്. ഇന്ത്യയ്ക്കു പുറമെ, പാകിസ്താന്‍, ശ്രീലങ്ക, ബംഗ്ലാദേശ് എന്നീ രാജ്യങ്ങളില്‍ നിന്നുള്ള വിമാന വിലക്കാണ് യുഎഇ അനിശ്ചിതമായി നീട്ടുന്നത്.



ഇന്ത്യ ഉള്‍പ്പെടെയുള്ള രാജ്യങ്ങളില്‍ നിന്ന് ആഗസ്ത് ഏഴു വരെ സര്‍വീസ് ഉണ്ടാവില്ലെന്ന് ഇത്തിഹാദ് എയര്‍വെയ്‌സും എമിറേറ്റ്സ് എയര്‍ലൈന്‍സും നേരത്തേ അറിയിച്ചിരുന്നു. സര്‍ക്കാര്‍ നിലപാട് അനുസരിച്ച് ഇത് നീണ്ടേക്കാമെന്നും അറിയിപ്പില്‍ വ്യക്തമാക്കി. ഇതുമായി ബന്ധപ്പെട്ട് യാത്രക്കാര്‍ ഉന്നയിച്ച അന്വേഷണങ്ങള്‍ക്കു നല്‍കിയ മറുപടിയിലാണ് വിമാനക്കമ്പനികള്‍ ഇക്കാര്യം അറിയിച്ചത്. എന്നാല്‍

ചുരുങ്ങിയത് ആഗസ്ത് 31 വരെയെങ്കിലും വിലക്ക് നീളുമെന്നാണ് ട്രാവലിംഗ് രംഗത്ത് പ്രവര്‍ത്തിക്കുന്നവര്‍ ചൂണ്ടിക്കാട്ടുന്നത്. ഈ മാസത്തേക്ക് ഷെഡ്യൂള്‍ ചെയ്ത ചില വിമാനങ്ങളും യാത്ര റദ്ദാക്കിയ സാഹചര്യത്തിലാണ് ഈ നിഗമനം.

Also Read: റോഡിൽ മണൽകൂന, യാത്രക്കാര്‍ ജാഗ്രത പാലിക്കണം; മുന്നറിയിപ്പുമായി ഒമാന്‍ റോയല്‍ പോലീസ്

കൊവിഡ് വ്യാപനത്തിന്റെ പശ്ചാത്തലത്തില്‍ ഇന്ത്യ ഉള്‍പ്പെടെ യാത്രാവിലക്ക് നിലനില്‍ക്കുന്ന രാജ്യങ്ങളില്‍ നിന്ന് ഇനിയൊരു അറിയിപ്പുണ്ടാകുന്നതുവരെ വിമാന സര്‍വീസ് ഉണ്ടാകില്ലെന്ന് യുഎഇ ജനറല്‍ സിവില്‍ ഏവിയേഷന്‍ അതോറിറ്റിയും അറിയിച്ചിട്ടുണ്ട്. അതത് രാജ്യങ്ങളിലെ കൊവിഡ് സ്ഥിതിഗതികള്‍ യുഎഇ സസൂക്ഷ്മം നിരീക്ഷിച്ചു വരികയാണ്. ഇതുമായി ബന്ധപ്പെട്ട എല്ലാ കാര്യങ്ങളും പരിശോധിച്ചു മാത്രമേ യാത്രാവിലക്ക് നീക്കുന്ന കാര്യത്തില്‍ തീരുമാനം കൈക്കൊള്ളുകയുള്ളൂ എന്നും സിവില്‍ ഏവിയേഷന്‍ അതോറിറ്റി വ്യക്തമാക്കിയിരുന്നു.

ഏപ്രില്‍ 24നാണ് ഇന്ത്യയില്‍ നിന്നുള്ള വിമാനങ്ങള്‍ക്ക് ജനറല്‍ സിവില്‍ ഏവിയേഷന്‍ അതോറിറ്റി വിലക്കേര്‍പ്പെടുത്തിയത്. അതിന് ശേഷം പല തവണയായി ഇത് ദീര്‍ഘിപ്പിക്കുകയായിരുന്നു. കൊവിഡിന്റെ ഡെല്‍റ്റ വകഭേദം വ്യാപകമായ പശ്ചാത്തലത്തിലായിരുന്നു യുഎഇ ഇന്ത്യയില്‍ നിന്നുള്ള സര്‍വീസ് നിര്‍ത്തിയത്.