ഇനി ഞായറാഴ്ച മാത്രം ലോക്ക് ഡൗൺ; ഇളവുമായി കേരളം

കൊച്ചി: സംസ്ഥാനത്ത് ലോക്ക് ഡൗൺ ഇളവ് പ്രഖ്യാപിച്ചു. ഞായറാഴ്ച മാത്രമാണ് ഇനി വാരാന്ത്യ ലോക്ക് ഡൗൺ ഉണ്ടായിരിക്കുക. ശനിയാഴ്ച ഉണ്ടായിരുന്ന നിയന്ത്രണം നീക്കി. ഏഷ്യാനെറ്റ് ന്യൂസ് റിപ്പോർട്ട് ചെയ്തു.



ടെസ്റ്റ് പോസിറ്റിവിറ്റി നിരക്ക് അനുസരിച്ചുള്ള നിയന്ത്രണം മാത്രമായിരിക്കും ഇനി ഉണ്ടാകുക. കടകളുടെ പ്രവ‍ര്‍ത്തി സമയം ദീ‍ര്‍ഘിപ്പിക്കാനും മുഖ്യമന്ത്രിയുടെ അധ്യക്ഷതയിൽ ചേര്‍ന്ന യോഗത്തിൽ തീരുമാനമായി. ഇളവുകൾ ബുധനാഴ്ച മുഖ്യമന്ത്രി നിയമസഭയെ അറിയിക്കും.

ഞായ‍ര്‍ ഒഴികെയുള്ള എല്ലാ ദിവസവും കടകൾ തുറക്കാൻ അനുവദിക്കും. ഒരാഴ്ചയിലെ രോഗികളുടെ കണക്ക് നോക്കിയ ശേഷം മേഖലകൾ തിരിച്ചാകും നിയന്ത്രണം. നൂറിൽ എത്രപേ‍ര്‍ക്ക് രോഗം എന്നത് അടിസ്ഥാനമാക്കിയായിരിക്കും നിയന്ത്രണം ഏ‍ര്‍പ്പെടുത്തുക. കൂടുതൽ രോഗികളുള്ള മേഖലയിൽ കടുത്ത നിയന്ത്രണവും കുറവ് രോഗികളുള്ള ഇടങ്ങളിൽ ഇളവും അനുവദിക്കും.

അതേസമയം ഇന്ന് 23,676 പേ‍ര്‍ക്കാണ് സംസ്ഥാനത്ത് കൊവിഡ് സ്ഥിരീകരിച്ചത്. കഴിഞ്ഞ 24 മണിക്കൂറിനിടെ 148 പേ‍ര്‍ക്ക് കൊവിഡ് മൂലം ജീവൻ നഷ്ടമായി. 11.87 ആണ് ടെസ്റ്റ് പോസിറ്റിവിറ്റി നിരക്ക്. 1,99,456 സാമ്പിളുകളാണ് പരിശോധിച്ചത്. സംസ്ഥാനത്തെ വിവിധ ജില്ലകളിലായി 4,66,154 പേരാണ് നിരീക്ഷണത്തിൽ കഴിയുന്നത്.