ലിംഗമാറ്റ ശസ്ത്രക്രിയ; ചൂഷണം അവസാനിപ്പിക്കുമെന്ന് ആരോഗ്യ മന്ത്രി

കൊച്ചി: ലിംഗമാറ്റ ശസ്ത്രക്രിയയുടെ പേരിലുള്ള ചൂഷണം അവസാനിപ്പിക്കുമെന്ന് മന്ത്രി വീണാ ജോർജ്. ഇതിനായി ഗൈഡ് ലൈൻ കൊണ്ടുവരുമെന്നും ട്രാൻസ് സൗഹൃദ കേന്ദ്രങ്ങളായി ആശുപത്രികളെ മാറ്റുമെന്നും മന്ത്രി നിയമസഭയിൽ വ്യക്തമാക്കി.



ലിംഗമാറ്റ ശസ്ത്രക്രിയയുമായി ബന്ധപ്പെട്ട് മാർഗരേഖ കൊണ്ടുവരും. സ്വകാര്യ മേഖലയിൽ ചൂഷണം ഉണ്ടെങ്കിൽ അത് അവസാനിപ്പിക്കുന്നതിനായി മാർഗരേഖ ഉണ്ടാക്കുന്നതിനായി കമ്മിറ്റി രൂപീകരിക്കും. ആശുപത്രികളിൽ ചെല്ലുമ്പോൾ സ്ത്രീ, പുരുഷൻ എന്നീ വിഭാഗങ്ങൾ മാത്രമാണുള്ളത്. ട്രാൻസ്ജെൻഡറുകളെക്കൂടി ഇതിൽ ഉൾപ്പെടുത്തും. ആശുപത്രികളെ ട്രാൻസ് സൗഹൃദ ആശുപത്രികളാക്കി മാറ്റുമെന്നും വീണാ ജോർജ്ജ് പറഞ്ഞു.

സ്വകാര്യ ഭാഗങ്ങളിൽ ഉണങ്ങാത്ത മുറിവ്; അനന്യയുടെ ആരോപണം ശരിവെച്ച് പോസ്റ്റ്മോർട്ടം റിപ്പോർട്ട്

അടുത്തയിടെ ലിംഗമാറ്റ ശസ്ത്രക്രിയയുമായി ബന്ധപ്പെട്ട് പരാതി ഉന്നയിച്ച ട്രാൻസ് ആക്ടിവിസ്റ്റ് അനന്യ കുമാരി അലക്സ് ആത്മഹത്യ ചെയ്തിരുന്നു. ഒരു വർഷം മുമ്പു നടത്തിയ ലിംഗമാറ്റ ശസ്ത്രക്രിയയുടെ മുറിവുകൾ ഉണങ്ങാതെ ശരീരത്തിൽ ഉണ്ടെന്നായിരുന്നു അനന്യയുടെ ആരോപണം.

അനന്യയുടെ ആരോപണം സ്ഥിരീകരിക്കുന്നതാണ് പോസ്റ്റ്മോർട്ടം റിപ്പോർട്ട്. അനന്യയുടെ മരണത്തിനു പിന്നാലെ ലിംഗമാറ്റ ശസ്ത്രക്രിയയുമായി ബന്ധപ്പെട്ട് സംസ്ഥാന സ‍ര്‍ക്കാര്‍ മാഗനിര്‍ദ്ദേശം പുറപ്പെടുവിക്കണമെന്ന ആവശ്യം ഉയര്‍ന്നിരുന്നു. പിന്നാലെയാണ് ആരോഗ്യ വകുപ്പിന്റെ ഇടപെടൽ.