അയോധ്യ രാമക്ഷേത്രം; 2023 ഡിസംബർ‍ മുതൽ ഭക്തര്‍ക്കായി തുറന്നുകൊടുക്കും

ലഖ്നൗ: നിര്‍മാണത്തിലുള്ള അയോധ്യയിലെ രാമക്ഷേത്രം 2023 ഡിസംബറിൽ ഭക്തർകക്കായി തുറന്നു കൊടുക്കും. അതേസമയം, ക്ഷേത്രത്തിന്റെ നിര്‍മ്മാണം 2025ലാണ് പൂര്‍ത്തിയാകുക എന്ന് ശ്രീരാമ ജന്മഭൂമി തീര്‍ത്ഥ ക്ഷേത്ര അധികൃതര്‍ അറിയിച്ചു. ദേശീയ മാധ്യമമായ ഇന്ത്യാ ടുഡേയാണ് റിപ്പോര്‍ട്ട് ചെയ്തത്.



Also Read : നിരവധി സ്ത്രീകളുമായി ശാരീരിക ബന്ധം, ലഹരിക്ക് അടിമ; റാപ്പർ ഹണി സിങ്ങിനെതിരെ ഗാര്‍ഹിക പീഡന പരാതിയുമായി ഭാര്യ

കഴിഞ്ഞ വര്‍ഷം ഓഗസ്റ്റ് അഞ്ചിനാണ് പ്രധാനമന്ത്രി നരേന്ദ്രമോദി ക്ഷേത്ര നിര്‍മ്മാണത്തിന് തറക്കല്ലിട്ടത്. യുദ്ധകാലാടിസ്ഥാനത്തിലാണ് ക്ഷേത്രത്തിന്റെ നിര്‍മ്മാണ പ്രവര്‍ത്തനങ്ങള്‍ നടക്കുന്നത്. ക്ഷേത്രത്തോടനുബന്ധിച്ച് ഒരു മ്യൂസിയം, ഡിജിറ്റല്‍ ആര്‍ക്കൈവ്‌സ്, റിസര്‍ച്ച് സെന്റര്‍ എന്നിവയും നിര്‍മ്മിക്കുമെന്ന് അധികൃതര്‍ അറിയിച്ചു.

ക്ഷേത്രത്തിന്റെ അടിസ്ഥാന ഘടന പൂർത്തിയായിക്കഴിഞ്ഞാൽ ഭക്തർക്ക് പ്രാർത്ഥനയ്ക്കുള്ള സൗകര്യം ഒരുക്കി നൽകുമെന്ന് ഇന്ത്യാ ടുഡേ റിപ്പോര്‍ട്ട് ചെയ്യുന്നു. കർസേവകപുരത്തെ കല്ലുകളുടെ 70 ശതമാനമെങ്കിലും ക്ഷേത്രനിർമ്മാണത്തിനായി ഉപയോഗിക്കുമെന്നും നിർമ്മാണത്തിൽ ഉരുക്കോ ഇഷ്ടികയോ ഉപയോഗിക്കില്ലെന്നും വൃത്തങ്ങൾ പറഞ്ഞു.

ക്ഷേത്രത്തിന്റെ കാലാകാലങ്ങളില്‍ നിലനിൽക്കുന്നതിന് വേണ്ടി നിരവധി പഠനങ്ങളും ആധുനികവും പരമ്പരാഗതവുമായ സാങ്കേതികവിദ്യകളുടെ ഉപയോഗവും നടത്തുമെന്നും മാധ്യമത്തോട് അധികൃതര്‍ വ്യക്തമാക്കി.

ക്ഷേത്രത്തിന്റെ ഗര്‍ഭഗൃഹ (ശ്രീകോവില്‍) നിര്‍മ്മാണം പൂര്‍ത്തിയാക്കി രാം ലല്ല, സീത, ലക്ഷ്മണന്‍ എന്നിവരുടെ വിഗ്രഹംമാറ്റി സ്ഥാപിക്കും. ഇപ്പോള്‍ താല്‍ക്കാലിക ശ്രീകോവിലിലാണ് വിഗ്രഹങ്ങള്‍ സൂക്ഷിച്ചിരിക്കുന്നത്.

Also Read : കർണാടക മന്ത്രിസഭ പുന:സംഘടന; യെദ്യൂരപ്പയുടെ മകൻ മന്ത്രിസഭയിൽ നിന്നും പുറത്തേക്ക്



രണ്ടര ഏക്കര്‍ പ്രദേശത്തായാണ് ക്ഷേത്രത്തിന്റെ നിര്‍മ്മാണം നടക്കുന്നത്. തങ്ങള്‍ മൂന്ന് വര്‍ഷത്തിനുള്ളിൽ പണി പൂര്‍ത്തിയാക്കുവാന്‍ സാധിക്കുമെന്നാണ് വിലയിരുത്തുന്നത് എന്ന് ട്രസ്റ്റ് ജനറൽ സെക്രട്ടറി ചമ്പത് റായിയെ ഉദ്ധരിച്ച് റിപ്പോർട്ട് ചെയ്യുന്നു.

ആയിരം കോടി രൂപ ചെലവിലാണ് ക്ഷേത്രം നിര്‍മ്മിക്കുന്നത്. അതേസമയം, ഇതിനോടകം ശ്രീരാമ ജന്മഭൂമി തീർത്ഥക്ഷേത്രത്തിന് ഇതിനോടകം 3,000 കോടിയിലധികം സംഭാവനകൾ ലഭിച്ചിട്ടുണ്ട്.