മോശമായി പെരുമാറിയതിനു സ്കൂളിൽ നിന്ന് പുറത്താക്കി; പ്ലസു ടുക്കാരൻ അധ്യാപകനെ വെടിവെച്ചിട്ടു

ജയ്പൂര്‍: സ്കൂളിൽ നിന്ന് പുറത്താക്കിയതിൻ്റെ വൈരാഗ്യത്തിന് അധ്യാപകനെ വെടിവെച്ചിട്ട വിദ്യാര്‍ഥി പിടിയിൽ. ജയ്പൂരിനു സമീപം കോട്പുട്ലിയിലാണ് സംഭവം നടന്നത്. വെടിയേറ്റു ഗുരുതരമായി പരിക്കേറ്റ 45കാരനായ അധ്യാപകൻ ചികിത്സയിലാണ്.



പത്ത്, പന്ത്രണ്ട് ക്ലാസുകാ‍രെ ചരിത്രം പഠിപ്പിച്ചിരുന്ന നാടാര്‍ യാദവ് എന്ന അധ്യാപകനാണ് വെടിയേറ്റത്. ഗുരുതരമായി പരക്കേറ്റ ഇദ്ദേഹത്തെ വിദഗ്ധ ചികിത്സയ്ക്കായി എസ്എംഎസ് ആശുപത്രിയിലേയ്ക്ക് മാറ്റി. പ്രായപൂര്‍ത്തിയാകാത്ത യുവാവാണ് കേസിലെ പ്രതിയെന്നാണ് പോലീസ് പറയുന്നത്. നിയമപ്രകാരം ഇയാളുടെ പേരുവിവരങ്ങള്‍ പോലീസ് പുറത്തു വിട്ടിട്ടില്ല. അധ്യാപകരോട് മോശമായി പെരുമാറിയതിനാണ് ഈ കുട്ടിയെ സ്കൂളിൽ നിന്ന് പുറത്താക്കിയതെന്നാണ് പോലീസ് പറയുന്നതെന്നാണ് ടൈംസ് ഓഫ് ഇന്ത്യ റിപ്പോര്‍ട്ട്.

Also Read: ചന്ദ്രിക പണമിടപാട് കേസ്; ഹൈദരാലി ശിഹാബ് തങ്ങള്‍ ഇഡിക്ക് മുന്നിൽ ഹാജരാകില്ല

നരേദയ്ക്ക് സമീപം മെയിൻ റോഡു വഴി സഞ്ചരിക്കുമ്പോള്‍ ബൈക്കിലെത്തിയ യുവാക്കള്‍ അധ്യാപകനു നേര്‍ക്ക് വെടിയുതിര്‍ക്കുകയായിരുന്നുവെന്നാണ് എഎസ്ഐ ഹജരി ലാൽ പറയുന്നത്. അധ്യാപകൻ്റെ കാലിലാണ് വെടിയേറ്റത്. സംഭവവുമായി ബന്ധപ്പെട്ട് രണ്ട് പേരെ പോലീസ് അറസ്റ്റ് ചെയ്തിട്ടുണ്ട്. കേസിലെ രണ്ടാം പ്രതിയ്ക്കും പ്രായപൂര്‍ത്തിയായിട്ടില്ലെന്നാണ് പോലീസിൽ പറയുന്നത്.

Also Read: ‘മൂന്നാം തരംഗം’: കേരളത്തിൽ രോഗികളുടെ എണ്ണം കൂടും; മുന്നറിയിപ്പുമായി ആരോഗ്യമന്ത്രി

സ്കൂളിൽ നിന്ന് പുറത്താക്കിയതോടെ കുട്ടി മറ്റു ചില ജോലികളിലേയ്ക്ക് തിരിഞ്ഞിരുന്നു. സഹപാഠികളെല്ലാം പന്ത്രണ്ടാം ക്ലാസ് പാസായെങ്കിലും തനിക്ക് പരീക്ഷയെഴുതാൻ സാധിക്കാതെ വന്നതോടെ കുട്ടി അധ്യാപകനോട് ദേഷ്യത്തിലായിരുന്നുവെന്ന് ഡിഎസ്പി ദിനേഷ് കുമാര്‍ ടൈംസ് ഓഫ് ഇന്ത്യയോടു പറഞ്ഞു. ഈ അധ്യാപകനാണ് ടിസി നല്‍കിയത് എന്നതായിരുന്നു വൈരാഗ്യത്തിനു കാരണമെന്നും പോലീസ് പറഞ്ഞു.