കൈകൾ എപ്പോഴും മൃദുവായിരിക്കാൻ…

മുഖം കഴിഞ്ഞാൽ കൈകളാണ് ഏറ്റവും കൂടുതൽ ശ്രദ്ധിക്കപ്പെടുക. സംസാരിക്കുമ്പോൾ കൈകൾ കൊണ്ട് ആംഗ്യം കാണിക്കുന്നവരുടെ കാര്യത്തിൽ പ്രത്യേകിച്ച്. അതുകൊണ്ട് തന്നെ മുഖചർമത്തിന്റെ മനോഹാരിത നിലനിർത്താൻ എത്രത്തോളം ശ്രദ്ധ കൊടുക്കുന്നുവോ അത്രയും തന്നെ കൈകളുടെ ഭംഗി നഷ്ടപ്പെടാതിരിക്കാനും ശ്രദ്ധിക്കണം. എങ്ങനെയാണ് കൈകളെ പരിപാലിക്കേണ്ടത്? അതിനായി ചെലവ് കൂടിയ രീതികൾ ചെയ്യേണ്ടതുണ്ടോ? ഇല്ലേയില്ല. അടുക്കളയിൽ കയ്യെത്തും ദൂരത്തിരിക്കുന്ന ചില സാധാരണ ചേരുവകൾ മാത്രമേ ഈ സൗന്ദര്യക്കൂട്ടിന് ആവശ്യമായുള്ളൂ.



മൃദുവാക്കാനും അഴുക്ക് നീക്കാനും:



കൈകളിൽ വീര്യം കൂടിയ സോപ്പ്, ഹാൻഡ് വാഷ്, ഡിഷ് വാഷർ, സാനിറ്റൈസർ തുടങ്ങിയവ നാം പതിവായി ഉപയോഗിക്കാറുണ്ട്. ഇത്തരം ഉൽപ്പന്നങ്ങളുടെ പതിവായ ഉപയോഗം മൂലം കൈകളുടെ സ്വാഭാവികമായ മൃദുലത നഷ്ടമാകുകയും വരണ്ട അവസ്ഥയിലേക്ക് മാറുകയും ചെയ്യും. നല്ല രീതിയിൽ വൃത്തിയാക്കിയില്ലെങ്കിൽ നമ്മൾ തൊടുന്ന എല്ലാ വസ്തുക്കളിലുമുള്ള അഴുക്കിന്റെ അംശം കൈകളിൽ തുടരുകയും ചെയ്യും. വരണ്ട അവസ്ഥ മാറ്റിയെടുക്കാനും കൈകളിലെ ചർമ സുഷിരങ്ങളിൽ അഴുക്ക് അടിഞ്ഞിട്ടുണ്ടെങ്കിൽ അവ നീക്കം ചെയ്യാനുമായി പഞ്ചസാരയും വെളിച്ചെണ്ണയും ഉപയോഗിക്കുന്നത് നല്ലതാണ്.

വരണ്ട ചർമ്മത്തെ പരിപാലിക്കാൻ അവോക്കാഡോ ചേർത്തൊരു ഫെയ്‌സ് മാസ്ക്

കൈകളുടെ ഭംഗി വീണ്ടെടുക്കാൻ



നഷ്ടപ്പെട്ട മൃദുത്വവും ഭംഗിയുമെല്ലാം വീണ്ടെടുക്കണ്ടേ? അതിനായി അല്പം പഞ്ചസാര പൊടിച്ചത് ഒരു സ്പൂൺ എടുത്ത ശേഷം ഇതിലേയ്ക്ക് ആവശ്യത്തിന് വെളിച്ചെണ്ണ ചേർക്കാം. ഇത് നന്നായി യോജിപ്പിച്ച്കൈകളിൽ മസാജ് ചെയ്യാം. 10 മിനിറ്റ് നേരമെങ്കിലും വൃത്താകൃതിയിൽ മസാജ് ചെയ്ത് നൽകണം. ശേഷം 15 മിനിറ്റ് കഴിഞ്ഞു കഴുകി വൃത്തിയാക്കാം.

കൈകൾക്കുള്ള പാക്ക്:



പഞ്ചസാര, വെളിച്ചെണ്ണ മിശ്രിതം ഉപയോഗിച്ച് കൈകൾ വൃത്തിയാക്കിയ ശേഷം നല്ലൊരു പായ്ക്ക് കൈകളിൽ അപ്ലൈ ചെയ്യണം.

ഇതിനായി ആവശ്യത്തിന് കടലമാവ് എടുക്കണം. കടലമാവ് ചർമ്മത്തിലെ കരുവാളിപ്പ് നീക്കം ചെയ്യാനും കൈകൾ മൃദുവാക്കാനും സഹായിക്കും. ഇതിലേയ്ക്ക് തക്കാളിയുടെ പൾപ്പ് ചേർക്കണം. തക്കാളിയുടെ പൾപ്പിന് ആന്റി ഏജിങ് ഗുണങ്ങൾ ഉള്ളതാണ്, കൂടാതെ ഇത് കൊളാജൻ ഉത്പാദനം മെച്ചപ്പെടുത്തുകയും ചെയ്യും. ശേഷം ഇതിലേക്ക് കുറച്ചു പാൽ കൂടി ചേർത്തു കൊടുക്കാം. ഇത് ചർമ സുഷിരങ്ങൾ നല്ല രീതിയിൽ വൃത്തിയാക്കാനും ഈർപ്പം നിലനിർത്താനും സഹായിക്കും. ഇവയെല്ലാം നന്നായി യോജിപ്പിച്ച ശേഷം കൈകളിൽ പുരട്ടി മസാജ് ചെയ്യാം. ശേഷം 15 മിനിറ്റ് വെയ്റ്റ് ചെയ്യാം. അതിനു ശേഷം തണുത്ത വെള്ളത്തിൽ നന്നായി കഴുകി കളയാം.

ആഴ്ചയിൽ 3 ദിവസമെങ്കിലും ഈ രീതിയിൽ കൈകളെ പരിപാലിക്കുന്നത് നിങ്ങളുടെ കൈകളും വിരലുകളും കൂടുതൽ ആകർഷകമാക്കും.