സിപിഎം പാർട്ടി കോൺഗ്രസ് കണ്ണൂരിലോ? അന്തിമ തീരുമാനം ഉടൻ

കൊച്ചി: 23ാമത് സിപിഎം പാർട്ടി കോൺഗ്രസ് കണ്ണൂരിൽ നടത്താൻ ആലോചന. കണ്ണൂരിൽ പാർട്ടി കോൺഗ്രസ് നടത്താമെന്ന കേരള ഘടകത്തിന്‍റെ ശുപാർശയിൽ കേന്ദ്ര കമ്മിറ്റിയാണ് തീരുമാനം എടുക്കുക. കേന്ദ്ര കമ്മിറ്റി തീരുമാനം ശനിയാഴ്ചയോടെ ഉണ്ടായേക്കുമെന്നാണ് റിപ്പോർട്ട്.



സംസ്ഥാനത്ത് ഇടതു സർക്കാർ അധികാര തുടർച്ച നേടിയ സാഹചര്യത്തിൽ കൂടിയാണ് കേരളത്തിൽ സമ്മേളനം നടത്താനുള്ള ആലോചന. 2012ലാണ് അവസാനമായി കേരളത്തിൽ സിപിഎം പാർട്ടി കോൺഗ്രസ് നടന്നത്. കോഴിക്കോട് വെച്ചായിരുന്നു അന്ന് പാര്‍ട്ടി കോണ്‍ഗ്രസ്‌.

Also Read : തിരുവനന്തപുരത്ത് വനിതാ ഡോക്ടർക്ക് നേരെ ആക്രമണം; വസ്ത്രം വലിച്ച് കീറാൻ ശ്രമിച്ചെന്ന് ഡോക്ടർ



പാർട്ടി കോൺഗ്രസിന് വേദിയാകാൻ കേരളത്തിന് പുറമെ തമിഴ്നാടും പരിഗണനയിലുണ്ടെന്നാണ് റിപ്പോർട്ട്. യാത്രാസൗകര്യം, പ്രതിനിധികളുടെ എണ്ണം തുടങ്ങിയവയൊക്കെ പരിഗണിച്ചായിരിക്കും ഇക്കാര്യത്തിൽ കേന്ദ്ര കമ്മിറ്റി അന്തിമ തീരുമാനമെടുക്കുക. ഏത് സംസ്ഥാനത്താകും പാർട്ടി കോൺഗ്രസ് എന്നതിൽ ശനിയാഴ്ചയോടെ തീരുമാനമായേക്കും.

Also Read : ലീഗ് പ്രതിസന്ധിയിലേക്കോ? പറയാനുള്ളത് പാർട്ടിയിൽ പറയുമെന്ന് മായിൻ ഹാജി; നേതൃയോഗം നാളെ

അതേസമയം സംസ്ഥാന തെരഞ്ഞെടുപ്പിൽ മുതിർന്ന നേതാക്കളെ മാറ്റി നിറുത്തുകയും മന്ത്രിസഭയിൽ പുതുമുഖങ്ങളെ ഉൾപ്പെടുത്തുകയും ചെയ്ത കേരള ഘടകത്തിന്‍റെ നിലപാടിനെ സിപിഎം കേന്ദ്രകമ്മിറ്റി പിന്തുണച്ചെന്ന റിപ്പോർട്ടും പുറത്ത് വന്നിരുന്നു. ബംഗാളിൽ കോൺഗ്രസുമായുള്ള ബന്ധം ഫലം കണ്ടില്ലെന്ന വിലയിരുത്തലും പാർട്ടി നടത്തിയെന്നാണ് റിപ്പോർട്ട്.