2015 സെപ്റ്റംബര്‍ 11 വെള്ളിയാഴ്ചയായിരുന്നു അപകടം ദുരന്തത്തില്‍ മലയാളി ഹജ് തീര്‍ഥാടകര്‍ അടക്കം 108 പേര്‍ മരിച്ചിരുന്നു 238 പേര്‍ക്ക് പരിക്കേറ്റിരുന്നു
ക്രെയിന്‍ തകര്‍ന്നത് കാറ്റിലും മഴയിലും
കരാറുകാരുടെ ഭാഗത്തുനിന്നുണ്ടായ കുറ്റകരമായ അശ്രദ്ധയാണ് ദുരന്തത്തിന് കാരണമെന്നായിരുന്നു പ്രൊസിക്യൂഷന്‍ വാദം. എന്നാല്‍ അപ്രതീക്ഷിതമായുണ്ടായ ശക്തമായ കാറ്റിലും മഴയിലുമാണ് കൂറ്റന്‍ ക്രയിന്‍ വിശുദ്ധ ഹറം മുറ്റത്ത് തകര്‍ന്ന് വീണതെന്ന് പ്രതികള്‍ വാദിച്ചു. ഇതു പരിശോധിച്ച കോടതി ക്രെയിന്‍ പൊട്ടിവീണ സംഭവത്തില്‍ പ്രതികളുടെ ഭാഗത്തു നിന്ന് എന്തെങ്കിലും വീഴ്ചയുണ്ടായതായി കണ്ടെത്താനായിട്ടില്ലെന്ന് കോടതി വ്യക്തമാക്കി. ക്രെയിനിന് എന്തെങ്കിലും തകരാറുള്ളതായി തെളിയിക്കപ്പെട്ടിട്ടില്ല. അത് പ്രവര്‍ത്തിപ്പിച്ചതില്‍ എന്തെങ്കിലും വീഴ്ചയുണ്ടായതിനും തെളിവില്ല. പൊടുന്നനെയുണ്ടായ ചുഴലിക്കാറ്റില്‍ ക്രെയിന്‍ തകര്‍ന്നുവീണതിന് നിര്‍മാണ കമ്പനികളെ പ്രതിക്കൂട്ടിലാക്കാനാവില്ലെന്നും കോടതി നിരീക്ഷിച്ചു.
ക്രിമിനല്‍ കോടതി വിധിയില്‍ അപാകതയില്ല
ലോകത്തെ നടുക്കിയ ദുരന്തമുണ്ടായി അഞ്ചു വര്‍ഷത്തിന് ശേഷം 2020ലായിരുന്നു കേസിലെ മുഴുവന്‍ പ്രതികളെയും കുറ്റക്കാരല്ലെന്ന് കണ്ടെത്തി മക്ക ക്രിമിനല്‍ കോടതി വെറുതെ വിട്ടത്. എന്നാല്‍ കോടതിയുടെ ഈ തീരുമാനത്തിനെതിരേ പബ്ലിക് പ്രൊസിക്യൂഷന്‍ അപ്പീല്‍ കോടതിയെ സമീപിക്കുകയായിരുന്നു. മക്ക ക്രിമിനല്‍ കോടതിയുടെ വിധിയില്‍ എന്തെങ്കിലും അപാകത കണ്ടെത്താനായിട്ടില്ലെന്നും പ്രതികള്‍ക്കെതിരേ തെളിവുകളൊന്നുമില്ലാത്ത സാഹചര്യത്തില്‍ മക്ക കോടതിയുടെ ഉത്തരവ് ശരിവച്ച് അപ്പീല്‍ തള്ളുകയാണെന്നും കോടതി വ്യക്തമാക്കി.
കുറ്റാരോപിതരില്‍ പ്രധാനി ബിന്‍ ലാദിന്‍ ഗ്രൂപ്പ്
കേസിലെ പ്രതികളെയെല്ലാം വെറുതെ വിട്ട് 2017ല്‍ കോടതി വിധിച്ചിരുന്നുവെങ്കിലും ക്രിമിനല്‍ കോടതിയുടെ വിധി സുപ്രീം കോടതി റദ്ദാക്കുകയായിരുന്നു. തുടര്‍ന്ന് നടന്ന പുനര്‍ വിചാരണയിലാണ് മക്ക ക്രിമിനല്‍ കോടതി പ്രതികള്‍ക്കെതിരേ തെളിവില്ലെന്നു കണ്ട് മുഴുവന്‍ പേരെയും വിട്ടയച്ചത്. സഊദിയിലെ ബിന്‍ലാദിന്‍ ഗ്രൂപ്പായിരുന്നു കേസിലെ പ്രധാന പ്രതി. നൂറിലേറെ പേര്‍ മരിക്കുകയും നിരവധി പേര്‍ക്ക് പരിക്കേല്‍ക്കുകയും ഭീമമായ നാശനഷ്ടങ്ങള്‍ ഉണ്ടാവുകയും ചെയ്ത അപകടത്തില്‍ ബിന്‍ ലാദിന്‍ ഗ്രൂപ്പ് ഉള്‍പ്പെടെയുള്ള കരാറുകാരില്‍ നിന്ന് നഷ്ടപരിഹാരം ഈടാക്കണമെന്ന പൊസിക്യൂഷന്‍ വാദവും കോടതി തള്ളി.
തകര്‍ന്നു വീണത് കൂറ്റന്‍ ക്രെയിന്‍
മക്കയിലെ ഹറമില്‍ നിര്‍മാണ പ്രവര്‍ത്തനത്തിലേര്‍പ്പെട്ടിരിക്കുന്ന കൂറ്റന്‍ ക്രെയിനുകളിലൊന്നായിരുന്നു തകര്‍ന്നു വീണത്. ഇതിന് 200 മീറ്റര്‍ ഉയരവും 1350 ടണ്‍ ഭാരവുമുണ്ടായിരുന്നു. ശക്തമായ ചുഴലിക്കാറ്റില്‍ തകര്‍ന്നു വീണ ക്രെയിന്‍ ഹറം പരിസരത്ത് പ്രാര്‍ഥനയില്‍ മുഴുകിയവര്‍ക്കു മേലെ പതിക്കുകയായിരുന്നു. അന്വേഷണത്തിന്റെ ഭാഗമായി കരാറുകാരായ സഊദി ബിന്‍ ലാദന്‍ കമ്പനിയിലെ എഞ്ചിനീയര്‍മാര്‍, ടെക്നീഷ്യന്‍മാര്‍, തൊഴിലാളികള്‍ എന്നിവരടക്കം 170 പേരില്‍ നിന്ന് അന്വേഷണ ഉദ്യോഗസ്ഥര്‍ മൊഴിയെടുത്തിരുന്നു. ക്രെയിനിന്റെ ബ്ലാക്ക് ബോക്സ് പരിശോധിച്ചതില്‍ മണിക്കൂറില്‍ 80 കിലോമീറ്ററായിരുന്നു കാറ്റിന്റെ വേഗതയെന്ന് കണ്ടെത്തിയതും കേസിലെ പ്രതികള്‍ക്ക് അനുകൂലമായി.
കാലാവസ്ഥാ പ്രവചനം തെറ്റി
അപകടം നടന്ന ദിവസത്തെ കാലാവസ്ഥാ നിരീക്ഷണ, പരിസ്ഥിതി സംരക്ഷണ വകുപ്പ് പുറത്തിറക്കിയ ബുള്ളറ്റിനില്‍ കാറ്റിന്റെ വേഗത മണിക്കൂറില്‍ ഒരു കിലോമീറ്റര്‍ മുതല്‍ 38 കിലോമീറ്റര്‍ വരെ മാത്രമായിരിക്കുമെന്നാണ് പറഞ്ഞിരുന്നതെന്ന് പ്രതിഭാഗം ചൂണ്ടിക്കാട്ടി. ഇത് സാധാരണ വേഗതയാണെന്നും പ്രത്യേക മുന്‍കരുതലുകള്‍ എടുക്കേണ്ട ആവശ്യമുണ്ടായിരുന്നില്ലെന്നും അവര്‍ വാദിച്ചു. എന്നാല്‍ പ്രവചനത്തിനെതിരായി അതിശക്തമായ ചുഴലിക്കാറ്റുാണ് അന്നേദിവസം അടിച്ചുവീശിയത്. പ്രതിഭാഗം വാദങ്ങള്‍ അംഗീകരിച്ച കോടതി അവരെ കുറ്റക്കാരല്ലെന്ന് കണ്ട് വിട്ടയക്കുകയായിരുന്നു. അതേസമയം, ഇനി മുതല്‍ കാലാവസ്ഥ മനസ്സിലാക്കുന്നതിനുള്ള സംവിധാനം കരാറുകാര്‍ തന്നെ ഒരുക്കണമെന്ന് കോടതി ഉത്തരവിട്ടു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : mecca crane collapse tragedy the court of appeals are dismissed the case involving binladin group
Malayalam News from malayalam.samayam.com, TIL Network
