നിയമ ലംഘകരെ കണ്ടെത്താന്‍ പരിശോധന
ഇനി ഇവര്‍ക്ക് പിഴകള്‍ അടച്ച് വിസ ശരിയാക്കി കുവൈറ്റില്‍ തുടരാനോ പിഴ കൂടാതെ നാട്ടിലേക്ക് മടങ്ങാനോ അവസരമുണ്ടാവില്ല. ഗ്രേസ് കാലാവധി അവസാനിച്ച സ്ഥിതിക്ക് രാജ്യത്തെ വിവിധ സുരക്ഷാ വിഭാഗങ്ങളുടെ നേതൃത്വത്തിള്ള സംയുക്ത പരിശോധന വ്യാപകമാക്കുമെന്ന് അധികൃതര്‍. നിയമലംഘകരെ കണ്ടെത്തുന്നതിന് വേണ്ടിയാണിത്. ഇവരെ അറസ്റ്റ് ചെയ്യുന്നതുള്‍പ്പെടെയുള്ള നടപടികള്‍ സ്വീകരിക്കും.
ഓരോ ദിവസത്തിനും ഒരു ദിനാര്‍ തോതില്‍ പിഴ
ഗ്രേസ് കാലാവധി അവസാനിച്ചതിന് ശേഷമുള്ള ഓരോ ദിവസത്തിനും ഒരു കുവൈറ്റ് ദിനാര്‍ എന്ന തോതിലാണ് പിഴ ഈടാക്കുക. പിഴ ഈടാക്കിയ ശേഷം ഇവരെ നാടുകടത്തുകയും ചെയ്യും. ഇങ്ങനെ നാട്ടിലേക്ക് അയക്കപ്പെടുന്നവര്‍ക്ക് ഇനിയൊരുക്കലും കുവൈറ്റിലേക്ക് തിരികെ വരാന്‍ സാധിക്കില്ലെന്നും അധികൃതര്‍ അറിയിച്ചു. ഇത്തരം അനധികൃത താമസക്കാരുടെ സ്‌പോണ്‍സര്‍മാര്‍ക്കെതിരേയും നടപടി സ്വീകരിക്കും. ഭാവിയില്‍ പ്രവാസി ജീവനക്കാരെ ജോലിക്ക് നിയമിക്കാനുള്ള അനുമതി ഇവര്‍ക്ക് നിഷേധിക്കുന്നത് അടക്കമുള്ള നടപടികളാണ് സ്‌പോണ്‍സര്‍മാര്‍ക്കെതിരേ കൈക്കൊള്ളുക.
ഗ്രേസ് കാലാവധി ആരംഭിച്ചത് 2020 മാര്‍ച്ചില്‍
2020 മാര്‍ച്ചിലായിരുന്നു കുവൈത്ത് ഭരണകൂടം ആദ്യമായി വിസാ ലംഘകര്‍ക്ക് പൊതുമാപ്പ് പ്രഖാപിച്ചത്. ആ സമയത്ത് രാജ്യത്ത് ഒരു ലക്ഷത്തിലേറെ പേരായിരുന്നു അനധികൃത താമസക്കാരായി ഉണ്ടായിരുന്നത്. എന്നാല്‍ കൊവിഡ് പ്രതിസന്ധിയെ തുടര്‍ന്ന് നിരവധി പേര്‍ക്ക് തൊഴില്‍ നഷ്ടമായതിനെ തുടര്‍ന്ന് അനധികൃത താമസക്കാരുടെ എണ്ണം വലിയ തോതില്‍ വര്‍ധിച്ചിട്ടുണ്ടെന്നാണ് അധികൃതരുടെ വിലയിരുത്തല്‍.
മാര്‍ച്ച് മാസത്തില്‍ ആരംഭിച്ച പൊതുമാപ്പ് കാലാവധി മെയ് 31ന് അവസാനിക്കേണ്ടതായിരുന്നു. എന്നാല്‍ കൊവിഡ് മഹാമാരിയെ തുടര്‍ന്നുണ്ടായ യാത്രാനിരോധം ഉള്‍പ്പെടെയുള്ള പ്രതികൂല സാഹചര്യത്തില്‍ പൊതുമാപ്പ് കാലാവധി പല തവണകളായി വീണ്ടും നീട്ടുകയായിരുന്നു. എന്നാല്‍ രാജ്യത്തിന് പുറത്തേക്ക് യാത്ര ചെയ്യാന്‍ നൂറുകണക്കിന് വിമാനങ്ങളാണ് ഇതിനകം സര്‍വീസ് നടത്തിയത്. അനധികൃത താമസക്കാര്‍ക്ക് പിഴ ഇല്ലാതെ നാട്ടിലേക്ക് മടങ്ങാന്‍ ഈ വിമാന സര്‍വീസുകളെ ഉപയോഗപ്പെടുത്താമായിരുന്നു. അതിനാല്‍ ഇനിയും രാജ്യത്ത് തങ്ങുന്ന അനധികൃത താമസക്കാര്‍ ശക്തമായ ശിക്ഷാ നടപടികള്‍ക്കു വിധേയരാവുമെന്നും അധികൃതര്‍ മുന്നറിയിപ്പ് നല്‍കി.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : kuwait says grace period for illegal immigrants has expired
Malayalam News from malayalam.samayam.com, TIL Network
